Rabiye qadir xanim, rejep tayip erdoghanning xitay ziyariti heqqide pikir bayan qildi

Muxbirimiz shöhret hoshur
2015-07-31
Élxet
Pikir
Share
Print
Türkiye  jumhur  re'isi rejep tayyip erdoghan xitay ziyaritide shi jinping bilen bille
Türkiye jumhur re'isi rejep tayyip erdoghan xitay ziyaritide shi jinping bilen bille
RFA/Erkin Tarim

Dunya Uyghur qurultiyi re'isi rabiye qadir xanim bügün radiyomiz ziyaritini qobul qilip, türkiye dölet re'isi rejep tayip erdoghanning xitay ziyariti heqqide pikir bayan qildi. U sözide, xitay dölet re'isi shi jinpingning mezkur ziyaret dawamida qilghan Uyghur mesilisini bundin kéyin téximu qattiq qol bir terep qilidighanliqi heqqidiki bayanlirini eyiblidi. U shi jinpingning mezkur sözlirini Uyghur xelqighe sélin'ghan tehdit we türkiye jama'et pikrige qilin'ghan hörmetsizlik dep tenqidlidi. Rabiye xanim Uyghurlar arisida "Héchqandaq bir térrorluq teshkilatining mewjut emesliki we sherqi türkistanda yüz bergen qanliq weqelerning jawabkari xitay hökümiti ikenliki" ni tekitlidi. U sözining axirida, erdoghanning xitay ziyariti heqqidiki bezi xewerlerdin bi'aram bolghanliqini, emma türkiye xelqining sherqi türkistan xelqighe qarita insaniy we qérindashliq yardimining téximu küchiyip we ulghiyip baridighanliqigha ishinidighanliqini bildürdi.

Hörmetlik radiyo anglighuchilar, türkiye dölet re'isi rejep tayip erdoghanning xitay ziyariti, üch kündin buyan xitay we Uyghur jem'iyitining diqqet merkizide, bolupmu erdoghan bilen shi jinpingning söhbitidiki Uyghurlargha alaqidar qismi türkiye we muhajirettiki Uyghur jama'iti arisida ghulghula qozghidi. Bu heqte radiyomizda pikir bayan qilghan dunya Uyghur qurultiyi re'isi rabiye qadir xanim, asasliqi shi jinpingning sözlirini tenqid qildi. Shi jinpingning atalmish térrorluqqa qarita téximu qattiq tedbir alidighanliqi heqqidiki sözlirini Uyghur xelqighe sélin'ghan tehdit dep eyiblidi.

Rabiye xanim ikki terep arisida tilgha élin'ghan sherqi türkistan islam herikiti teshkilati üstide toxtilip, Uyghurlar arisida hazirghiche térrorchi bir teshkilatning bolup baqmighanliqini, Uyghurlarning erkinlik we özini qoghdash üchün küresh qiliwatqanliqini tekitlidi.

Melum bolushiche, erdoghan yolgha chiqishtin bir hepte burun dunya Uyghur qurultiyi rejep tayip erdoghan'gha bir yépiq mektup yollighan, mektupta Uyghur weziyitidiki nöwettiki birqanche jiddiy mesile bayan qilin'ghan we bu mesililerning xitay terep bilen söhbitide otturigha qoyulushi telep qilin'ghan. Rabiye xanim mezkur mektupta bayan qilin'ghan mesililer heqqide melumat erdi.

Xitay axbaratining erkin axbarat emesliki we teshwiqat qorali ikenlikini bayan qilghan rabiye xanim, xitay axbaratining erdoghanning Uyghur mesilisi heqqidiki sözlirini kemtük élan qilghanliq éhtimalliqini ilgiri sürdi. U buninggha türkiye bayanatchisi ibrahim qalinning sözlirini pakit qilip körsetti. Rabiye xanim xewerlerde néme déyilishidin qetinezer türkiye xelqining Uyghur xelqighe qarita hésdashliq we yardimining qan we étiqaddin kelgenlikini, shunga türk xelqining Uyghurlargha qarita yardimining buningdin kéyin téximu ulghiyidighanliqigha ishench bilen qaraydighanliqini bildürdi. Rabiye xanim sözide yene, "Sherqi türkistan mesilisining xelq'arawiy bir mesile ikenliki, ikki dölet arisidiki bir - ikki qétimliq söhbettiki ijabiy yaki selbiy sözlerning bu dawaning istiqbaligha tesir körsitelmeydighanliqi"ni eskertip ötti.

Toluq bet