Yaponiye bash wezir shinzo abé rabiye qadirning mektubini xoshalliq bilen qobul qildi

4 - Ayning 19 - küni yaponiye kagoshima ölkisi taniyama rayonidiki parlamént ezalirini toluqlap saylash saylam pa'aliyitige ishtirak qiliwatqan bash wezir shinzo abé Uyghur milliy herikitining rehbiri rabiye qadir xanimning özige yollighan mektubini xoshalliq bilen qobul qildi.

Hörmetlik radi'o anglighuchilar, yaponiye kagoshima ölkisi taniyama rayonidiki parlamént ezalirini toluqlap saylash saylam teyyarliqining seperwerlik yighilishigha qatnashqan yaponiye bash weziri shinzo abé köpchilikke éhtiram bildürüp, bügünki yighilishqa qimmetlik waqtini serp qilip qedem teshirip qilghan keng xelq ammisigha özining minnetdarliqini bildürgendin kéyin, köpchilik bilen xoshliship meydandin ayrilip kétiwatqanda, yol boyidiki bir top kishilerning: “Bash wezir, Uyghurlargha yardem qiling!” dep ünlük towlighan awazini anglap, derhal qedimini burap ularning aldigha keldi. Bu yerge toplan'ghanlar yene birdek:“Bash wezir! bu, rabiye qadir xanimning sizge yollighan mektubi. Bash wezir! Uyghurlar mesilisini untup qalmang!” dégendek sadalar bilen Uyghur milliy herikitining rehbiri rabiye qadir xanimning mektubini shinzo abégha uzatti. Abé xoshalliq bilen mektubni qoligha élip köpchilikke teshekkür éytti.

Yaponiye bash weziri shinzo abégha rabiye qadir xanimning mektubini tapshurup bergen bu kishiler yaponiye kagoshima xelq'ara uniwérsitétining Uyghur, yapon mutexessislerdin teshkillen'gen Uyghur kishilik hoquq mesilisini qollighuchilar bolup, bu pa'aliyetke qatnashqan mutexessislerdin noriko xanim bügünki pa'aliyet heqqide toxtilip mundaq dédi:

- Bash wezir shinzo abéning mektubni xoshalliq bilen qobul qilishi bu nahayiti yaxshi ish. Men yéqin kelgüside yaponiye hökümiti Uyghur mesilisige köprek köngül bolidu dep oylaymen.

Biz mezkur mektub heqqide toluq uchurlargha ige bolush üchün Uyghur milliy herikitining rehbiri rabiye qadir xanimgha téléfon qilghan bolsaqmu, emma rabiye qadir xanim abége yollan'ghan mektubining peqetla qismen terepliri üstidila toxtilip, tepsiliy mezmunidin söz achmidi we özining néme üchün bu mektubni yollighanliqi heqqide toxtilip mundaq dédi:

- Yaponiye asiyadiki qudiretlik démokratik bir dölet hem ularning biz Uyghurlargha bolghan bir muhebbiti bar. Yapon xelqi Uyghurlarni intayin yaxshi köridu. Xitay bilen köp soda munasiwiti bar. Shuning üchün shinzo abé ependimdin men Uyghur mesilisini aldi bilen asiyaning ichidiki démokratik döletlerning qolgha élishi lazimliqini, biz bilen birlikte dunyagha yetküzelmeywatqan awazimizgha awaz qoshushini telep qildim. Men shinzo abé ependimni, yaponiye hökümitini we yapon xelqini yardemge chaqirdim. Men yaponiye hökümitige Uyghur xelqige köchmenler mesiliside yardem qilishi, sergerdanlarning béshini sélishi, achliqtin ölüwatqan, türmilerde ölüwatqanlarni qutuldurup qilishi heqqide iltimas qildim. Ularni kishilik hoquqi depsende boluwatqan, ölüm jazasigha höküm qiliniwatqan we qoralliq basturuluwatqan Uyghur xelqini ölümdin qutuldurup qilishqa chaqirdim.

Ziyaritimiz jeryanida rabiye qadir xanim bizning:“Siz, bash wezir shinzo abéning Uyghur kishilik hoquq mesiliside xitaygha bésim ishlitishi we shundaqla Uyghurlargha paydiliq bolghan ishlarni qilip bérishige ishinemsiz?” dégen so'allimizgha jawab bérip mundaq dédi:

- Elwette ishinimen. Chünki shinzo abé ependi, birsi Uyghurlarning dosti hem yaponiyede Uyghur dostluq guruppisi uning himayiside quruldi. Uyghur dostluq guruppisining qurulushi uning Uyghur mesilisige köngül bölgenlikini körsitidu. Yaponiye xelqi, yaponiye hökümiti ezeldin bizning mesilimizge köngül bölüwatidu. Yenila asiyadiki bir küchlük dölet bolghan yaponiyening bizning mesilimizge xuddi türkiyege oxshash, amérikigha oxshash köngül bölidighanliqigha men ishinimen.

Yaponiyide tonulghan siyasiy iqtisad penliri mutexessisi kagoshima xelq'ara uniwérsitétining proféssori séjining bizge bildürüshiche, Uyghur milliy herikitining rehbiri rabiye qadir xanimning bash wezir shinzo abégha mektub yollishi, ikkinchi qétimliq bolup, ilgiri 2012 - yili 10 - ayda abé yaponiye erkin démokratlar partiyisining re'islikige saylan'ghanda, rabiye qadir xanim uni tebriklesh yüzisidin Uyghur doppisi we tebrikname yollighan shundaqla 2006 - yili 11 - ayda rabiye qadir xanim yaponiyege tunji qétim alahide teklip bilen Uyghur kishilik hoquq mesilisi heqqide doklat sözleshke kelgende shinzo abé rabiye qadir xanim bilen ayrim söhbetlerde bolghan.

Awaz ulinishidin anglang.