Türk xakkérlar xitayning nurghun tor béketlirige hujum qildi

1923 Türk guruppisining tor béti körünüshi.

Türk xakkérlar xitayning Uyghurlar üstidin yürgüzüwatqan zulum we bésim siyasitige qarshiliq körsitip xitayning nurghun resmiy tor béketlirini buzuwetkenliki ilgiri sürüldi.

Türkiye axbaratlirida türk xakkérlarning xitayning döletlik resmiy torbéketlirige hujum qilghanliqi we bu hujumning sewebi, xitayning Uyghurlar üstidin yürgüzüwatqan qetli'amigha qarshi bir naraziliq herikiti ikenliki bildürüldi.

Dunyada yéqindin buyan xakkérliq qilish yaki tor buzghunchiliqi élip bérish bir jinayet dep qariliwatidu, mushundaq ehwal astida Uyghurlargha hésdashliq qilishni meqset qilghan bir guruppa türk xakkérlar xitayning tor béketlirige hujum qilip, xitay tor betlirige sherqiy türkistan bayriqini chiqarghan we Uyghurlargha zulum qilmasliq toghrisida agahlandurush bergen.

Türkiye ixlas xewer agéntliqining 15-noyabir kündiki xewiride bildürüshiche, “1923 Türk guruppisi” dégen türk xakkérlar guruppisi, xitayning Uyghur diyaridiki qetli'amgha qarshi turush üchün xitayning tor béketlirige hujum qilghan.

Türk xakkérlar sherqiy türkistan bayriqi üstige “Namimiz bir, animiz bir, derdimiz bir, biz büyük türk milliti” dégen xetlerni yézip, xitay tor béketlirining bash sehipiside aptomatik échilidighan qilip chiqarghan. Ular xitayning döletlik resmiy tor béketlirini öz ichige alghan nurghun tor béketlerge hujum qilip buzuwetken bolup, xewerde, bu hujum bilen xitaygha nechche milyon dollar iqtisadiy ziyan bolghanliqi ilgiri sürülgen.

Xakkérlar guruppisi, 1923 türk dégen tor béket arqiliq bu heqte bayanat élan qilghan bolup, bayanatta mundaq déyilgen: “Biz türkler bolush süpitimiz bilen qérindashlirimiz üstidin yürgüzülüwatqan zulum we qetli'amlargha köz yummaymiz. Pütün jinayi qilmishlar jazasiz qalmaydu”.

Özlirini türkiyening mewhum dunyadiki siber mudapi'e küchi dep tonushturghan xakkérler guruppisi 1923 türk 1923turk.com Namliq tor béket arqiliq pa'aliyetlirini anglitip kelmekte. Qilghanlirimiz qilmaqchi bolghanlirimizning teminati, dep chüshenche bergen bu guruppa, buningdin kéyinmu xitay tor béketlirige hujum qilishni dawam qilidighanliqini bildürdi.

Bu uchur türkiyening sitar géziti, ixlas xewer agéntliqi, türkiye géziti, xewer7 tor géziti we qanal a téléwiziye qanili qatarliq chong metbu'atlarda élan qilindi.

Xewerde, türkiyede aq xakkérlar dep tonulghan 1923 türk guruppisi dégen bu xakkérlar Uyghur diyarida yüz bergen zulumlargha süküt qilmidi, déyilgen.

Türklerdin teshkil tapqan bu xakkérlar isim-familisi we ornini mexpiy tutup heriket qiliwatqan bolup, ularning 1923 türk guruppisi namliq resmiy bétide özlirining 2002-yili qurulghanliqini we türklerning mewhum dunyadiki qoghdighuchiliri ikenlikini bildürgen.

1923 Türk guruppisi dégen xakkérlar guruppisi ay yultuz guruppa depmu atilidighan bolup, bu guruppining resmiy tor bétide özlirining 2002-yili qurulghanliqini, resmiy tor bétining www.ayyildiz.org <http://www.ayyildiz.org> Ikenlikini bildürgen. Bu tor bette yézilishiche, ay yultuz guruppisi yéngi zélandiyede qurulghan bolup, türkiye üchün pa'aliyet qilidiken, özlirini atatürkchi, wetenperwer, milletchi dep tonushturghan türk xakkérlar guruppisi iken. Bu guruppining bir qanche tarmiqi bolup ezaliri we guruppa bashliqliri mexpiy iken.

Bu guruppining resmiy tor bétide bügün bu heqte élan qilin'ghan uchurlarda, xitay, biz kelduq, heriket bashlandi, déyilgen we ular teripidin hujumgha uchrighan xitay tor betlirining adrésliri élan qilin'ghan bolup, hujumgha uchrighan tor béketlerdin biri: http://www.zone-h.org Iken.

Ular özlirini türkiyege mewhum dunyadin kélidighan tehditlerdin qoghdash we qayturma hujum qilish üchün toplan'ghan mewhum dunyaning eskerliri dep tonushturghan. Ular 2011-yili intérnét tor dunyasida türkiyege hujum qilghan réd hék we anoniymos dégen xakkérlarning tor betlirige hujum qilghan.

Ay yultuz dep tonulghan 1923 türk guruppisi namliq xakkérlar guruppisi: “Wetenni eng köp söygenlik weten üchün eng köp xizmet qilghandur” dégen sözni özige sho'ar qilghan. Ay yultuz guruppisi toghrisida “Kim bu ay yultuz guruppisi” dégen kitab neshr qilin'ghan.

Xitayning tor béketlirining buzghunchiliqqa uchrishi xitaygha qandaq ziyan salidu, Uyghurlargha qandaq payda élip kélidu? dégen so'allarning jawabigha érishish üchün, türkiyede yashawatqan Uyghur ziyaliy azadjan bughra ependi bilen söhbet élip barduq.

Azadjan bughra ependi, bu pa'aliyetning, Uyghurlar üstidin yürgüzüwatqan bésim we zulum siyasetlirini toxtitish üchün xitaygha bérilgen bir agahlandurush ikenlikini, eger xitay bu xil agahlandurushlargha pisent qilmastin zulum qilishni dawam qilidighan bolsa, naheqchilikke chidimaydighan yashlar teripidin emeliy qarshiliq heriketke uchraydighanliqini bildürdi we bu ish arqiliq türkler Uyghurlargha bolghan hésdashliqini körsetkenlikini, qan-qérindash we tarixiy baghlinishliq bolghan türkler bilen Uyghurlarning munasiwitining téximu yéqinlishishigha paydisi bolidighanliqini ipadilidi.