Түркийә бүйүк бирлик партийәси рәиси мустафа дәстичи хитай әлчиси йү хоңяңни қобул қилди

Мухбиримиз әркин тарим
2015.07.23
turkiye-xitay-mustafa-destichi-we-yu-hongyang.jpg Түркийә бүйүк бирлик партийәси рәиси мустафа дәстичи хитай әлчиси йү хоңяң билән биллә
RFA/Erkin Tarim


Түркийә бүйүк бирлик партийәси рәиси мустафа дәстичи әпәнди 7 - айниң 22 - күни хитайниң әнқәрәдики баш әлчиси йү хоңяңни ишханисида қобул қилди.

Хитай баш әлчиси йү хоңяң билән елип берилған бу учришишқа бүйүк бирлик партийәси мәркизий комитет әзалиридин үзәйир тунч әпәнди, илкәр қаялиоғлу әпәнди вә бүләнт испир әпәндиләрму қатнашти. Хитайниң әнқәрә әлчиси йү хоңяң бу учришишқа хитайниң әнқәрә әлчилики сиясий ишханисиниң мудири ваң фей билән бирликтә кәлди. Бүйүк бирлик партийәси рәиси мустафа дәстичи әпәндиниң ейтишичә, бу учришишни хитай әлчиси йү хоңяң тәләп қилған болуп, учришиш 4 йерим саәт давамлашқан. Бу учришишниң асасий темиси уйғур мәсилиси тоғрисида болған. Хитай әлчиси йү хоңяң уйғурларниң һазирқи вәзийити тоғрисида мәлумат бәргән. Мустафа дәстичи әпәнди болса уйғур районида мәйданға келиватқан һадисиләрдин қаттиқ биарам болуватқанлиқини баян қилған.

Түркийә бүйүк бирлик партийәси рәиси мустафа дәстичи әпәнди райондики уйғурларниң мәсилисини һәл қилиш, уларниң әқәлли һәқ - һоқуқлирини, яшаш әркинликини капаләткә игә қилиш, диний ибадәт әркинликини бериш керәкликини тәкитлигән.

Бүйүк бирлик партийәси рәиси мустафа дәстичи әпәнди, түркләр билән уйғурларниң қериндашлиқ мунасивити тоғрисидиму тарихий җәһәттинму әтраплиқ мәлумат бәргән.

Бу учришишта бүйүк бирлик партийәси рәһбәрлири билән хитай әлчиликиниң мәсуллири оттура шәрқниң болупму сүрийә мәсилиси тоғрисидиму пикир алмаштурған.

Бүйүк бирлик партийәси рәһбәрлириниң ейтишичә хитай әлчиси йү хоңяң бүйүк бирлик партийәси рәһбәрлиридин тәркип тапқан һәйәтни үрүмчигә тәклип қилған.

Түркийәдә уйғур мәсилисиниң күчийишигә әгишип хитай әлчиси йү хоңяңниң һәр қайси шәһәр башлиқлири, аммиви тәшкилат мәсуллири вә сиясий партийәләрниң рәһбәрлири билән учришишидики мәқсәт немә? бу учришишлар арқилиқ хитай муддиасиға йетәләмду? дегәнгә охшаш суалларға җаваб тепиш үчүн түркийә истратегийилик чүшәнчә инистутити түркийә хитай мунасивәтлири мутәхәссиси доктор әркин әкрәм билән сөһбәт елип бардуқ.

Др. Әркин әкрәм әпәнди хитай баш әлчисиниң бу хил зиярәтләрни елип бериштики мәқситиниң хитайниң түркийәдики образини яхшилаш проҗектиниң бир парчиси икәнликини, әмма хитайниң түркийәдә бу җәһәттә мувәппәқийәтлик болалмайдиғанлиқини ейтти.

Др. Әркин әкрәм әпәнди 1 - 2 йилдин бери бүйүк бирлик партийәси тармиқидики алпәрәнләр тәшкилатиниң уйғурлар үчүн актип паалийәт елип бериватқанлиқини, буларниң паалийәтлирини тосуш үчүн бу партийәгә зиярәт елип барғанлиқини илгири сүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.