Қазақистан соти қазақистандин сиясий панаһлиқ тилигән сайрагүлни қоюп бәрди

Мухбиримиз меһрибан
2018-08-01
Share
Sayragul-Erkinlikte.jpg Қазақистан сот мәһкимиси тәрипидин қоюп берилгән сайрагүл савутбай ханим. 2018-Йили 1-авғуст. Алмута, қазақистан.
Social Media

1-Авғуст күни қазақистанниң алмута областиға қарашлиқ яркәнт шәһиридики сот мәһкимиси һөкүм елан қилип, 5-айниң 21-күни қазақистан сақчилири тәрипидин қолға елинип, 2 айдин буян «чеградин қанунсиз өткән» дегән җинайәт билән қамақта тутуп турулуватқан сайрагүл савутбайниң қоюп берилгәнлики елан қилинди.

Иҗтимаий таратқулардин фейсбук қатарлиқларға йолланған син көрүнүшлиридин мәлум болушичә, сот мәһкимиси тәрипидин қоюп берилгән сайрагүл ханим айлардин буян намайиш қиливатқан қоллиғучилириға рәһмәт ейтиш билән биллә уни хитай һөкүмитигә қайтуруп бәрмәй қазақистандики аилиси билән җәм болуш пурсити бәргән қазақистан һөкүмити вә президент назарбайефқа алаһидә тәшәккүрини билдүргән. 

Сот аяғлашқандин кейин қазақ паалийәтчилиридин серк әпәнди зияритимизни қобул қилди.

Серк әпәнди сөзидә шу тапта өзиниң сайрагүл вә униң аилисини елип аптомобил билән алмута шәһиригә қайтиш сәпиридә икәнликини, йол-йолда тохтап сайрагүлниң қоюп берилгәнликини тәбрикләшкә кәлгән қазақ қериндашлар билән учрашқанлиқини, өзиниң йолда нутуқ сөзләп, техиму көп қазақ қериндашларни һәққанийәт мәйданида туруп, хитайниң җаз лагерлириға соланған уруқ-туғқанлири вә уларниң ечинишлиқ әһвалини дуняға аңлитишқа дәвәт қилип маңғанлиқини билдүрди.

1-Авғуст күни сайрагүлниң қоюп берилгәнлик хәвири тарқалғандин кейин, дуняниң һәрқайси җайлирида паалийәт елип бериватқан уйғур паалийәтчилириму зияритимизни қобул қилип, өз қарашлирини оттуриға қойди.

Қазақистандики уйғур паалийәтчилиридин дуня уйғур қурултийиниң қазақистандики алий мәслиһәтчиси қәһриман ғоҗамбәрди әпәнди «хитайниң шәрқий түркистанда қурған җаза лагерлириниң әһвалини дуняға ашкарилашқа җүрәт қилған сайрагүл ханимниң хитайға қайтуруп берилмәй, қазақистандики аилиси билән җәм болушқа қоюп берилиши» ниң әһмийитини тәкитлиди.

У шаңхәй һәмкарлиқ тәшкилати қурулғандин буян хитай билән қоюқ иқтисадий вә сиясий һәмкарлиқ орнатқан қазақистанда бундин кейин инсан һәқлирини қоғдашта тарихий бир бурулушниң болушини үмид қилидиғанлиқини билдүрди.

Канададики уйғур паалийәтчилиридин дуня уйғур қурултийи муһаҗирлар комитетиниң мудири мәмәт тохти әпәндиму зияритимизни қобул қилип, сайрагүл ханимниң хитайға қайтурулмастин қоюп берилгәнликини тәбриклиди. У буни қазақистан һөкүмитиниң етник җәһәттин қандаш болған қазақ қериндашлириға игә чиққанлиқи дәп қарайдиғанлиқини билдүрди. 

1-Авғуст күни дуня уйғур қурултийиму өзиниң тор бетидә сайрагүл савутбайниң қоюп берилиши мунасивити билән баянат елан қилди. 

Дуня уйғур қурултийиниң баянатчиси баянатчиси дилшат ришит әпәнди радийомизға қилған сөзидә қазақистан сотиниң сайрагүл савутбайни хитайға қайтуруп бәрмәй, униң қазақистандики аилиси билән биллә яшишиға йол қойғанлиқини тәбриклиди һәмдә өзиниң қазақистан һөкүмитидин күтидиған үмидини билдүрди.

Игилинишичә, сайрагүлниң ери вә икки балиси қазақистан пуқраси икән. Бу йил апрел ейида уйғур дияридин қазақистанға қечип барған сайрагүл савутбай 21-май күни «чеградин қанунсиз өткән» дегән җинайәт билән әйиблинип, қазақистан сақчилири тәрипидин қолға елинған иди. Икки айдин буян алмута областиға қарашлиқ яркәнт шәһиридә давамлишиватқан сотта сайрагүл өзиниң уйғур дияридики «тәрбийиләш мәркизи» намида мәвҗут болуватқан лагерларниң биридә хитай тарихидин дәрс өтүшкә мәҗбурланғанлиқини билдүрүп, бу җәрянда ашу лагерда көргәнлири һәққидә мәлумат бәргән. У йәнә өзи ашкарилиған әһвалларниң хитайниң «дөләт мәхпийәтлики» һесаблинидиғанлиқини билдүрүп, қазақистан һөкүмитидин өзини хитайға қайтурмаслиқни тәләп қилған вә сиясий панаһлиқ тилигән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.