Türkiyening samsun wilayitide Uyghur mesilisi anglitildi

11 - Mart küni türkiyening sherqiy shimaligha jaylashqan samsun shehiride “Mezlum jughrapiyelik rayonlargha seper”mawzuluq pa'aliyet ötküzüldi. 3 - Ayning 18 - küni axirlishidighan 10 kün dawamlishidighan pa'aliyet jeryanida samsun déngizining otturisidiki bir kémining ichide éziliwatqan musulman dölet we rayonlardiki xelqler duchar boluwatqan bésim eks ettürülgen resimler qoyulghan. Arqidin her küni bir éziliwatqan musulmanlardin bir kishi öz rayonidiki zulumni anglatmaqta.

11 - Mart küni Uyghurlarning hazirqi weziyiti toghrisida melumat bérish pa'aliyiti ötküzüldi. Pa'aliyetke samsun janik rayonluq hökümetning bashliqi osman gench ependi, samsunda pa'aliyet élip bériwatqan ammiwi teshkilat mes'ulliri, oqutquchi we oqughuchilardin bolup 500 etrapida kishi qatnashqan. Bu pa'aliyette sherqiy türkistan wexpining sabiq bash katipi xamit göktürk ependi “Sherqiy türkistanning hazirqi weziyiti” témisida doklat bergen. Bu doklat samsun wilayetlik téléwizyedin neq meydandin tarqitilghan. Biz bu pa'aliyet toghrisida tepsili melumat élish üchün xamit göktürk ependi bilen söhbet élip barduq.

Xemit göktürk ependi samsunda ötküzülgen bu pa'aliyetning nahayiti yaxshi ötkenlikini, sherqiy türkistan mesilisining türkiyede dunyaning herqaysi jayliridiki muhim mesililer arisigha kirgenlikini bayan qildi.