Билал әрдоғанниң тәшәккүр зияпитигә уйғурларму қатнашти

Явро-асия түрк җәмийәтләр федератсийәсиниң рәиси исмаил җенгиз әпәнди дуня әнәниви тәнһәрикәт конфедратсийәсиниң рәиси билал әрдоған түрк дуняси иҗтимаий тәшкилатлириниң вәкиллиригә тәшәккүр ейтиш йүзисидин бәргән зияпитидә хатирә сүрәттә. 2016-Йили 30-авғуст, истанбул.

30-Авғуст сәйшәнбә күни дуня әнәниви тәнһәрикәт конфедратсийәсиниң рәиси билал әрдоған, 26-28-авғуст арисида истанбулда өткүзүлгән хәлқара түрк дуняси миллий әнәниви тәнһәрикәт вә мәдәнийәт фестивалиға қатнишип алаһидә һәссә қошқан түрк дуняси иҗтимаий тәшкилатлириниң вәкиллиригә тәшәккүр ейтиш йүзисидин зияпәт бәрди. Истанбул күчүкчәкмәҗә һөкүмәт бинасида берилгән зияпәткә түрк дуняси аммиви тәшкилатлириниң вәкиллириму қатнашти. Уйғурларға вакалитән явро-асия түрк җәмийәтләр федератсийәсиниң рәиси исмаил җенгиз билән шәрқий түркистан маарип вә һәмкарлиқ җәмийитиниң вәкили қатнашти.

Паалийәттә билал әрдоған вә күчүкчәкмәҗә шәһәр башлиқи тәмәл қарадеңиз, күчүкчәкмәҗә наһийә һакими һарун қилич қатарлиқлар айрим-айрим сөз қилип, бу паалийәтниң мувәппәқийәтлик өткүзүлүшигә һәссә қошқан түрк дуняси иҗтимаий тәшкилатлириға рәһмәт ейтидиғанлиқини билдүрди.

Күчүкчәкмәҗә шәһәр башлиқи тәмәл қарадеңиз әпәнди, күчүкчәкмәҗә наһийисиниң мушундақ бир муһим паалийәткә саһибханилиқ қилғанлиқидин иптихарлинидиғанлиқини билдүрди.

У, бу паалийәт арқилиқ күчүкчәкмәҗә райониниң түркийә хәлқигә вә түрк дунясиға тонулушта муһим рол ойниғанлиқи, паалийәтниң яхши вә мувәппәқийәтлик өткүзүлгәнлики, шу мунасивәт билән һәрқайси тәшкилатларға, җүмлидин паалийәткә һәссә қошқан шәрқий түркистан маарип вә һәмкарлиқ җәмийити, явро-асия түрк җәмийәтләр федератсийәси қатарлиқ иҗтимаий тәшкилатларға алаһидә рәһмәт ейтидиғанлиқини билдүрди.

Билал әрдоған түркийә җумһурийәт рәиси рәҗәп таййип әрдоғанниң оғли болуп, у дуня әнәниви тәнһәрикәт федератсийәсиниң рәиси болуш сүпити билән йеқиндин буян түрк дунясиға әһмийәт бериватқан шәхсләрниң бири болуп һесаблиниду.

Учришишта билал әрдоған сөз қилип: түрк дунясиниң миллий тәнһәрикәт оюнлирини техиму җанландуруп, миллий тәнһәрикәт оюнлирини түрк хәлқлириниң арисида омумлаштурушқа тиришидиғанлиқини билдүрди. У йәнә, пәрзәнтләргә һәрхил башқа мәдәнийәттики филим вә оюнлирини көрситишниң орниға түрк дунясиниң миллий қәһриманлирини, тарихта өткән батур ата-бовиларниң паалийәтлирини тонуштуруш арқилиқ уларни тоғра вә сап болған бир хил чүшәнчә һәм идийә билән тәрбийиләшкә әһмийәт бериш керәкликини оттуриға қойди.

