Türkiyede ötküzülgen “Anglang bizning peryadimizni” namliq pa'aliyette 30 ming kishi imza qoydi

Muxbirimiz erkin tarim
2015.07.27
turkiye-imza-toplash-angla-bizning-peryadimizni.jpg Türkiyede ötküzülgen “Anglang bizning peryadimizni” namliq imza toplash pa'aliyti
RFA/Erkin Tarim


Ramizan éyi jeryanida türkiyede Uyghur mesilisining kün tertipidiki birinchi mesilisige aylinishi bilen türkiyediki ammiwi teshkilatlar Uyghurlarning peryadini dunya jama'etchilikige anglitish üchün her xil pa'aliyetlerni bashlatqan idi. Bulardin biri dunya türkistanliqlar teshkilatidur. Bular 6 - ayning 22 - küni “Anglang bizning peryadimizni” mawzuluq imza yighish pa'aliyiti bashlatqan idi. Bir aydin köprek waqitta enqerening merkizidiki abdi ipekchi baghchisi, qizilaydiki güwen baghchisi we ulus meydanida mexsus bölüm échip 30 ming etrapida imza toplighan.

Dunya türkistanliqlar jem'iyitining re'isi abdullah aqyol ependining éytishiche bu qétimqi imza yighIsh pa'aliyitige türk xelqining qiziqishi bek yuqiri bolup, hazirghiche herqaysi siyasiy partiyelerning rehberliri, parlamént ezaliri, her qaysi ammiwi teshkilatlarning mes'ulliri we ammidin bolup 30 ming etrapida kishi qol qoyghan. Uning éytishiche toplan'ghan imzani türkiye hökümiti, birleshken döletler teshkilati we amérika elchilikige béridiken. Axirida türkiye we yawropa insan heq - hoquqliri sotida xitayni sotqa béridiken.

Biz imza yighiwatqan neq meydan'gha bérip, teshkilatning mes'uli abdullah aqyol ependi we Uyghurlarni qollap qol qoyuwatqan kishilerge mikroponimizni uzattuq.

Abdullah aqyol ependi, bu imza yighish pa'aliyitini bashlitishtiki meqsetning xitayning Uyghurlargha élip bériwatqan bésim siyasitini toxtitish, sherqiy türkistanning yer asti we yer üsti bayliqliridin Uyghurlarning behrimen bolushini emelge ashurush, xitay türmiliride yétiwatqan bigunah insanlarning qoyup bérilishini telep qilish, taylandtiki türmilerde turiwatqan Uyghurlarni xitaygha qayturup bermeslikni telep qilishtin ibaret ikenlikini tekitlidi.

Biz qol qoyuwatqan türklergimu mikroponimizni uzattuq. Ular hemme birdek Uyghurlarning hazirqi weziyitige qattiq échiniwatqanliqini ularni qollash üchün qol qoyghanliqini éytishti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.