Түркий җумһурийәтләр бирлики йиғинида уйғур мәсилиси тилға елинди

Мухбиримиз әркин тарим
2013-06-21
Share
turk-birliki-yighini-bakuda-305.png Бакуда ечилған түркий җумһурийәтләр бирлики йиғини
RFA/Erkin Tarim

Түркий җумһурийәтләр бирлики чәтәл ишлириға мәсул рәһбәрлири йиғини әзәрбәйҗан пайтәхти баку шәһиридә ахирлашқан болуп, йиғинда уйғур мәсилиси тилға елинди. Йиғин күн тәртипидә уйғур мәсилиси биваситә оттуриға қоюлмиған болсиму, әмма йиғида сөзгә чиққан бир қисим мутәхәссисләр уйғур мәсилисини васитилик шәкилдә оттуриға қойған. Бир күн давамлашқан бу йиғинға 556 киши қатнашти.

Бу һәқтә тохталған доктор әркин әкрәм, уйғур җәмийәтлириниң түркий тиллиқ әлләрдики бир қисим тәшкилатлар биләнму достлуқ мунасивитини күчәйтишиниң интайин муһим әһмийәткә игә икәнликини билдүрди.

Йиғинға түркийә, қазақистан, әзәрбәйҗан вә қирғизистандин һөкүмәт рәһбәрлири вә аммиви тәшкилат мәсуллири қатнашти. Йиғин ахирида 4 дөләтниң мунасивәтлик рәһбәрлири тәрипидин мақулланған бирләшмә баянат елан қилинған.

Йиғин һәққидә бизгә мәлумат бәргән әзәрбәйҗан баку шәһиридә чиқиватқан түркистан гезитиниң баш тәһрири ақил җәмал әпәнди мундақ деди: түркий җумһурийәтләр бирликиниң баш катипи ели ақинҗи әпәнди йиғинниң мувәппәқийәтлик өтүши үчүн ярдәм қилған әзәрбәйҗан һөкүмитигә рәһмәт ейтти. Ели ақинчи нутқида йәнә, совет иттипақи йимирилгәндин кейин түркий җумһурийәтләр оттурисидики мунасивәтни күчәйтиш үчүн көп күч чиқирилғанлиқини, бу дөләтләр оттурисидики мунасивәтни күчәйтиш үчүн чәтәлдики аммиви тәшкилатлар қилишқа тегишлик ишларниң йәнә көп икәнликини баян қилип өтти.

"түркистан гезити" ниң баш тәһрири ақил җәмал әпәнди түркийә, қазақистан, әзәрбәйҗан вә қирғизистан қатарлиқ дөләтләрниң һөкүмәт вә аммиви тәшкилат мәсуллири иштирак қилған бу йиғинда мақулланған баянат һәққидә тохтилип мундақ деди: бу йиғинда, чәтәлдики аммиви тәшкилатларға ярдәм қилиш вә мәзкур тәшкилатлар билән ортақ паалийәтләр уюштуруш, район характерлик тәшкилатларни қуруп чиқиш, түркий җумһурийәтләр карханичилирини бир йәргә җәм қилип йиғин чақириш, дуняниң һәрқайси җайлирида оқуватқан оқуғучиларни тәшкилләп түрк дунясини дуня җамаәтчиликигә тонутуш, чәтәлдә оқуватқан түркий милләт оқуғучилириниң қийинчилиқлирини һәл қилип бериш, дуняда ислам динини қарилайдиған паалийәт вә көз қарашларға қарши паалийәт уюштуруш тоғрисида қарар мақулланди.

Түркий җумһурийәтләр бирликиниң бүгүн баку шәһиридә чақирилған йиғинида түрк дунясиниң мәсилилири һәққидиму музакирә елип берилдиму мәсилән уйғур мәсилиси тилға елиндиму? дегән соалимизға ақил җамал әпәнди мундақ җаваб бәрди: түрк дунясиниң шәрқий түркистан, җәнубий әзәрбәйҗан, кәркук мәсилилири очуқ ашкара тилға елинмиған болсиму, васитилик һалда бу мәсилиләрни чәтәл җамаәтчиликигә аңлитиш мәсилиси тоғрисида йиғинда сөз қилғанлар өз көз қарашлирини оттуриға қоюп өтти.

Бу йиғинға иштирак қилған бакудики "түркистан гезити" ниң баш тәһрири ақил җәмал әпәнди, кейинки йилларда түркийә билән әзәрбәйҗан җумһурийитиниң чәтәлдики қериндашлири билән болған һәмкарлиқини күчәйтишкә алаһидә әһмийәт бериватқанлиқиниң, бу хизмәтниң дуняниң һәр қайси җайлирида паалийәт елип бериватқан шәрқий түркистан аммиви тәшкилатлири үчүнму пайдилиқ икәнликини, уйғурларниңму түрк дунясиниң айрилмас парчиси икәнликини тәкитләп өтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт