Қирғизистанда уйғур мәшрипиниң 10 йиллиқи хатириләнди

Өмәр һәмра әпәнди вә йеңидин толуқланған мәшрәп һәйити әзалири. 2015-Йил 24-май бишкәк.

24 - Май күни қирғизистанниң бишкәк, тоқмақ, қарабалта қатарлиқ шәһәрлиридики уйғур җамаитиниң вәкиллиридин 500 гә йеқин киши бишкәктики “версал” ристураниға җәм болуп, қирғизистан уйғур мәшрипи уюштурулғанлиқиниң 10 йиллиқини тәнтәнилик тәбрикләшти.

Қирғизистанда 160 қа йеқин мәһәлливи мәшрәпләр болуп, әйни чағдики иттипақ мәркизи кеңишиниң әзаси өмәр һәмраниң тәшәббуси вә иттипақ җәмийитиниң қоллап - қуввәтлиши билән 2005 - йили май ейида чоң типтики қирғизистан уйғур мәшрипи уюштурулған һәмдә шу қетимқи мәшрәптә өмәр һәмра әпәнди баш йигит беши болуп сайланған иди.

Қирғизистан уйғур мәшрипи уюштурулған он йил давамида 60 қетимдин көпрәк чоң типтики мәшрәп паалийити өткүзүлүп,яшларни уйғур мәдәнийити вә өрп - адәтлири асасида тәрбийәләш, қирғизистандики милләтләр ара иттипақлиқни күчәйтиш, қазақистан, өзбәкистан қатарлиқ қериндаш җумһурийәтләрдики уйғур җамаити билән болған алақиләрни җанландуруш қатарлиқ җәһәтләрдә актип рол ойниди.

Хатириләш паалийитидә алди билән сөз қилған қирғизистан парламинтиниң әзаси турсунтай сәлимуф мунуларни билдүрди:

- Мәшрәп уйғур хәлқниң мәниви байлиқи. Ата - бовилиримиз мәшрәпни бизгә мирас қалдуруп кәткән, бизму кейинки әвладларға мирас қалдурушимиз керәк. Қирғизистан уйғур мәшрипи уюштурулған 10йил давамида мәшрипимизниң баш йигит беши өмәр ака наһайити көп хизмәтләрни ишлиди. Мән бүгүн барлиқ мәшрәп әһли намидин өмәр акиға рәһмитимни билдүримә”.

Иттипақ җәмийити намидин қирғизистан уйғур мәшрипиниң 10 йиллиқини тәбриклигән рәис артиқ һаҗим баш йигит беши өмәр һәмра әпәндиниң уйғур миллий мәдәнийитини гүлләндүрүш йолидики хизмәтлиригә юқири баһа берип, қирғизистан милләтләр ассамбилийәсиниң тәбрик хетини оқуп өтти.

Хатириләш паалийити давамида елип берилған сайламда өмәр һәмра әпәнди йәнә бир қетим қирғизистан уйғур мәшрипиниң баш йигит беши болуп сайланди һәмдә униң намзат көрситиши билән мәшрәпниң тәшкили һәйити әзалири қайтидин толуқланди.

Мәшрәп җамаитиниң алқиш садалири ичидә сөзгә чиққан өмәр һәмра әпәнди хәлқниң өз әмгикини юқири баһалиғанлиқиға рәһмәт ейтип мундақ диди:

- Мәшрәп уюштурулған 10 йилдин буян җамаәтниң қоллиши вә тиҗарәтчи яшларниң ярдими билән аз болмиған нәтиҗиләргә ериштуқ. Мән яшлиримизниң миллитимизниң есил әнәнилирини җари қилдуруп, қирғизистан уйғур мәшрипини кейинки әвладларни тәрбийәләйдиған сәнәт бағчисиға айландурушини умид қилимән.

Хатириләш паалийити давамида, қазақистан вә өзбәкистандин кәлгән сәнәткарлар қирғизистан уйғур ансамбилидики сәнәтчиләр билән бирликтә надир сәнәт нумурлирини көпчиликкә тәқдим әтти.