Билал әрдоған сөзидә йәнә оттура асияни өз ичигә алған районлардики барлиқ түркий хәлқләрниң миллий тәнһәрикәт оюнлирини техиму тәрәққий қилдуруш зөрүрлүки, чүнки, өз миллий өрп-адәт вә мәдәнийитини тонушта, өз-ара чүшиниш вә бирлик һасил қилишта миллий тәнһәрикәт оюнлири интайин муһим әһмийәткә игә икәнликини тәкитлиди.

У сөзиниң давамида йәнә, келәр йили иккинчи қетимлиқ хәлқара түрк дуняси миллий әнәниви тәнһәрикәт паалийитиниң охшашла истанбулда өткүзүлидиғанлиқини, иккинчи қетимлиқ паалийәтниң техиму җанлиқ вә көркәм өткүзүлүши үчүн барлиқ қериндашларниң бирликтә күч чиқирип, өзара һәмкарлишишни үмид қилидиғанлиқини билдүрди.

Паалийәткә қатнашқан һәр қайси җәмийәт вәкиллири бу паалийәтни паал қоллайдиғанлиқи вә һәмкарлишидиғанлиқини ипадиләшти.

Билал әрдоған җәмийәт вәкиллири билән тамақ зияпитидә биргә болди вә кейин улар билән опчи һәм хас һалда хатирә сүрәткә чүшти, ахирида көпчилик билән биргә шам намизини оқуғандин кейин, һәр қайси вәкилләргә бир қанчидин китаб вә түркийәниң миллий мәдәнийити тонуштурулған д в д пластинкилири һәдийә қилинди.

Биз бу учришиш тоғрисида пикир-қарашлирини елиш үчүн бу паалийәтниң өткүзүлүшидә һәмкарлашқан явро-асия түрк җәмийәтлири федератсийәсиниң рәиси исмаил җенгиз вә қазақ түрклири тәлим-тәрбийә вә һәмкарлиқ җәмийити рәиси сәркан денчтүрк билән сөһбәт елип бардуқ.

Исмаил җенгиз бу паалийәткә үч күн ичидә 100 миңдин артуқ кишиниң қатнашқанлиқини, мәзкур паалийәтниң түрк дунясидики түркий хәлқләрниң өзара учришиши вә бир-бириниң мәдәнийәт-тәнһәрикәтлирини тонушта муһим әһмийәткә игә икәнликини билдүрди вә келәр йели буниң 2-қетимлиқини қазақистан һәм башқа түркий җумһурийәтләрдин вәкилләрниң қатнишиши билән техиму җанлиқ бир шәкилдә, чоң өткүзүшкә тиришидиғанлиқини ипадилиди.

Қазақ түрклири тәлим-тәрбийә вә һәмкарлиқ җәмийити рәиси сәркан денчтүрк мундақ деди: “дуня әнәниви тәнһәрикәт конфедерасийәси рәиси билал әрдоған бизни бир тәшәккүр ейтиш зияпитигә тәклип қилди. Бу мунасивәт билән паалийәткә һәссә қошқан пүтүн кишиләр вә җәмийәтләр җәм болди. Бизму шәрқий түркистанлиқ бир қазақ түрклири тәлим-тәрбийә вә һәмкарлиқ җәмийити болуш сүпитимиз билән қатнаштуқ. Билал әрдоған бизгә рәһмәт ейтти вә бу паалийәтни буниңдин кейинки йиллардиму техиму чоң бир тәйярлиқ билән өткүзидиғанлиқини билдүрди. Бизму актипчанлиқ билән қоллап һәмкарлишидиғанлиқимизни билдүрдуқ. Бу, биз үчүн хушаллиқ бир хәвәр иди. Келәр йилқи паалийәттә пүтүн түрк хәлқләрни өз ичигә алған техиму яхши вә чоң түрдә көркәм бир паалийәтниң өткүзүлүшини үмид қилимиз.”