Türkiyede taylandtiki Uyghurlar heqqidiki pa'aliyetler dawamlashmaqta

Muxbirimiz erkin tarim
2014.12.31
turkiye-tayland-uyghur-namayish-7.jpg Türkiyede boliwatqan taylandtiki Uyghurlar heqqidiki pa'aliyetlerdin bir körünüsh
RFA/Erkin Tarim


Türkiyediki ammiwiy teshkilatlar taylandtiki 300 Uyghurni türkiyege élip kélishni telep qilip, her xil pa'aliyetlerni oyushturmaqta. 12 - Ayning 27 - küni türkiye doghan xewer agéntliqi tayland hökümitining 300 Uyghurni xitaygha qayturup bérishni qarar qilghanliqi toghrisidiki xewerni ilan qilghandin kéyin, türkiyediki ammiwiy teshkilatlar türkiyening herqaysi wilayetliride arqa - arqidin namayish, muxbirlargha bayanat bérish we qol qoyush pa'aliyetliri ötküzüp, türk hökümitini taylandtiki 300 Uyghurni türkiyege élip kélishke chaqirmaqta.

26 - Dékabir küni türkiyening ottura rayonigha jaylashqan chorum shehiri türk ojaqliri teshkilati “Taylandtiki 300 Uyghur türkiye élip kélinsun” témisida xelqtin imza yighish pa'aliyiti ötküzdi. 12 - Ayning 28 - küni bolsa türkiyening ottura rayonigha jaylashqan chanqiri wilayitidiki qara tekin uniwérsitéti türk dunyasi tetqiqati oqughuchilar oyushmisi sheher merkizidiki chong meydanda muxbirlargha bayanat bérish pa'aliyiti ötküzdi. Mezkur pa'aliyetke chanqiri qaratekin uniwérsitétining oqutquchi - oqughuchiliri, ammiwiy teshkilat mes'ulliri, bezi siyasiy partiyelerning mes'ulliri we muxbirlardin bolup 300 etrapida kishi qatnashti. Pa'aliyetni oyushturghan oqughuchilar oyushmisining mes'ulliri we ezaliri qollirida ayyultuzluq kök bayraq we her xil luzunkilarni kötürgen halda meydanda turushti. Béshigha kök renglik romal salghan oqughuchilar oyushmisining re'isi dilara chaghlar xanim muxbirlargha bayanat berdi.

U, aldi bilen bügünki yighilishtiki meqsiti toghrisida toxtilip mundaq dédi:

- Taylandtiki Uyghur türklirini qollaydighanliqimizni ipadilesh üchün bügün bu yerge jem bolduq. Xitayning bésimidin qéchip taylandgha kelgen 300 Uyghurning ehwali künsayin nacharlashmaqta. Uyghurlar bir tereptin késellik we maddiy qéyinchiliqlargha duchar boluwatqan bolsa, yene bir tereptin xitaygha qayturulush xewpi astida turmaqta. Biz chanqiri qaratekin uniwérsitéti türk dunyasi oqughuchilar oyushmisi bolush süpitimiz bilen bu 300 Uyghurning türkiyege élip kélishni telep qilip qol qoyush dolquni qozghighan iduq. Bu dolqun'gha xelqimiz aktipchanliq bilen qatnashmaqta, qol qoyghanlarning sani wilayitimizde on minglargha, türkiye boyiche yüz minglargha yetti.

Dilara chaghlar xanim taylanddiki 300 Uyghur xitaygha qayturiwétilip qalsa, buninggha süküt qilip turghanlar bu jinayetning jawapkari bolidighanliqini bayan qilip mundaq dédi:

Kéyinki künlerde türkiyediki bezi gézitlarda, bu Uyghurlarning kimlikliri éniqlinip, xitaygha qayturulidighanliqi qarar qilin'ghanliqi toghrisida xewerler ilan qilinmaqta. Xitayning bu qilghanlirigha qarita ünini chiqarmay, bu Uyghurlarning xitaygha qayturulishigha qarap turghan kishiler bolsa, bu jinayettin jawabkar bolidu. Biz chanqiri qaratékin uniwérsitéti türk dunyasi oqughuchilar oyushmisi bolush süpitimiz bilen türk hökümitining taylandtiki 300 Uyghurni baldurraq türkiyege élip kélishini telep qilimiz.

Qimmetlik radi'o anglighuchilar 27 - dékabir küni türkiyening ottura rayonigha jaylashqan chorum wilayitining chorum shehiride türk ojaqliri teshkilatining oyushturushi bilen “300 Uyghur türkiyege élip kélinsun” mawzuluq imza yighish pa'aliyiti ötküzüldi. Bu pa'aliyetke türk ojaqliri teshkilati chorum shöbisining bashliqi yawuz ünlü we bashqa ammiwiy teshkilat, siyasiy partiyening rayon mes'ulliri we xelqtin bolup köp sanda kishi awaz qoshqan.

Bu pa'aliyetning oyushturghan yawuz ünlü ependi Uyghur qérindashlirini qollap quwetleydighanliqimizni ipadilesh üchün bu pa'aliyetni oyushturghanliqini bayan qilip mundaq dédi:

- Biz ötken hepte shenbe küni bu pa'aliyetni ötküzduq. Biz türk ojaqliri teshkilati bolush süpitimiz bilen Uyghur qérindashlirimizni qollap quwetleydighanliqimizni ipadilesh üchün bu pa'aliyetni ötküzduq. Uyghurlargha yardem qilish bizning hem milliy we diniy burchimiz. Wilayitimizde sherqiy türkistan mesilisi taza yaxshi bilinip ketmisimu, shenbe künidiki pa'aliyitimizge nurghun kishi awaz qoshup qol qoydi.

Hazir taylandta turuwatqan 300 Uyghurni türkiyege élip kélish mesilisi türkiyening eng chong mesililiridin birige aylandi. Türkiyening 81 wilayitide shöbisi bar, türkiyening eng chong ammiwiy teshkilatliridin biri bolghan ülkü ojaqliri ma'arip we hemkarliq fondi bir ay burun taylandtiki Uyghurlarni türkiyege élip kélish üchün jama'et pikri toplash üchün qol qoyush pa'aliyiti bashlatqan idi. Mutexessislerning éytishiche, bu arqiliq türk xelqi arisida 300 Uyghurni türkiyege élip kélish üchün jama'et pikri peyda qilinip, türkiyening küntertipide bolsa hökümetke bésim peyda bolup, ularning resmiyiti tézlishidiken. Ülkü ojaqliri ma'arip we hemkarliq fondi re'isi oljay kilawuz ependining éytishiche, bu pa'aliyet hazirghiche 45 wilayetke yéyilghan bolup, yüz minglighan kishi qeghezge qol qoyghan, bu pa'aliyetke 5 - 6 milyon kishining awaz qoshidighanliqi perez qilinmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.