Nato rusiye qoshunlirini ukra'inadin élip chiqip kétishni yene telep qildi

Ukra'ina eskerliri kiyefqa 150 kilométir kélidighan rayonda herbiy meshiq élip barmaqta. 2014-Yili 14-mart, ukra'ina.

Shimaliy atlantik okyan ehdi teshkilati bash sékrétari yénis stolténbérg rusiyeni ukra'inadiki qoshunlirini élip chiqip kétishke chaqirdi.

Emma rusiye terep özining ukra'inada qoshuni yoqluqini bildürmekte. Sherqiy ukra'ina mesilisi uzundin buyan gherb bilen rusiye arisidiki ixtilapqa aylan'ghan bolup, rusiye bu mesilide bir qanche qétim iqtisadiy émbargosi uchrighan idi.

Charshenbe küni nato bash sékrétari bu chaqiriqni biryussélda ötküzülgen muxbirlarni kütüwélish yighinida qilghan bolup, u shimaliy atlantik okyan ehdi teshkilatining bir qanche aydin buyan éniqlash arqiliq rusiye qoshunlirining ukra'ina zéminida mewjutluqigha a'it uchurgha ige bolghanliqini eskertken.

B b s ning xewiride körsitilishiche, charshenbe küni, shwétsariyening da'us shehiride ötküzülgen dunya iqtisadiy muhakime yighinigha qatniship söz qilghan ukra'ina prézidénti pétir poroshénko rusiyeni tenqid qilip, ukra'ina tupriqida zor sanda rusiye qoshunliri we herbiy téxnikilirining jaylashqanliqini jakarlighan.

Sherqiy ukra'inadiki rusiye küchlirining sani heqqide toxtalghan pétir poroshénko sherqiy ukra'inadiki bölgünchilerge yardem bériwatqan 9 ming neper rusiye herbiy xadimi we köp sanda zembirek hem tankilar barliqini bildürgen idi. Poroshénko yene ukra'inada yüz bergen 13 ademning ölüshini keltürüp chiqarghan aptobusqa oq chiqirish weqesini eslitip, bu aptobusqa rusiye rakéta oqi chüshkenlikini bildürgen. Biraq, weqedin kéyin, ukra'ina we sherqiy ukra'inadiki küchler özlirining bu weqe bilen munasiwitini yoqluqini bildürgen idi.

B b s ning xewiride éytilishiche, emma, nato bash sékrétari ukra'ina prézidénti poroshénkoning mezkur sanliq uchurigha izahat bérishni ret qilip, “Biz konkrét reqem we miqdar heqqide toxtalmaymiz” dep bildürgen.

U, yene “Biz sherqiy ukra'inadiki rusiye qorallirining sanining ashurulghanliqi, yeni tanka, zembirek, bronéwik we hazirqi zaman hawadin mudapi'e körüsh eslihelirini körduq”dep eskertken.

Emma, rusiye mu'awin bash ministiri arkadiy dworkowich dawosta b b s ning muxbirining ziyaritini qobul qilip, rusiyening ukra'inaning ichki ishigha arilashmaydighanliqini bildürgen shuningdek rusiye térritoriyisidin ukra'ina tupriqigha qaritip oq chiqirilishqa a'it sünniy hemrah süretlirinining saxtiliqini körsetken.

Rusiye tashqi ishlar ministiri sérgéy lawrof ukra'inaning mezkur eyiblishining asassiz ikenlikini bildürdi.

Emma, ukra'ina izchil türde rusiyening sherqiy ukra'inadiki bölgünchilerni qoral-yaraq we adem küchi bilen qollawatqanliqidin shikayet qilmaqta.

Seyshenbe küni gérmaniye bash ministiri mérkél charshenbe küni mexsus ukra'ina mesilisi boyiche bérlinda ötküzülidighan rusiye, gérmaniye, firansiye we ukra'ina tashqi ishlar ministirliri yighini heqqide toxtilip, mezkur uchrishishning meqsitining eslide ötken hepte qazaqistan paytexti astanda ötküzülmekchi bolghan ismi atalghan dölet bashliqlirining ukra'ina mesilisige a'it yighinning bikar qilinishidin kéyin mezkur yighinni eslige keltürüsh mesiliside pikir birliki hasil qilish ikenlikini körsetken idi.

Rusiyening “Lénta.Ru” torining xewer qilishiche, ukra'ina da'iriliri sherqiy ukra'inadiki weziyet tüpeylidin 20-yanwardin bashlap, öz qoshunini köpeytishke kirishken bolup, 90 kün ichide 50 ming esker élishni qarar qilghan.

Ukra'ina da'iriliri arisida qoshun sanini 250 minggha yetküzüsh pikri otturigha chiqqan.

Nöwette, sherqiy ukra'inadiki özlirini musteqil dep jakarlighan lugansk we donésk rayonliridiki rusiyeperes küchler bilen ukra'ina armiyisi arisidiki jengler izchil dawamlashmaqta.

Peyshenbe küni, her qaysi xewer agéntliqliri charshenbe küni bérlinda ötküzülgen firansiye,gérmaniye, rusiye we ukra'ina tashqi ishlar ministirliri uchrishishining yeküni heqqide bezi uchurlar ashkarilan'ghan bolup, rusiyening “ Wésti.Ru” tori mezkur uchrishishta zor netije bolmisimu, emma rusiye tashqi ishlar ministiri lawrowning bu yighinda toqunush rayonliridin éghir qorallarni élip kétish heqqide kélishim hasil qilin'ghanliqi, sherqiy ukra'inadiki krizisi hel qilishta ilgirilesh bolghanliqini éytqanliqini xewer qildi. Biraq, peyshenbe küni etigende donétsk shehiridiki bir trallébusqa rakéta oqi chüshüp, 10 nechche ademning ölüshini keltürüp chiqarghan bolup, ukra'ina bash ministiri yatsunok bu weqede rusiyening jawabkarliqi barliqi bilen eyiblidi. Arqidin, rusiye tashqi ishlar ministiri sérgéy lawrow ukra'ina terepning eyiblishini inkar qilip, ukra'ina terepni tenqid qildi.

Firansiye agéntliqi yene peyshenbe küni, 242 kündin buyan ukra'ina armiyisining qolida turuwatqan donétsk ayrodromidiki ukra'ina qoshunlirining ayrodromni tashlap chékin'genliki, hazir bu ayrodromning rusiyepreres küchlerning qoligha chüshkenlikini xewer qildi.

Analizchilar ukra'ina krizisini hel qilish üchün tirishiliwatqan waqitlarda yüz bériwatqan bu weqelerning weziyetni téximu murekkepleshtürüwétishi mumkinlikini otturigha qoymaqta.