Türkiye bash ministiri ehmet dawut'oghlu: enqerediki térrorluq hujumini süriyelik élip barghan

Muxbirimiz erkin tarim
2016-02-18
Share
turkiye-partlash-salih-neccar-nejjar.jpg 17 - Yanwar künidiki enqere partlash weqesidiki gumandar salih nejjar
RFA/Erkin Tarim

17 - Yanwar küni türkiyening paytexti enqerening merkizige jaylashqan türkiye armiyesi bash shtabi binasi, hawa armiyesi qomandanliqi we quruqluq armiyesi bash qomandanliqi jaylashqan yolda kétiwétip qizil chiraghda turghan 5 herbiy aptomobilning del otturisigha kirgen bomba qachilan'ghan aptomobil térrorchilar teripidin partlitildi. Weqede 27 herbiy, 1 puqra öldi. Türkiye bash ministiri ehmet dawut'oghlu türkiye armiyesi bash shtabida mezkur weqe toghrisida bayanat bérip, mezkur hujumni qilghan térrorchining süriyelik salih nejjar ikenlikini ashkarilidi.

U mundaq dédi: "Bügün igiligen melumatlargha asaslinip turup, bu hujumni türkiyediki térror teshkilati ezaliri bilen süriyedin kelgen y p g térror teshkilatigha eza birining qilghanliqi éniqlandi. Özini öltürüwélish hujumini qilghan salih nejjar isimlik, amuda 1992 - yili tughulghan. Amud süriyening shimalidiki bir sheher. Térrorluq hujumni y p g teshkilatining qilghanliqi éniq otturigha chiqirildi. Jama'et xewpsizlik xadimlirimizning tang atqiche élip barghan mezkur enzini éniqlash xizmiti netijiside 9 kishi qolgha élindi, bu hujum bilen munasiwiti bolghan pütün kishiler otturigha chiqirilip sotqa chiqirilidu. Dölitimiz ichidiki p k k térror teshkilati bilen süriyening shimalidiki esed hakimiyiti bilen til biriktürüp kéliwatqan y p g teshkilatining dölitimizge qarshi heriket élip bériwatqanliqi éniq boldi."

Türkiye bash ministiri ehmet dawut'oghlu türkiyening etrapining muqimsiz döletler bilen tolghanliqini bayan qilip mundaq dédi: "Qimmetlik xelqimge shuni chaqiriq qilimenki, türkiye hazir murekkep bir yerde. Türkiyening etrapida muqimsiz 6 - 7 dölet mewjut. Biqinimizda süriye bilen iraq, shimalimizda ukra'ina, tünügün dölitimizge ziyaretke kelgen yemen, liwiye we liwan qatarliq döletlerning zéminining bir qismi hökümetlirining bashqurushi astida emes. Bular dölitimizge xewp élip kelmekte. Bularning dölitimizning muqimliqigha, xelqimizning bixeterlikige selbiy tesir körsetmesliki üchün küch chiqiriwatimiz."

U bayanatining axirida dunya döletlirige chaqiriq qilip mundaq dédi: "Axirqi chaqiriqim shu, y p g térror teshkilati tünügünki hujumi arqiliq p k k bölgünchi térror teshkilati bilen birlikte türkiyening düshmini ikenlikini yene bir qétim otturigha qoydi. Bizning ittipaqdash döletlirimizge we bashqa térrorgha qarshi küresh qiliwatqan döletlerningmu bu térror teshkilatigha bolghan pozitsiyisini éniq otturigha qoyushini telep qilimiz. Türkiyening düshmini bolghan bu teshkilatlarni biwasite we wasitilik halda qollighan döletler biz bilen bolghan dostluqini yoqitip qoyushi mumkin. Paytextimizge térror hujumi élip barghan bundaq teshkilatlarni kechürüshimiz mumkin emes. Men türkiye armiyesi bash shtabigha sewr tileymen."

Bir muxbirning "Türkiyening paytexti enqerede élip bérilghan térrorluq hujumda 28 kishi qaza tapti, 61 kishi yaridar boldi. Buni süriyening shimalidiki p y d térror teshkilatining qilghanliqini dédingiz, süriyening shimaligha herbiy hujum élip barmaqchimu ?" dégen so'aligha ehmet dawut'oghlu mundaq jawab berdi: "Tünügün kech 9 yérimdin tartip haftanin etrapida bölgünchi térror teshkilatining lagérlirigha qarita herbiy heriket élip barduq. Bu yerde 70 etrapida térrorchi öltürüldi. Bu shimaliy iraqta élip bérildi. Süriyediki y p g térror teshkilati we esed hökümiti armiyesige qarshi top oqi étishimiz dawamlishiwatidu. Dölitimizning zéminigha kim tajawuz qilsa, uninggha qarshi turushni dawam qilimiz."

Bash ministir ehmet dawut'oghlu bu qétimqi térrorluq hujumni süriyelik p y d ezasi bilen p k k dep atalghan kort qoralliq küchlirining qilghanliqini, bularni térror teshkilati démigen döletler bilen türkiyening dost bolalmaydighanliqini tekitlidi. Amérika we yawropa döletlirige oxshash nurghun döletler p k k ni térror teshkilati dep élan qilghan bolsimu, xitay döliti p k k ni téxighiche térror teshkilati démigen. Bu heqte ziyaritimizni qobul qilghan doktor erkin ekrem ependi, türkiye sherqiy türkistan islam herikitini térror tizimlikke kirgüzgen bolsimu, xitayning ular bilen munasiwiti barliqini bayan qildi.

Türkiye istratégiyelik chüshenche instituti mutexessisi doktor erkin ekrem ependi xitayning bu teshkilatni térror teshkilati dep élan qilmasliqidiki seweb toghrisida toxtalghinida, xitayning kort we süriye siyasitining türk, xitay munasiwitige selbiy tesir körsitidighanliqini ilgiri sürdi.

17 - Yanwar künidiki weqe yüz bérip uzun ötmey, amérika qoshma shtatliri bashchiliqida nurghun dölet rehberliri türkiye jumhur re'isi erdoghan'gha téléfon qilip hal sorighan we térrorni eyibligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet