Tokyo sheher bashliqi islam elliri we türkiye heqqide qilghan tenqidiy sözi üchün epu soridi

Ixtiyariy muxbirimiz qutluq
2013.04.30
Share on WhatsApp
Share on WhatsApp
tokyo-sheher-bashliqi-inose-305.png Tokyoning sheher bashliqi inosé na'uké
Public Domain

Yaponiyide chiqidighan nopuzluq gézitlerdin biri bolghan“Asahi shinbun” gézitining 30 - apréldiki sanida “Inosé islam döletliride hemishe öz - ara urush, jédel bolup turidu - dep oylaydu” mawzuluq maqale élan qilin'ghan. Mezkur maqalide mundaq bayan qilin'ghan:

27 - Aprél “Néw york waqti” gézitining ziyaritini qobul qilghan, tokyoning sheher bashliqi inosé na'uké 2020 - yili ötküzülidighan olimpik tenheriket yighini toghrisida muxbirlarning so'aligha jawab bérip, muxbirlardin özi “Tokyo bilen istanbul, madrid sheherlerni sélishturghanda silerche olimpik tenheriketchilirige qaysi sheher eng yaxshi? elwette, tokyo. Tokyoning asasiy we séstimiliri yaxshi” dep so'al sorap özi jawab bergen. U yene qoshumche qilip “Musulman elliri ala - dégini bilen da'im öz - ara urush, jédel qilip turidu. Ularning jem'iyiti tebiqilerge bölün'gen” dégen. Inoséning sözidin kéyin “Néw york waqti” gézitining muxbirliri: “Sizining bundaq déyishingizdiki meqsitingiz néme?” - dep sorighanda, inosé: “Istanbul olimpik ötküzüshke tallansa elwette bu islam döletlirige tunji qétim olimpik ötküzüsh pursiti bérilgen bolidu. Lékin islam döletlirige olimpikni tunji ötküzüshni bérish shert emes” dégen. Uning bu sözidin kéyin xelqara olimpik tenheriket komitéti we buninggha munasiwetlik kishiler derhal inkas qayturup, inosé xelqara olimpik tenheriket komitétining olimpik ötküzüshke namzatliqqa körsitilgen sheherler öz - ara bir - birini tenqid qilmasliq kérek - dégen, nizamnamisige xilapliq qildi - dep tenqidlen'gen.

Tokyo sheher bashliqi inosé islam dunyasigha we türkiyige qilghan kemsitish sözidin téniwélip, bu so'al sorighuchilarning we terjimanning xataliqi dep turiwalghan bolsimu, biraq “Néw york taymés” géziti derhal inkas bildürüp, “Inoséning sözige biz kapaletlik qilalaymiz” dep jawab bergen.

Yaponiyidiki tor betliridin “Japan deyly préss” ning 29 - apréldiki xewiride inosé “Néw york waqti” gézitining ziyaritini qobul qilghanda türklerning otturiche ömür körüsh yéshining yaponlardin töwenliki, yaponiye medeniyitining yuqiri medeniyet ikenlikinimu alahide tilgha alghanliqi körsitilgen.

Tokyo sheher bashliqining islam elliri we türkiye heqqide qilghan sözi toghrisida toxtalghan yaponiyilik kana xanim bu heqte toxtilip mundaq dédi:

Tokyo sheher bashliqi inoséning sözliri nahayiti kishini xijalet qilidighan sözler. Men uning sözi üchün musulmanlardin, türklerdin epu soraymen. Istanbuldin ibaret musulman dölitidiki bu sheherning olimpik ötküzüshke tallinishini ümid qilimen.

Türkiyidiki Milliyet.com Tor bétining 28 - apréldiki sani élan qilin'ghan “Musulman elliride olimpik yaxshi ötküzülmeydu” dégen serlewhilik maqalide tokyo sheher bashliqi inoséning türkiyige we islam ellirige qilghan eyiblishi toghrisida tepsili toxtlin'ghan. Yaponiyidiki türkiyilik zat refet ependi ziyaritimizni qobul qilip mundaq dédi:

Tokyo sheher bashliqi mesmu we yaki... Bilmidim. Sözliri peqetla gödeklerche qilin'ghan söz. Emma uning sözliri yaponlargha wekillik qilidu dep oylimaymen.

Yaponiyidiki “Maynichi shinbun” gézitining 30 - apréldiki kechlik tor béti xewiride “Sheher bashliqi inosé islam dunyasigha bolghan xata chüshenchisi toghrisida epu soridi” déyilgen.

Yaponiyidiki tor betlirining xewiride bügün etigen sa'et 11 din bir minut ötkende tokyoning sheher bashliqi inosé ishxanisida metbu'atlarning ziyaritini qobul qilip, özining olimpik komitétining qa'idilirige xilap halda söz qilghanliqini, islam ellirige we türkiyige qilghan kemsitish sözliri üchün epu soraydighanliqini bildürdi.

Yaponiye bash weziri shinzo abéning se'udi erebistan, ereb birleshme xelipiliki we türkiyige ziyaret qilish harpisida tokyo sheher bashliqi inoséning islam elliri we türkiye heqqide qilghan bu sözi yaponiyidiki bir qisim yaponlarni endishige saldi. Ular, musulman ellirining yaponiyige bolghan xata qarashlirining shekillinip qilishidin ensirimekte.

Yaponiyidiki tor betliride bu heqte élip bériliwatqan munaziriler toghrisida yaponiyidiki Uyghur ziyaliysi doktor turmuhemmet hashim uchur berdi hem öz köz qarishini otturigha qoydi

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.