Тәйвән дөләтлик радийо истансиси уйғурлар һәққидә мәхсус программа тәйярлиған

Ихтиярий мухбиримиз һаҗи қутлуқ қадири
2016-03-03
Share
teywen-uyghur-dostluq-jemiyiti-lin-bawxua.jpg Тәйвәндики хитай демократлиридин лин бавхуаниң йетәкчиликидә қурулған уйғур достлуқ җәмийитиниң әзалири пойиз истансисида җим өлтүрүвелиш арқилиқ намайиш қиливатқан көрүнүш. 2014-Йили 11-январ, тәйбей.
Photo: RFA


1 - Март тәйвән дөләтлик радийо истансиси уйғурлар һәққидә мәхсус программа тәйярлиған. Мәзкур программида уйғурларниң тарихий, мәдәнийити һәққидә тохтилиш билән биргә, 2014 - йилидики шәрқий җәнуби асия әллиридә панаһланған уйғур мусапирлар мәсилиси һәққидә сөһбәт елип берилған. Радио сөһбәт программисиға тәйвән уйғур җәмийитиниң рәиси нузугум кодерик иштирак қилған

Тәйвән уйғур җәмийитиниң рәиси нузугум кодерикниң билдүрүшичә, тәйвән дөләтлик радийо истансиси уйғурлар һәққидә мәхсус бир саәтлик программа тәйярлиған.

Бу қетимқи радийо сөһбәт программисиға тәйвән уйғур җәмийитиниң рәиси, уйғур кишилик һоқуқ тәтқиқатчиси нузум кодерик өзи алаһидә тәклип билән қатнашқан.

Радийо программисиниң алдинқи қисимида уйғурларниң тарихий, мәдәнийити вә шундақла йеқинқи заман тарихида қурулған җумһурийәтләр һәққидә сөһбәт елип берилған.

Программиниң кейинки қисмида болса, асаслиқи 2014 - йили вейтнам, тайланд, малайшия қатарлиқ шәрқий җәнуби асия әллиригә панаһланған уйғур мусапирлар мәсилиси җүмлидин тайландтин хитайға қайтурулған уйғурларниң қайтурулуш сәвәблири вә уларниң хитайға қайтурулғандин кейинки тәғдир - қисмәтлири тоғрисида соаллар соралған.

Сөһбәт программисида тәйвән уйғур җәмийитиниң рәиси нузугум кодерик юқириқи мәсилиләр һәққидә соралған соалларға өзи алдин әтраплиқ тәйярлиған материялларға асасән җаваб бәргән.

Шундақла радийо сөһбәт программиси җәрянида, уйғур елиниң сиясий вәзийитидики бир қисим мәсилиләр оттуриға қоюлуп,хитай компартийисиниң уйғурлар үстидин елип бериватқан түрлүк бастуруш сиясәтлириму алаһидә тилға елип өтүлгән.

Нузугум кодерикниң баян қилишичә, тәйвән дөләтлик радийо истансисиниң уйғурлар һәққидә бу хилдики сөһбәт программисини ишлиши йеқиндин буянқи тунҗи иш болуп у,буниңдин толиму тәсирләнгән шундақла буни тәйвәндики ма йиңҗу һөкүмитидин кейин йеңидин тәхткә чиққан демократийә вә илғарлиқ партийисиниң рәһбири, тәйвән йеңи президенти сәй йинвен һакимийитиниң кишилик һоқуқ мәсилилиригә тутқан өзгичә мәйдани дәп қариған.

Японийә уйғур бирлики тәшкилатиниң рәиси доктор турмуһәммәт һашим бу һәқтә зияритимизни қобул қилип,тәйвәндә уйғурлар һәққидә мәхсус радийо программисиниң ишлинишини тәйвәндә елип бериливатқан уйғур кишилик һоқуқ паалийәтлирини тәшвиқ қилиштики яхши башлиниш вә йеңичә қәдәм дәп қарайдиғанлиқини билдүрди.

Доктор турмуһәммәт һашимниң ейтишичә, илгири тәйвәндики милләтчи партийә йәни гоминдаң партийисиниң рәһбири, тәйвән президенти ма йиңҗу бейҗиң билән йеқин мунасивәттә болғанлиқтин, тәйвәндә уйғур кишилик һоқуқ паалийәтлириниң елип берилиши түрлүк тосқунлуқларға учриған шундақла муһаҗирәттики уйғур тәшкилат рәһбәрлириниң тәйвәнгә киришигә йол қоюлмиған.

Зияритимизни қобул қилған японийә кюшу университетиниң пәлсәпә пәнлири тәтқиқатчиси мухтарҗан абдурахман тәйвәндә 1960 - йилидин 1980 - йилларғичә уйғур, хитай тилидин ибарәт икки хил тилда « хантәңри» намлиқ журнал нәшр қилинғанлиқини вә буниңда уйғур әдәбияти, тарихий тоғрисида бәзи мәлуматларниң берилгәнликини илгири сүрди.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.