Quddus téléwiziyeside Uyghurlar toghrisida mexsus programma tarqitilishqa bashlidi

Quddus téléwiziyeside Uyghurlar toghrisida mexsus programma. 2013-Yili 25-dékabir, türkiye.

Istanbulda teshwiqat saheside Uyghurlar üchün bir yéngiliq otturigha chiqti. Istanbulda programma tarqitiwatqan quddus téléwiziye qanilida sherqiy türkistan mesilisi toghrisida mexsus programma tarqitilishqa bashlidi.

Igilinishiche buningdin kéyin quddus téléwiziye qanilida her heptining charshenbe küni kech sa'et 20:00 din 22:00 giche bolghan ariliqta 2 sa'et mexsus Uyghurlar we sherqiy türkistan mesilisi toghrisida programma tarqitilidiken.

Bu programmining tarqitilishi toghrisida sherqiy türkistan ma'arip we hemkarliq jem'iyiti, istiqlal radi'o-téléwiziye teshwiqat bölümi bilen quddus téléwiziyisi mes'ulliri söhbetlishish arqiliq Uyghurlar toghrisida programma tarqitishqa kélishim qilishqan bolup, her heptide bir qétim her charshenbe küni kechte 20:00 din 22:00 giche türk tilida 2 sa'et, 00:00 tin 01:00 giche bir sa'et Uyghur tilida neq meydandin biwasite programma tarqitishni qarar qilghan. Istiqlal tor téléwiziye teripidin tarqitilip kéliwatqan heptilik téléwiziye xewiri buningdin kéyin quddus téléwiziye qanilida sün'iy hemrah arqiliq biwasite tarqitilidiken.

25-Dékabir kechte bu heptilik charshenbe künidiki programmigha sherqiy türkistan ma'arip we hemkarliq jem'iyitining re'isi hidayetullah oghuzxan teklip bilen qatnashqan bolup 2 sa'etlik programmigha türk axbaratchi mustafa uzun ependi riyasetchilik qildi.

Bu programmida hidayetullah oghuzxan Uyghurlarning tarixi, tili, dini, medeniyiti we örp-adetliri shundaqla xitayning Uyghurlar üstidin yürgüzüwatqan bésim siyasetliri toghrisida tepsiliy toxtaldi. Programma jeryanida yene Uyghurlarning tarixi we medeniyiti tonushturulghan höjjetlik filim körsitildi.

Bu programmilar sherqiy türkistan ma'arip we hemkarliq jem'iyitining tarmiqidiki intérnét tor arqiliq programma tarqitiwatqan istiqlal-radi'o-téléwiziye teshwiqat bölümi teripidin teyyarlinip tarqitilidiken.

Quddus téléwiziyisi ilgiri tor arqiliq programma tarqitiwatqan bolup yéqindin buyan sün'iy hemrah arqiliq biwasite programma tarqitishni bashlighan.

Biz bu heqte toluq melumatqa érishish üchün sherqiy türkistan ma'arip we hemkarliq jem'iyitining re'isi hidayetullah oghuzxan bilen söhbet élip barduq.

Hidayetullah oghuzxan, Uyghur mesilisini dunyagha anglitish, bolupmu türkiye we islam dunyasigha anglitishta mushundaq téléwiziye programmilirining köp tarqitilishi kéreklikini, bu heqte bir téléwiziye qanili échish üchün izdiniwatqanliqini we bir qanche téléwiziye qanalliri bilen uchriship söhbetlishiwatqanliqini, netijide, quddus téléwiziye qanilidin her küni 4 sa'et programma tarqitishqa waqit ajritilghanliqini, buningdin kéyin Uyghurlar üchün mexsus küni 24 sa'et programma tarqitidighan téléwiziye qurush üchün izdiniwatqanliqini ipadilidi.