Toluq ottura mektep qizliri ayallar bayrimi munasiwiti bilen xitay elchixanisi aldida namayish ötküzdi

8 - Mart dunya ayallar bayrimi munasiwiti bilen enqerediki bir imam xetip toluq ottura mektipining qizliri xitayning türkiye paytexti enqerede turushluq elchixanisi aldida namayish ötküzdi. Ular bu namayishni xitay hökümitining Uyghur xanim - qizlirigha yürgüzüwatqan bésim siyasitige naraziliq bildürüsh üchün ötküzgen. Qollirida ay yultuzluq kök bayraq bilen türkiyening bayriqini kötüriwalghan qizlar “Uyghur xanim - qizlirining hijap kéyishi cheklenmisun, hemmimiz rabiye qadir, sherqiy türkistan'gha erkinlik” dégen'ge oxshash shu'arlar yézilghan lozunkilarni kötürgen namayishchilar xitay elchixanisi aldida axbarat bayanatini oqup ötti.

Namayishqa qatnashqan oqughuchilar namidin buse girenitli'oghlu bayanatni oqup ötti. U, bayanatida dunya xanim - qizlar küni munasiwiti bilen, derd - peryadini dunya jama'etchilikige anglitalmaywatqan musulman Uyghur xanim - qizlirining awazi bolush üchün xitay elchixanisining aldigha toplan'ghanliqi, xitay hökümitining Uyghur xanim - qizlirining hijaplinishi we diniy ibadet qilishining cheklimige uchrighanliqi, Uyghur xanim - qizliriningmu erkin dunyadiki xanim qizlargha oxshash yashishini telep qilidighanliqini tekitlidi.

Oqughuchilargha wakaliten jansu chelik söz qildi. U mundaq dédi:

“Gerche bu yerde rabiye qadir animiz bolmisimu, biz hemmimiz rabiye qadir, biz xitaygha taqabil turalaymiz, chünki biz heqliq. Xitay hökümiti Uyghur xanim - qizlirigha élip bériwatqan zulum siyasitini derhal toxtatsun”.

3 - Ayning 8 - küni dunya ayallar bayrimi munasiwiti bilen Uyghur xanim - qizlirini qollash, xitayning Uyghur xanim - qizlirigha élip bériwatqan bésim siyasitini eyiblesh meqsiti bilen ötküzülgen bu namayishqa enqerediki bezi imam - xetip toluq ottura mektipining oqughuchiliri we oqutquchiliridin bolup 150 etrapida kishi qatnashti.