Rusiye nato gha qarshi herbiy manéwir bashlidi

Rusiye déngiz armiyesi xitay bilen ottura yer déngizida birleshme manéwir ötküzüp bolup, bir qanche kün ötkendin kéyin yene bir qétimliq zor kölemdiki herbiy manéwirni bashlidi. Ukra'ina krizisi tüpeylidin nato bilen rusiye arisidiki ixtilap yenila ötkür halette turuwatqanda ötküzülgen bu manéwir diqqetni jelp qilmaqta.

Rusiye dölet mudapi'e ministirliqi bu manéwirni rusiye qoralliq küchliri merkiziy herbiy rayoni qoshunlirining hawadin mudapi'elinish we hawa qisimlirining jeng qilish teyyarliqini tuyuqsiz tekshürüsh pa'aliyiti dep atighan.

B b s agéntliqining xewer qilishiche, mezkur herbiy manéwirda 250 herbiy ayropilan we tik uchar ayropilan shuningdek 700 her xil herbiy téxnika qoralliri ishqa sélin'ghan. Rusiye mudapi'e ministirliqi mezkur manéwirning töt kün dawamlishidighanliqini we 12 ming herbiy xadim qatnishidighanliqini bildürgen.

Rusiye dölet mudapi'e ministirliqi mezkur herbiy tekshürüsh pa'aliyitining prézidént wladimir putinning testiqi bilen élip bérilghanliqini bildürdi. Dölet mudapi'e ministiri sérgéy shoygu bu qétimqi manéwirning bu yil 9 - ayda ötküzülidighan “Merkez - 2015” dep atalghan chong herbiy manéwirning teyyarliq ishi bilen munasiwetlik ikenlikini bildürgen.

Rusiyening mezkur herbiy manéwiri natoning shimaliy qutup manéwiri bashlishigha toghra keldi.

Amérika awazining xewer qilishiche, nato ning düshenbe küni bashlighan shimaliy qutub manéwirigha 100 hujumchi ayropilan we 4 mingdin artuq herbiy xadim qatnishidiken. Mezkur manéwir taki 5 - iyun'ghiche dawamlishidighan bolup, buninggha natogha eza, amérika, gérmaniye, en'gliye, fransiye, norwégiye we gollandiye shuningdek yene natogha eza emes, shwétsiye, finlandiye we shwétsariyemu qatnishidiken.

Rusiye xewerler agéntliqining yézishiche, buningdin bir qanche kün ilgiri, yeni 17 - maydin 21 - mayghiche bolghan ariliqta rusiye we xitay déngiz armiyeliri birlikte 10 paraxot chiqirip, ottura yer déngizining sherqiy bolügide, yeni türkiye, grétsiye we misir arisidiki déngiz rayonida birleshme herbiy manéwir ötküzgen idi.

Rusiye bilen xitay déngiz armiyesining öz déngiz tewelikidin nahayiti yiraqtiki ottura yer déngizida ötküzgen bu birleshme manéwir natoning diqqitini tartqan idi. Biraq, rusiye mu'awin dölet mudapi'e ministiri anatoliy antonow xitay bilen rusiyening mezkur birleshme déngiz armiye manéwérining üchinchi döletke qarshi turush üchün emesliki, we rayondiki jiddilishiwatqan siyasiy weziyet bilen munasiwetsizlikini eskertken. Emma, xitay bilen rusiye bu yil 8 - ayda yiraq sherqtiki yapon déngizida birleshme déngiz armiye manéwiri ötküzüshke pütüshken idi.

Ukra'ina krizisi jiddiyleshkende kéyin, rusiye gherbning imbargoliri tüpeylidin yétip qélishqa uchrap, xitay bilen bolghan énérgiye, soda - iqtisadiy hetta herbiy - siyasiy hemkarliqlarni kücheytishke kirishken idi. 8 - 9 - May künliri xitay re'isi shi jinping moskwa ziyaritide ikki dölet yene bir qatar kélishimlerni imzalidi.

Rusiyening uran tawlash mesiliside izchil gherb bilen zitliship kéliwatqan iran bilen sözliship, iran'gha “S - 300”tipliq hawa hujumidin mudapi'elinish rakéta sistémisi sétip bérish heqqide kélishim hasil qilghanliqi iran tereptin mu'eyyenleshtürüldi. Rusiye terep mezkur sodining pat arida emelge éshishi mumkinchilikini bildürgen idi.

Nöwette, ukra'ina mesilisini yenila muqimsiz halatte bolup, gerche urush toxtighan bolsimu, emma rusiye herbiy ayroplanlirining ukra'ina chégraliri etrapida da'im uchup yürüshliri körülüp turmaqta iken.

Rusiye natoning ukra'ina mesilisidiki agahlandurushlirini da'im inkar qiliwatqan bolup, natoning baltiq döletliride mudapi'eni kücheytishi we shimaliy qutup manéwirini bashlishigha qarita rusiyening yuqiriqidek herbiy manéwirlar arqiliq inkas qayturiwatqanliqi tehlil qilinmaqta.