Türkiyede “Meydan géziti” maqalisige reddiye bérildi

Ixtiyariy muxbirimiz erkin tarim
2015.04.13
saxta-turk-pasport-2.JPG Saxta türk pasporti bilen istanbulgha kelgen Uyghurlarning sham iraq islam dölitining süriyediki jeng meydanigha ewetilgenliki ilgiri sürülgen xewerning yaman niyet bilen yézilghan yalghan xewer ikenlikini “Ülke t w” tekitliniwatqan körünüsh (téléwizor programmisidin süretke élin'ghan). 2015-Yili 9-aprél, türkiye.
RFA/Erkin Tarim

4-Ayning 9-küni türkiyediki “Meydan géziti”de élan qilin'ghan xewerde, saxta türk pasporti bilen istanbulgha kelgen Uyghurlarning istanbulda bir-ikki kéche turghandin kéyin sham iraq islam dölitining süriyediki jeng meydanigha ewetilgenliki ilgiri sürülgen.

Xewerde yene hazirghiche xitayning Uyghur bölgisige türkiyedin 50 ming saxta türk pasporti ewetilgenliki, 50 ming Uyghurning sham iraq islam térror dölitining süriyediki jeng meydanigha ketkenliki, buni türk hökümitining qollawatqanliqi ilgiri sürülgen. Xewerde Uyghurlarni süriyege yolgha séliwatqan guruhlarning merkizi ishxanisining istanbul zeytinburnuda ikenliki ilgiri sürülgen. Bu xewer “Zamantoday” gézitidimu élan qilin'ghan. Bu ikki gézit türk hökümitige qarshi turuwatqan fethullah gülen jama'itining gézitliri iken.

Bu xewer élan qilin'ghandin kéyin türkiyediki eng chong gézitlerdin “Sabah géziti”, in'glizche “Sabahtoday” we “Axsham” qatarliq gézitler bilen “A xaber”, “Ülke t w” we dölet téléwizyesi bolghan “T r t qatarliq qanallar xewer tarqitip, mezkur xewerning yaman niyet bilen yézilghan yalghan xewer ikenlikini tekitleshti.

Xewerde bu yalghan xewer élan qilin'ghan gézitning türkiye hökümitige qarshi turush üchün mezlum Uyghurlarni qarilighanliqi ilgiri sürüldi. Bu gézit we téléwiziyelerde élan qilin'ghan xewerlerde, xelq'ara munasiwetler mutexessisi qilich qanat ependi we dunya Uyghur qurultiyi mu'awin re'isi séyit tümtürk ependilerning bu heqtiki köz qarashlirigha orun bérildi.

Ufuq ulutash ependining “Axsham” gézitide élan qilin'ghan “Fethullah gülen metbu'atining Uyghurlar toghrisidiki yalghanliri” mawzuluq maqaliside mundaq dep yézilghan:
“Uyghurlar bilen türkmenler pütün ümidini türkiyege baghlighan qérindash xelqler. Ular béshigha kün chüshse türkiyege telmüridu. Bash ministir exmet dawutoghlining ürümchide bir Uyghur bilen quchaqlap körüshken körünüshi türkiyening Uyghurlargha bolghan semimiy söygüsini ipadileydu. Shunga türkiye hazirghiche on minglighan Uyghurgha grazhdanliq berdi, bu Uyghurlar dölitimizning ayrilmas bir parchisi boldi. Epsuski Uyghurlar we türkmenlerning hemmisi türkiyege qéchip kélish pursitige ige bolalmidi. Bügünki künde Uyghurlar xitayning, türkmen qérindashlirimiz esat we de'ashning zulumi astida yashimaqta.”

Ufuq ulutash ependi “Axsham” gézitide élan qilin'ghan maqaliside, türkiye jumhuriyiti dölitining Uyghurlargha insaniy jehettin yardem qilishqa tirishiwatqan bügünki künde türk hökümitige qarshi bolghan fethullah gülen guruhining türk hökümitini qarilash üchün Uyghurlarni térrorist qilip körsitishke tirishiwatqanliqini, bu xitayning Uyghurlarni xelq'arada térrorist qilip körsitish siyasitige maslishiwatqanliqini yazghan. U, maqaliside bu xil xewerlerning Uyghurlargha diniy bésim siyasiti yürgüzüwatqan xitaygha paydiliq, türk dölitining aliy menpe'etige ziyanliq ikenlikini, bundaq xewer élan qilghan bu gézitning ya xitayning jasusi yaki türkiye dölitining düshmini ikenlikini yazghan.

D u q mu'awin re'isi séyit tümtürk ependimu türkiyediki bezi téléwiziye we gézitlirige bayanat bérip, Uyghurlarni demeshq iraq islam döliti teshkilatigha baghlash üchün élan qilin'ghan bu xewerning yalghan xewer ikenlikini, chünki 50 ming Uyghurning saxta türk pasporti bilen xitaydin chiqishining mumkin emeslikini, zaman gézitining xitay teshwiqatigha masliship, Uyghurlargha hésdashliq qilmighanliqini körsetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.