Türkiyediki siyasiy partiyeler bilen ammiwiy teshkilatlar lükchün weqesi heqqide bayanat élan qildi

Uyghur diyarining lükchün bazirida meydan'gha kelgen weqedin kéyin türkiye büyük birlik partiyesi re'isi mustafa destechi, milletchi heriket partiyesi parlament ezasi özjan yénichéhri we köp sanda ammiwiy teshkilatlar wekilliri lükchünde yöz bergen weqe toghrisida bayanat élan qildi.

Ular bayanatida xitay hökümitining musulman Uyghurlargha qarshi bésim we qirghinchiliq siyasitining dawamlishiwatqanliqini bayan qilghandin kéyin, xitayni lükchün weqesi toghrisida toghra melumat bérishke, qolgha élin'ghan Uyghurlarni qoyup bérishke chaqirdi shundaqla hemme birdek türk hökümitini Uyghurlargha ige chiqishqa chaqirdi. Türkiye büyük birlik partiyesi bashliqi mustafa destichi ependi, 26 - iyul küni muxbirlargha bergen bayanatida, türk we müsulman zémini bolghan sherqiy türkistanda köz yéshi we qan tökülüwatqan we ékispilatatsiye dawamlishiwatqan bügünki künde, dünyadiki herqaysi dölet hökümetliridin “Wijdaninglar, exlaqinglar qeyerde qaldi?” dep soridi. U bayanatta yene mundaq déyilgen:

Türkiye tashqi ishlar ministirliqi xitayning enqerede turushluq bash elchisini ministirliqqa chaqirip lükchünde meydan'gha kelgen weqe heqqide tepsiliy melumat élishi kérek. Xitay hökümitining bu rayonda élip bériwatqan herbiy haletni emeldin qaldurushini, tutup kétilgen Uyghurlarni qoyup bérishni telep qilishi kérek. Sherqiy türkistanda hayatidin ayrilip qalghan Uyghur qérindashlirimizning yatqan yéri jennet bolsun. Dünyadiki pütün Uyghurlargha sewir taqet tileymen.

Milletchi heriket partiyesi parlament ezasi özjan yénichéhri bügün türkiye parlaméntida ötküzgen metbu'at yighinida xitay saqchilirining Uyghurlarni étip ültürgenlikini eyiblidi we türkiye hökümitining Uyghurlar bilen kari bolmaywatqanliqini ilgiri sürdi. Bu bayanatqa köp sanda türk axbarat wasitiliri orun berdi.

Bulardin bashqa, türkiyede pa'aliyet élip bériwatqan sherqiy türkistan ma'arip we hemkarliq jem'iyiti bashliqi hidayetullah oghuzxan ependi we hazir türkiyede yighin'gha qatnishiwatqan dünyaning herqaysi jayliridin kelgen sherqiy türkistan ammiwiy teshkilatlirining mes'ulliri radi'omizgha bayanat bérip xitayning 26 - iyul lükchün weqesi heqqide toghra melumat bérishke, Uyghurlargha élip bériwatqan bésim siyasitini toxtitishqa, weqede tutup kétilgen Uyghurlarni derhal qoyup bérishke chaqirdi. Shundaqla dünya döletlirini xitaygha bésim ishlitishke chaqirdi.

26 - Iyun seherde turpan wilayitining pichan nahiyisi lükchün bazirida, ammining saqchixana we yerlik hökümet binasi shundaqla qurulush ornigha hujum qilish weqesi yüz bérip 27 adem qaza qilghanliqi türk metbu'atliridimu orun aldi.