Rabiye qadir xanim washin'gtonda ötküzülgen "Studéntlar üchün erkinlik" namliq xelq'ara konférénsiyede muhim söz qildi

Muxbirimiz qutlan
2016-02-28
Share
rabiye-qadir-student-erkinlik-2016.jpg Rabiye qadir xanim washingtonda ötküzülgen "Istudéntlar üchün erkinlik" namliq xelq'ara konférensiyede
RFA/Qutlan

27-Féwral, yeni shenbe küni Uyghur milliy herikitining rehbiri rabiye qadir xanim amérika paytexti washin'gtondiki mari'ot méhmanxanisida ötküzülgen 9-nöwetlik "Studéntlar üchün erkinlik" namliq xelq'araliq konférénsiyede muhim söz qildi.

Yighin bashlinishi bilen riyasetchi anglighuchilargha rabiye qadir xanimning qisqiche terjimihalini tonushturup ötti. Andin rabiye xanimni sözge teklip qildi.

Rabiye xanimning nöwette xitay da'irilirining yuqiri bésimliq siyasiti astida éghir derijide siyasiy we ijtima'iy siqilishlargha duch kéliwatqan Uyghur ayalliri we baliliri heqqidiki sözi yighin qatnashchilirida küchlük tesir qozghidi.

Amérikining herqaysi uniwérsitétliridin kelgen oqughuchilar rabiye xanimdin Uyghur mesilisi boyiche so'allar soridi.

Yighinning axirida rabiye qadir xanim radi'omizning mexsus ziyaritini qobul qilip, özining mezkur xelq'araliq konférénsiyege alahide teklip bilen qatnishishtiki sewebliri heqqide chüshenche berdi.

Rabiye xanim sözide ikki minggha yéqin yighin qatnashchilirining amérikidiki eng aktip studéntlar ikenlikini, ularning kelgüside amérika we dunyaning siyasiy sehniside muhim orunlarni tutidighanliqini, bügünkidek bundaq xelq'araliq sehnide ulargha Uyghur mesilisini anglitishning intayin zörürlükini tekitlep ötti.

Bügünki konférénsiyede rabiye xanimning sözini neq meydanda in'glizchigha terjime qilghan amérika Uyghur jem'iyitining re'isi alim séytof ependi ziyaritimizni qobul qilip mundaq dédi:

"'studéntlar üchün erkinlik' namliq dunyawi teshkilat amérikida her yili bir qétimdin dunyawi konférénsiye ötküzüp, yashlar we aliy mektep oqughuchilirining erkinlik we démokratiye istikini namayan qilidu. Bu qétim rabiye xanim alahide teklip bilen mezkur yighinda Uyghur mesilisini anglatti. Bu amérika we dunyaning kelgüsi siyasiy sehniside aktip rollarni alidighan yashlargha Uyghurlarni tonushturushta muhim bir sehne bolup qalidu."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet