Xelq'ara türk dunyasi sha'ir, yazghuchi we sen'etchiler uchrishishigha Uyghurlarmu qatnashmaqta

Xelq'ara türk dunyasi sha'ir, yazghuchi we sen'etchiler uchrishishi

Türkiyening antaliya shehiride ötküzülüwatqan xelq'ara türk dunyasi sha'ir, yazghuchi we sen'etchiler uchrishishigha Uyghurlarmu qatnashmaqta. Türkiye yawro - asiya sen'et, medeniyet we edebiyat uyushmisi teripidin 7 - qétimliqi ötküzülgen uchrishishning échilish murasimi 10 - dékabir küni antaliya laradiki klup falkon méhmanxanisining zalida resmiy bashlandi.

Yighinning échilish murasimigha 16 dölettin 30 idare, jem'iyet, 250 etrapida sha'ir, yazghuchi we sen'etchi ishtirak qilghan. Bu uchrishishqa yene türkiy milletlerdin ressam we heykeltirashlarmu ishtirak qilip öz eserlirini körgezme qilmaqta iken.

Yighinning échilish murasimida türkiye yawro - asiya sen'et, medeniyet we edebiyat uyushmisi mes'uli sawash ünal ependi nutuq sözlidi.

Yighinning échilish murasimigha chet'eldin we türkiyening herqaysi jayliridin kelgen sen'etchilerdin bashqa türk parlamént ezaliri, antaliya shehirining mes'ulliridin bolup köp sanda kishi qatnashqan.

Bu pa'aliyetke Uyghur sha'ire nur'ela köktürk xanim bilen Uyghur xewer we tetqiqat merkizi mes'uli hamut köktürk ependimu qatnashqan.

Échilish murasimi axirlashqandin kéyin hamut köktürk ependi radi'omizgha melumat bérip, türkiye medeniyet we sayahet ministirliqining iqtisadiy yardimi bilen chaqirilghan bu yighin'gha ottura asiya türkiy jumhuriyetliri we dunyaning herqaysi döletliridiki türkiy rayonlardin bolup köp sanda sen'etchi, sha'ir we yazghuchilarning kelgenlikini, herqaysi türkiy milletlerning öz - ara chüshinishi we öz - ara hemkarlishishni kücheytish üchün zor ehmiyetke ige ikenlikini bayan qilghanliqini dédi.

U sözide yene,10 - dékabirdin14 - dékabirghiche dawamlishidighan bu uchrishishta türk dunyasining mesililiri muzakire qilin'ghan mexsus yighin chaqirip, türk dunyasining mesililiri toghrisidimu muzakire élip bérilidighanliqini éytti.

Hamut köktürk radi'omizgha bergen melumatida, bu uchrishishta Uyghur sha'ire nur'ela köktürk xanimning Uyghurlar toghrisida yazghan shé'irlirini déklamatsiye qilidighanliqini, özining bolsa “Sherqiy türkistan mesilisi we türk dunyasi” témisida doklat bergenlikini éytti.

Kéyinki yillarda türkiyede ötküzülüwatqan pütün pa'aliyetlerde Uyghur mesilisi otturigha qoyulidighan muhim mesililerdin birige aylandi.