Türkiyening enqere shehiri bilen finlandiyedimu “5 - Iyul ürümchi weqesi” ni xatirilesh namayishi ötküzüldi

Finlandiyediki xitay elchixanisining aldidiki namayishtin bir körünüsh

Bügün türkiyening paytexti enqere bilen finlandiyening paytexti xélsinkida ürümchi qirghinchiliqining 5 - yilliqini xatirilesh we xitayning qattiq qolluq siyasitini eyiblesh üchün xitay elchixanisining ishikige qara gülchembirek qoyush, namayish ötküzüsh muxbirlargha bayanat bérish pa'aliyetliri ötküzüldi.

Xitayning enqere gazi'osmanpasha mehelliside turushluq elchixanisida ötküzülgen bu pa'aliyetni türkiyening eng chong ammiwi teshkilatliridin biri bolghan “Ülke ochaqliri” teshkilatining enqere shöbisi uyushturghan bolup, teshkilat mes'uli memet onur qasim bashchiliqidiki 200 kishidin terkib tapqan namayishchi aldi bilen xitay elchixanisining aldigha qara gülchembirek qoydi.

Kéyin namayishchilar “Her yerde Uyghur her yerde qozghilang!”, “Xitaylar sherqiy türkistandin yoqal!”, “5 - Iyul ürümchi qirghinchiliqini untumaymiz!” dégen'ge oxshash sho'arlarni towlashti.

Axirida teshkilat re'isi memet onur qasim ependi muxbirlargha bayanat bérip, 5 - iyul ürümchi qirghinchiliqida hayatidin ayrilip qalghanlarni hörmet bilen esleydighanliqini, xitayning Uyghurlargha élip bériwatqan bésim siyasitini eyiblesh bilen birge türk hökümitini Uyghurlargha ige chiqishqa chaqiridighanliqini éytti.

5 - Iyul küni yene finlandiyening paytexti xélsinkida turushluq xitay elchixanisi aldidimu namayish ötküzüldi. Finlandiye sherqiy türkistan jem'iyiti uyushturghan bu pa'aliyetke finlandiyediki Uyghurlardin bashqa türkiy millet teshkilatlirining mes'ulliri we bezi finlandiyeliklermu ishtirak qilghan.

Finlandiye sherqiy türkistan jem'iyitining mes'uli obul qasim ependi “Eger, xitay Uyghurlargha élip bériwatqan bésim siyasitini toxtatmaydiken, bizmu xitaygha qarshi küresh qilishni hergiz toxtatmaymiz” dédi we namayish toghrisida melumat berdi.