Uyghur yashliri shiwétsiyede igilik tiklimekte

Shiwétsiyege kélip yerleshken Uyghurlar ichide qisqa waqit ichide shiwét tilini pishshiq öginip, her xil kesiplerde xizmet qilish bilen birge, Uyghurlarning tijaret jehettiki artuqchiliqini jari qildurup öz aldigha igilik tiklewatqanlarmu az emes.

Bügün anglighuchilirimizgha tonushturmaqchi bolghan yashlirimizdin abdusalam 2011-yili shiwétsiyege köchmen bolup qobul qilin'ghan. U shiwétsiyege orunlashqandin kéyin, qisqa waqit ichide til ötkilidin ötüp, bir tereptin muqim xizmet qilghach, qandaq qilghanda shiwétsiyede öz aldigha igilik tiklesh heqqide izden'gen.

2016-Yili 9-ayda shiwétsiyening sikutxer rayonida “Erzan” talla bazirini échip tijaret bashlighan. Talla bazirigha her xil kündilik turmush buyumliri, köktat, méwe, halal gösh we yémeklikler sélip, shu rayondiki xéridarlarning qollishigha érishken hemde töt neper Uyghurni  xizmet bilen teminligen.

Biz bu heqte abdusalamni ziyaret qilish üchün, talla bazirigha izdep barduq. U bizning ziyaritimizni xushalliq bilen qobul qilip, talla bazirini échishtiki meqsiti we kéyinki pilanliri heqqide toxtaldi.