Türkiyediki sherqiy türkistan ammiwi teshkilatliri “Démokratiye nöwiti” namayishigha aktip qatnashmaqta

Muxbirimiz erkin tarim
2016-07-24
Share
turkiye-herbiy-ozgirishke-qarshi-namayish-maarip-hemkarliq-teshkilati-rehberliri.jpg Türkiye armiyesining herbiy özgertish urunishigha qarshi namayishqa qatnishiwatqan “Sherqiy türkistan ma'arip we hemkarliq teshkilati” rehberliri
RFA/Erkin Tarim


15 - Iyul küni türkiye armiyesi ichidiki bir ochum qomandan we herbiy türkiye hökümitige qarshi herbiy özgirish élip bérishqa urun'ghanda, türkiye dölet re'isi rejep tayyip erdoghan démokratik tüzümni qoral küchi bilen aghdurup tashlashqa urunuwatqan kishilerge qarshi xelqni kochigha chiqishqa chaqirghan idi. Türk xelqi chong - kichik démestin kochilargha chiqip, herbiy özgirishke qatnashqan tankilarning aldigha yétip herbiy hakimiyetni xalimaydighanliqini, démokratik tüzümni xalaydighanliqini jakarlighan idi. Bu pa'aliyetning ismini “Démokratiye nöwiti” qoyghan idi.

Bu pa'aliyetke sherqiy türkistan ammiwi teshkilatliri we bezi Uyghurlarmu aktip ishtirak qilmaqta. 15 - Iyul küni axsham bezi Uyghurlar tankilarning aldida turup tosqan bolsa, yene bezi Uyghurlar namayishqa kelgen ademlerge su tarqitip bergen. Türkiyede aktip pa'aliyet élip bériwatqan sherqiy türkistan medeniyet we hemkarliq teshkilati bilen sherqiy türkistan ma'arip we hemkarliq teshkilati her küni dégüdek türk ammiwi teshkilatliri bilen birlikte démokratiye nöwitige turush pa'aliyitige qatnashmaqta.

Qeyseridiki namayishlar
Qeyseridiki namayishlar
RFA/Erkin

Istanbulda pa'aliyet élip bériwatqan “Sherqiy türkistan ma'arip we hemkarliq teshkilati” re'isi hidayetullah oghuzxan istanbulda 15 - iyul küni herbiy özgirish bolghanliqini anglapla bir guruppa Uyghurning istanbul atatürk ayrodromigha barghanliqini bayan qildi.

Qeyseride pa'aliyet élip bériwatqan “Sherqiy türkistan medeniyet we hemkarliq jem'iyiti” re'isi séyit tümtürk ependi qeyserige burun kelgen Uyghurlar bilen 2014 - 2015 - yilliri malayshiya we tayland arqiliq türkiyege kelgen Uyghurlarning 15 - iyuldin bügün'giche qeyseri xelqi bilen birlikte qeyseri meydanida “Démokratiyige ige chiqish, türkiyege ige chiqish pa'aliyiti” ge qatnishiwatqanliqini dédi.

Hidayetullah oghuzxan ependi 7 - ayning 21 - küni sherqiy türkistan medeniyet we hemkarliq jem'iyiti bolush süpiti bilen türk ammiwi teshkilatliri bilen birlikte “Herbiy özgirishke, diktatoriliqqa qarshi turush pa'aliyiti” ge qatnashqanliqini bayan qildi.

Séyit tümtürk ependi 1980 - yili herbiy özgirish bilen hakimiyet béshigha kelgen hökümetning tunji ziyaritini xitaygha élip barghanliqini, sherqiy türkistan ammiwi teshkilatlirining pa'aliyitini chekligenlikini, herbiy özgirish ghelibe qilghan bolsa sherqiy türkistan dewasining zor zerbige uchraydighanliqini tekitlidi.
Qeyseridiki namayishlar
Melum bolushiche, eyni yili türkiye herbiy hökümiti hamut köktürk, xeyrulla efendigil, mehmet jantürk, abduweli efendigil qatarliq Uyghur pa'aliyetchilerni qolgha alghan iken.

Hidayetullah oghuzxan ependi diktator tüzümining dunyadiki ilghar qimmet qarashlargha qarshi ikenlikini, shunga chet'eldiki sherqiy türkistan teshkilatlirighimu ziyan élip kélidighanliqining bilinip turidighanliqini bayan qildi.

15 - Iyul küni türkiye armiyesi ichidiki bir guruppa esker hökümetke qarshi herbiy özgirishke urunup meghlup bolghan idi. Bu weqede 144 kishi ölgen, on minggha yéqin kishi tutuqlan'ghan idi. Hazir tutuqlan'ghan kishiler sotlanmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet