Türkiye büyük birlik partiyesi re'isi mustafa destichi xitay elchisi yü xongyangni qobul qildi

Muxbirimiz erkin tarim
2015.07.23
turkiye-xitay-mustafa-destichi-we-yu-hongyang.jpg Türkiye büyük birlik partiyesi re'isi mustafa destichi xitay elchisi yü xongyang bilen bille
RFA/Erkin Tarim


Türkiye büyük birlik partiyesi re'isi mustafa destichi ependi 7 - ayning 22 - küni xitayning enqerediki bash elchisi yü xongyangni ishxanisida qobul qildi.

Xitay bash elchisi yü xongyang bilen élip bérilghan bu uchrishishqa büyük birlik partiyesi merkiziy komitét ezaliridin üzeyir tunch ependi, ilker qayali'oghlu ependi we bülent ispir ependilermu qatnashti. Xitayning enqere elchisi yü xongyang bu uchrishishqa xitayning enqere elchiliki siyasiy ishxanisining mudiri wang féy bilen birlikte keldi. Büyük birlik partiyesi re'isi mustafa destichi ependining éytishiche, bu uchrishishni xitay elchisi yü xongyang telep qilghan bolup, uchrishish 4 yérim sa'et dawamlashqan. Bu uchrishishning asasiy témisi Uyghur mesilisi toghrisida bolghan. Xitay elchisi yü xongyang Uyghurlarning hazirqi weziyiti toghrisida melumat bergen. Mustafa destichi ependi bolsa Uyghur rayonida meydan'gha kéliwatqan hadisilerdin qattiq bi'aram boluwatqanliqini bayan qilghan.

Türkiye büyük birlik partiyesi re'isi mustafa destichi ependi rayondiki Uyghurlarning mesilisini hel qilish, ularning eqelli heq - hoquqlirini, yashash erkinlikini kapaletke ige qilish, diniy ibadet erkinlikini bérish kéreklikini tekitligen.

Büyük birlik partiyesi re'isi mustafa destichi ependi, türkler bilen Uyghurlarning qérindashliq munasiwiti toghrisidimu tarixiy jehettinmu etrapliq melumat bergen.

Bu uchrishishta büyük birlik partiyesi rehberliri bilen xitay elchilikining mes'ulliri ottura sherqning bolupmu süriye mesilisi toghrisidimu pikir almashturghan.

Büyük birlik partiyesi rehberlirining éytishiche xitay elchisi yü xongyang büyük birlik partiyesi rehberliridin terkip tapqan hey'etni ürümchige teklip qilghan.

Türkiyede Uyghur mesilisining küchiyishige egiship xitay elchisi yü xongyangning her qaysi sheher bashliqliri, ammiwi teshkilat mes'ulliri we siyasiy partiyelerning rehberliri bilen uchrishishidiki meqset néme? bu uchrishishlar arqiliq xitay muddi'asigha yételemdu? dégen'ge oxshash su'allargha jawab tépish üchün türkiye istratégiyilik chüshenche inistutiti türkiye xitay munasiwetliri mutexessisi doktor erkin ekrem bilen söhbet élip barduq.

Dr. Erkin ekrem ependi xitay bash elchisining bu xil ziyaretlerni élip bérishtiki meqsitining xitayning türkiyediki obrazini yaxshilash projéktining bir parchisi ikenlikini, emma xitayning türkiyede bu jehette muweppeqiyetlik bolalmaydighanliqini éytti.

Dr. Erkin ekrem ependi 1 - 2 yildin béri büyük birlik partiyesi tarmiqidiki alperenler teshkilatining Uyghurlar üchün aktip pa'aliyet élip bériwatqanliqini, bularning pa'aliyetlirini tosush üchün bu partiyege ziyaret élip barghanliqini ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.