Shöhret mutellipof amérikida tunji qétim insan törelme ghol hüjeyrisige tüzitish kirgüzüp netije qazandi

Muxbirimiz ümidwar
2017-07-30
Share
shohret-mutellip.jpg Amérikidiki Uyghur alimi shöhret mutellipof.
Social Media

Amérikidiki Uyghur alimi shöhret mutellipof bashchiliqidiki guruppa amérikida tunji qétim insan törelme ghol hüjeyrisining d n a (DNA), yeni génlirigha qarita tüzitish kirgüzüp  netije qazan'ghan.

"MIT Technology Review" zhurnilidiki melumatlargha qarighanda, amérikining origin shtatidiki saghlamliq we pen uniwérsitétining tetqiqatchisi shöhret mutellipof bashchiliqidiki tetqiqat guruppisi CRISPR dep atalghan yéngi tetqiqat usulidin paydilinip, amérika qoshma shtatlirida tunji qétim insan törelme ghol hüjeyrisining d n a (DNA), yeni génlirini tüzitip chiqqan.

Mezkur maqalide ilgiri sürülüshiche, shöhret mutellipof bashchiliqida qolgha keltürülgen bu yéngi tejribe génétikiliq (irsiyet xaraktérlik) késelliklerning aldini élish üchün génlarni muweppeqiyetlik halda özgertish mumkinlikini körsetken. Lékin, shöhret mutellipof hazirche öz tetqiqat netijisi heqqide izahat bérishni ret qilghan bolup, uning qarishiche, nöwette bu tetqiqat netijisi heqqide mexsus ilmiy maqale teyyarlap élan qilinishi kérek iken.

CRISPR Yéngiche gén özgertish métodi bolup, bu kelgüside génétikiliq, yeni irsiyet késelliklirige taqabil turush we dawalashta muhim rol oynishi mumkin. Metbu'atlarning yézishiche, 2015-yili, xitay irsiyetshunasliri tunji qétim insan törelme ghol hüjeyrisining génlirini özgertish tejribisi élip barghan bolsimu, emma bu tejribide muweppeqiyet we bezi yétersizlikler bolghan. 

Shöhret mutellipof guruppisining amérika qoshma shtatlirida tunji qétim insan törelme ghol hüjeyrisining d n a (DNA) lirigha, yeni génlirigha qarita özgertish kirgüzüp netije qazan'ghanliqidin ibaret insaniyet ilim-pen tarixidiki zor weqe hésablinidighan bu xewer amérika metbu'atliri, jümlidin pütün dunya metbu'atliridiki eng aktip uchurgha aylandi.

Bu, rusiye metbu'atliridimu qiziq nuqtigha aylinish bilen birge shöhret mutellipofning eslide rusiyede ma'arip terbiyisi we tetqiqat tejribisige ige bolup, 1995-yili amérikigha ketkenliki eskertilse, qazaqistan metbu'atlirida uning kélip chiqish jehettin "Esli qazaqistanliq alim" ikenliki eskertildi.

Doktor shöhret mutellipof qazaqistanning almata shehiride Uyghur ziyaliysi a'iliside dunyagha kelgen we ma'arip terbiyisini almata, moskwa qatarliq sheherlerde alghandin kéyin 1995-yili amérikigha kélip özining irsiyetshunasliq tetqiqatlirini dawamlashturghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet