Türk parlamént ezasi: “Uyghurlargha maddi we meniwiy jehettin yardem bérimiz”

24 - Iyul küni merkizi qeyseride turushluq sherqiy türkistan medeniyet we hemkarliq jem'iyitige kélip, Uyghurlardin hal sorap, wetendin qéchip kelgen Uyghurlardin ehwal igiligen parlamént ezasi pelin günesh baqir xanim, Uyghurlargha maddi we meniwiy jehettin yardem béridighanliqini jakarlidi.

Xitayning sherqiy türkistanda éghir insan heqliri depsendichiliki élip bériwatqanliqini, uzun yillardin béri sherqiy türkistanliqlarning nopusini azaytish siyasiti élip bériwatqanliqini éytti. Parlamént ezasi qeyseri Uyghur mehellisidiki Uyghurlar bilen élip barghan söhbitide, xitayning Uyghurlargha rehimsizlik bilen bésim élip bériwatqanliqini, bu heqte xelq'ara kechürüm teshkilatining tepsiliy doklat teyyarlighanliqini bayan qilip ötti.

Türkiye parlamént ezasi pelin gündesh baqir xanim, xitay hökümitining Uyghurlargha élip bériwatqan zulum siyasitini axirlashturushi üchün türkiye hökümitining derhal heriketke ötüshi kéreklikini bayan qilip ötti. 24 - Iyul küni aqsham sa'et 8 - 10 - giche dawamlashqan bu ziyaret jeryanida parlamént ezasi pelin günesh baqir xanim, Uyghur diyaridin türkiyege kélip musapir turmushi yashawatqan Uyghurlar bilenmu söhbet élip bérip Uyghur diyarining weziyiti toghrisida melumat igilidi. Bu ziyaret axirlashqandin kéyin neq meydan'gha téléfon qilip parlamént ezasi pelin xanimdin so'al soriduq.

- Siz bügün sherqiy türkistan medeniyet we hemkarliq teshkilatini ziyaret qildingiz, siz hakimiyet béshidiki bir partiyening parlamént ezasi bolush süpitingiz bilen Uyghurlar üchün némelerni qilmaqchi, - dégen su'alimizgha u mundaq jawap berdi:

- Biz Uyghurlargha maddi we meniwiy jehettin yardem bérimiz. Qeyseride köp sanda sherqiy türkistanliq Uyghurlar bar. Bu Uyghurlar türkiyede mal - mülk igisi boluptu. Türkiye bulargha ige chiqiptu. Ige chiqishni dawam qilidu.

- Siz parlamént ezasi bolush süpitingiz bilen Uyghur mesilisini türkiye parlaméntide kün tertipke élip kélemsiz ? - dégen so'alimizgha u mundaq jawab berdi:

- Elwette élip kélimen. Xitaydin kelgen Uyghur a'ililer bar, birdemdin kéyin ular bilenmu uchrishimen. Men yawrupa parlamént ezaliri birlikidimu wezipe ötewatimen. Yawrupa parlamentidiki yighinlardimu xitay hökümitining sherqiy türkistanliq Uyghur qérindashlirimizgha élip bériwatqan bésim siyasitini kün tertipke élip kélimen.