Teywen döletlik radiyo istansisi Uyghurlar heqqide mexsus programma teyyarlighan

Ixtiyariy muxbirimiz haji qutluq qadiri
2016-03-03
Élxet
Pikir
Share
Print
Teywendiki xitay démokratliridin lin bawxu'aning yétekchilikide qurulghan Uyghur dostluq jem'iyitining ezaliri poyiz istansisida jim öltürüwélish arqiliq namayish qiliwatqan körünüsh. 2014-Yili 11-yanwar, teybéy.
Teywendiki xitay démokratliridin lin bawxu'aning yétekchilikide qurulghan Uyghur dostluq jem'iyitining ezaliri poyiz istansisida jim öltürüwélish arqiliq namayish qiliwatqan körünüsh. 2014-Yili 11-yanwar, teybéy.
Photo: RFA


1 - Mart teywen döletlik radiyo istansisi Uyghurlar heqqide mexsus programma teyyarlighan. Mezkur programmida Uyghurlarning tarixiy, medeniyiti heqqide toxtilish bilen birge, 2014 - yilidiki sherqiy jenubi asiya elliride panahlan'ghan Uyghur musapirlar mesilisi heqqide söhbet élip bérilghan. Radi'o söhbet programmisigha teywen Uyghur jem'iyitining re'isi nuzugum kodérik ishtirak qilghan

Teywen Uyghur jem'iyitining re'isi nuzugum kodérikning bildürüshiche, teywen döletlik radiyo istansisi Uyghurlar heqqide mexsus bir sa'etlik programma teyyarlighan.

Bu qétimqi radiyo söhbet programmisigha teywen Uyghur jem'iyitining re'isi, Uyghur kishilik hoquq tetqiqatchisi nuzum kodérik özi alahide teklip bilen qatnashqan.

Radiyo programmisining aldinqi qisimida Uyghurlarning tarixiy, medeniyiti we shundaqla yéqinqi zaman tarixida qurulghan jumhuriyetler heqqide söhbet élip bérilghan.

Programmining kéyinki qismida bolsa, asasliqi 2014 - yili wéytnam, tayland, malayshiya qatarliq sherqiy jenubi asiya ellirige panahlan'ghan Uyghur musapirlar mesilisi jümlidin taylandtin xitaygha qayturulghan Uyghurlarning qayturulush sewebliri we ularning xitaygha qayturulghandin kéyinki teghdir - qismetliri toghrisida so'allar soralghan.

Söhbet programmisida teywen Uyghur jem'iyitining re'isi nuzugum kodérik yuqiriqi mesililer heqqide soralghan so'allargha özi aldin etrapliq teyyarlighan matériyallargha asasen jawab bergen.

Shundaqla radiyo söhbet programmisi jeryanida, Uyghur élining siyasiy weziyitidiki bir qisim mesililer otturigha qoyulup,xitay kompartiyisining Uyghurlar üstidin élip bériwatqan türlük basturush siyasetlirimu alahide tilgha élip ötülgen.

Nuzugum kodérikning bayan qilishiche, teywen döletlik radiyo istansisining Uyghurlar heqqide bu xildiki söhbet programmisini ishlishi yéqindin buyanqi tunji ish bolup u,buningdin tolimu tesirlen'gen shundaqla buni teywendiki ma yingju hökümitidin kéyin yéngidin textke chiqqan démokratiye we ilgharliq partiyisining rehbiri, teywen yéngi prézidénti sey yinwén hakimiyitining kishilik hoquq mesililirige tutqan özgiche meydani dep qarighan.

Yaponiye Uyghur birliki teshkilatining re'isi doktor turmuhemmet hashim bu heqte ziyaritimizni qobul qilip,teywende Uyghurlar heqqide mexsus radiyo programmisining ishlinishini teywende élip bériliwatqan Uyghur kishilik hoquq pa'aliyetlirini teshwiq qilishtiki yaxshi bashlinish we yéngiche qedem dep qaraydighanliqini bildürdi.

Doktor turmuhemmet hashimning éytishiche, ilgiri teywendiki milletchi partiye yeni gomindang partiyisining rehbiri, teywen prézidénti ma yingju béyjing bilen yéqin munasiwette bolghanliqtin, teywende Uyghur kishilik hoquq pa'aliyetlirining élip bérilishi türlük tosqunluqlargha uchrighan shundaqla muhajirettiki Uyghur teshkilat rehberlirining teywen'ge kirishige yol qoyulmighan.

Ziyaritimizni qobul qilghan yaponiye kyushu uniwérsitétining pelsepe penliri tetqiqatchisi muxtarjan abduraxman teywende 1960 - yilidin 1980 - yillarghiche Uyghur, xitay tilidin ibaret ikki xil tilda " Xantengri" namliq zhurnal neshr qilin'ghanliqini we buningda Uyghur edebiyati, tarixiy toghrisida bezi melumatlarning bérilgenlikini ilgiri sürdi.

Yuqiriqi awaz ulinishidin tepsilatini anglang.

Toluq bet