Rabiye qadir xanim “Gollandiye türk fédératsiyuni” ning yighinida söz qildi

Ixtiyariy muxbirimiz pida'iy
2015.12.16
rabiye-qadir-xanim-turk-tarixi-we-dewlet-qurulmisi-muhakime-yighinida-sherqiy-turkistan-mesilisi-anglatmaqta.jpg Rabiye qadir xanim “Gollandiye türk fédératsiyuni” ning yighinida söz qilmaqta
RFA/Pidaiy


14 - Dékabir “Gollandiye Uyghur birliki teshkilati” bilen “Gollandiye türk fédératsiyoni” birlikte orunlashturghan “Türk tarixi we dölet qurulmisi” namliq muhakime yéghinida Uyghur diyari, Uyghurlarning nöwettiki ehwali toghriliq melumat bérildi.

Pa'aliyetke dunya Uyghur qurultiyining mes'ulliridin rabiye qadir xanim we séyt tumtürk ependilermu qatnashti.

“Gollandiye türk fédératsiyoni” gha qarashliq amistérdam eqsa meschiti wexpining zalida üch sa'etche dawam qilghan mezkur pa'aliyetke gollandiyediki türk milliy heriket partiyisining qollighuchiliri, türk milliyetchi yashliri, xanim - qizlar, yazarmen, zhurnalistlar bolup, ikki yüzche adem qatnashti.

Pa'aliyet heqqide qisqiche izahat bérip ötken gollandiye türk fédératsiyonining bashliqi murad gédik ependi dunya Uyghur qurultiyi bashliq Uyghurlarning teklipke bina'en qedem teshrip qilghanliqini tebrikligendin kéyin, rabiye qadir xanimni sözge teklip qildi.

Rabiye qadir xanim türk fédératsiyoni bilen bolghan alaqining nechche yillardin béri izchil dawam qiliwatqanliqini ipadilep: “Her qétimliq gollandiye ziyaritide teshkilat mes'ulliri bilen uchriship, Uyghur xelqi duch kéliwatqan ehwallarni ortaqlishish arqiliq ikki terep hemkarliqining barghanséri küchiyiwatqanliqidin intayin xursen” ikenlikini bildürüp ötti we Uyghurlargha alaqidar eng yéngi uchurlardin melumat berdi. U, yighin ishtirakchilirining telipi bilen shexsiy turmushigha alaqidar mezmunlar heqqidimu toxtaldi we so'allargha jawab berdi.

“Türk tarixi we dölet qurulmisi” namliq léksiye bilen bashlinip, “Sherqiy türkistanning zari” namliq pikir témisi bilen axirlashqan bu pa'aliyette rabiye qadir xanimdek bir dewa adimining bergen bedelliri we qorqmas rohidin tesirlen'gen, zulum ichide hayat - mamatliq körüshi qiliwatqan Uyghur qérindashlirigha bolghan hésdashliq tuyghulirining hayajan'gha chömgen pa'aliyet ishtirakchiliri, rabiye qadir xanim bilen birge xatire resimlerge chüshti.

Pa'aliyet mezkur fédératsiyon bashliqi murad gédik ependining rabiye qadir xanimgha “Gollandiye türk fédératsiyoni teshekkür lewhesi” ni teqdim qilishi bilen axirlashti.

Ziyaritimizni qobul qilghan “Gollandiye türk fédératsiyoni” ning bashliqi murad gédik ependi, rabiye qadir xanimning “Türk tarixi we dölet qurulmisi” namliq muhakime yéghinigha teshrip qilip, türk milliy herikitining jama'etlirige Uyghur mesilisini anglatqanliqidin xursen bolghanliqini bildürüp, “Gollandiye türk fédératsiyoni” namidin Uyghurlar bilen bolghan kechmishtiki hemkarliqning ghelibilirini radiyo anglighuchilirimiz bilen ortaqlashti.

U mundaq dédi: “Bügün ‛gollandiye türk fédératsiyoni‚ gha qarashliq amistérdam eqsa meschiti wexpining zalida ötküzülgen “Türk tarixi we dölet qurulmisi” muhakime yéghinigha rabiye qadir xanimning qétilishi bizni hayajanlandurdi. Chünki bu muhakimimizning tariximizdin bashlap sherqiy türkistan mesilisige kélip toxtilishi uni téximu mukemmelleshtürdi.

Elwette, bu bizning sherqiy türkistan'gha munasiwetlik tunji pa'aliyitimiz emes, belki yilda bir qanche qétim pa'aliyet teshkillep kéliwatimiz. Bu bizning 2015 - yiligha tewe 3 - pa'aliyitimiz. Körginingizdek ishtirakchilar zalgha sighmay qaldi. Hetta öre turup anglapmu, hayajan chömdi. Ötkende ramizan éyidimu xitay konsulxanisi aldida iptar qilish, jama'et bolup namaz oqush arqiliq namayish qilishtek birleshme pa'aliyitimiz bilen ‛gollandiye türk fédératsiyoni‚ namidin awazimizni yangrattuq. Uningdin bashqa fédératsiyonimiz namidin gollandiye parlaméntighimu sherqiy türkistandiki qérindashlirimizgha boluwatqan zulumlarning chektin ashqanliqini chüshendürüp yazma doklat sunduq. Ötkende yene sherqiy türkistandin hijret qilip, türkiyening qeyseri shehirige yerleshken qérindashlirimizgha yardem toplash pa'aliyiti teshkillep ulargha yetküzduq. Bu xizmetlirimiz seweblik sherqiy türkistanliq qérindashlirimizgha birer paydimiz yetse, biz üchün néme dégen, bext he?! chünki bu bizning wezipimizdur. Ehmed yesiwiyning éytqinidek, ‛türklük bizning teqdirimiz‚ dur. Biz üchün türk sistémisidiki qérindashlirimizgha yardem qilish bashqilardin ilgiri külidu. Nede bir türk bolsa, u bizning qérindishimizdur. Ularning toyliri bizning toylirimizdur. Yighisi yighimizdur. Ularning derdi bizning derdimizdur.”

Murat gédik ependi yene milliyetchi heriket idé'ologiyiside yughurulghan qérindashlarning Uyghur qérindashlirigha bolghan köz qarishi heqqide sorighinimizda: “Her qachan sherqiy türkistan déyilse ichimdin qanliq yigha kélidu. U bizning milliy éngimizdur. Biz teshkilat bolup qurulghandin béri ‛türk toplimining qiyinchiliqliri öz qiyinchiliqimiz‚ dep kelduq. Bizning türk dunyasigha bolghan köz qarishimiz hem qur'aniydur. Hem turaniydur.” dep jawab berdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.