Tokyodiki kishilik hoquq teshkilatliri rabiye qadir xanim sheripige ziyapet berdi

26 - May tokyodiki kishilik hoquq teshkilatliri birlikte yaponiyede ziyarette boluwatqan rabiye qadir xanim sheripige ziyapet bergen.

Ziyapet yaponiye parlamént binasi yénidiki bir réstoranda élip bérilghan bolup, ziyapetke ellik nechche kishi qatnashqan. Pa'aliyet sa'et on birdin sa'et ikkige qeder dawamlashqan.

Yaponiye Uyghur birliki teshkilatidin igilishimizche, yaponiyediki nopuzluq kishilik hoquq teshkilatliridin “Kuritaké asiya munbiri uyushmisi” ning uyushturushi bilen tokyoda pa'aliyet élip bériwatqan kishilik hoquq teshkilatliridin on bir teshkilat birliship dunya Uyghur qurultiyi re'isi rabiye qadir xanimni kütüwélish ziyapiti ötküzgen.

Yaponiye Uyghur birliki teshkilatining re'isi doktor turmuhemmet hashim ziyaritimizni qobul qilip ziyapet heqqide toxtaldi.

Doktor turmuhemmet hashimning bildürüshiche, ziyapette sözge teklip qilin'ghan dunya Uyghur qurultiyi re'isi rabiye qadir xanim nöwettiki Uyghur weziyiti we Uyghur musapirliri mesilisi toghrisida tepsiliy doklat bergendin kéyin, köpchilik Uyghur musapirlirining tolimu qiyin ehwalda qalghanliqigha échin'ghan we xitay kompartiyesining Uyghurlar ustidin yürgüzüwatqan basturush siyasitini tenqidligen.

Rabiye qadir xanim yene ziyapetke ishtirak qilghan bir qisim siyasiyon we karxanichilar bilen ayrim - ayrim söhbetliship nöwette sherqiy jenubi asiya elliri we türkiyede panahliniwatqan Uyghur musapirlirigha ularning maddiy we meniwi jehettin yardemde bolushini telep qilghan.

Ziyapetke rabiye qadir xanimgha hemrah bolup birlikte qatnashqan dunya Uyghur qurultiyi mu'awin re'isi séyit tümtürkmu ziyapette söz qilishqa teklip qilin'ghan bolup, u sözide türkiyediki Uyghur musapirlar mesilisi toghrisida toxtalghan.

Bu qétimqi rabiye qadir xanim bashchiliqidiki dunya Uyghur qurultiyi wekillirining yaponiye ziyaritini teshkilligen doktor turmuhemmet hashimning qarishiche, yaponiyediki kishilik hoquq teshkilatlirining rabiye qadir xanim bashchiliqidiki dunya Uyghur qurultiyi wekilliri bilen bu xil qoyuq munasiwette bolushi, kelgüside yaponiyede élip bérilidighan Uyghur kishilik hoquq pa'aliyetlirige maddiy we meniwi jehettin köp paydiliq iken.

Yuqiriqi awaz ulinishidin tepsilatini anglang.