Tashkentte shangxey hemkarliq teshkilatining nöwettiki mejlisi échildi

Yéqinda özbékistan paytexti tashkentte shangxey hemkarliq teshkilatigha eza memliketlerning hökümet bashliqlirining 12-mejlisi bolup ötti. Uninggha qazaqistan, xitay, qirghizistan, rusiye, tajikistan we özbékistanning bash ministirliri, teshkilat yénidiki közetküchi memliketlerdin afghanistan, hindistan, iran, mongghuliye, pakistan wekilliri, shundaqla birleshken döletler teshkilati, sherqiy jenobi asiya döletliri birleshmisi we musteqil döletler hemkarliqi wekilliri qatnashti.

Özbékistanning “Özbek-réport” axbarat agéntliqi melumatlirigha qarighanda, uning qatnashquchiliri özlirini birleshtürüsh meqsitide maliye asasini qurushqa kélishken bolup, shuning netijiside shangxey hemkarliq teshkilatining konkrét layihilerni xirajet bilen teminleydighan ortaq banka qurmaqchi iken.

Rusiye bash ministiri d. Médwédéf mejliste sözge chiqip, teshkilat ezalirini süriyediki herbiy arilishishning xewpi, iran yadro programmisi mesililiri boyiche meslihetler we afghanistandiki muqimsizliq qatarliq bügünki kündiki eng muhim mesililerni muhakime qilishqa chaqirdi. Amma bashqilar muqimliq we bixeterlik mesililiridin tashqiri yene iqtisadiy hemkarliqqa oxshash mesiliningmu muhim ikenlikini otturigha qoyup, shu yönilishte quruq sözdin emeliy heriketlerge köchüshning waqti yetkenlikini bildürdi. Uchrishishta her qaysi memliket wekili öz tekliplirini otturigha qoyup, shuning etrapida muzakire yürgüzüshke tirishqan. Mesilen, rusiye wekili téz arida teshkilatning énérgiye kulubini qurushni teklip qilsa, qazaqistan bash ministiri s. Axmétof rusiyeni qollap, öz nöwitide omumiy ozuq-tülük bixeterlik programmisini, xitay wekili bolsa, teshkilat da'iriside erkin soda meydanini qurushni teklip qilghan. Shundaqtimu uchrishish qatnashquchiliri bu qétimda dunya we rayonluq xaraktérge ige hem teshkilat da'irisidiki soda, iqtisadiy we ijtima'iy hemkarliq boyiche muhim mesililerni muhakime qilip, ularning beziliride mundaq kélishimge keldi: dunyawi maliye-iqtisadiy krizisning téxi ayaghlashmighanliqini nezerde tutqan halda, iqtisadiy muqimliq we maliyewiy turaqliqni teminlesh, sana'et sahelirini zamaniwilashturush we ahalining turmush sewiyisini yaxshilash boyiche konkrét charilerni körüsh؛ soda, iqtisad, maliye, banka, meblegh sélish, ilmiy-téxnika, transport, alaqe, yéza igiliki, énérgiye saheliridiki öz-ara hemkarliqni yenimu kücheytish؛ tashqi iqtisad we tashqi soda munasiwetlirini aktiplashturush. Bu jehette iqtisad, mashina yasash, yénik we ozuq-tülük sana'iti, yéza igiliki, sayahet we bashqimu sahelerde birleshken karxanilarni qurush we ularning ishini janlandurush؛ teshkilatning barliq ezalirining ijtima'iy, iqtisadiy tereqqiyatini teminlesh meqsitide maliye-banka hemkarliqini kücheytish, teshkilatning tereqqiyat bankisini qurush؛ transport saheside hemkarliqni we xelq'ara transport yollirini rawajlandurush.

Hökümet rehberliri öz-ara iqtisadiy hemkarliqni kücheytishte xelq'ara hawa, tashyol we tömür yollirining atquridighan roligha chong ehmiyet berdi؛ bash ministirlar shundaqla tamozhna xizmitining pa'aliyitini yuqiri bahalap, bu sahedimu hemkarlishishning yolyoruqlirini belgilidi؛ buningdin tashqiri yéza igiliki sahesidiki hemkarliqni aktiplashturush meqsitide yéza igiliki ministirlirigha emeliy charilerni ishlep chiqish tapshuruldi؛ hökümet rehberliri shundaqla tebi'iy apet, halaket we bashqimu pewqul'adde ehwallargha qarshi turushta, salametlikni saqlash, muhitni qoghdash, sayahet, tenheriket, medeniyet, bilim, ilim, téxnika we bashqimu sahelerde hemkarlishishning köpligen mesililirini muhakime qilip, öz-ara kélishimge keldi.

Mejlis axirida teshkilatqa eza memliketlerning hökümet bashliqliri kéngishining birleshme höjjiti imzalandi. Ularning ammiwi axbarat wasitiliri bilen bolghan uchrishishida bu qétimqi mejlisning netijilik ötkenliki tekitlen'gen idi. Teshkilatqa eza döletlerning hökümet bashliqlirining nöwettiki uchrishishi emdi 2014-yili qazaqistanda ötmekchi.