Türkiye bash ministiri erdoghan: “Minglighan Uyghurni ölümdin qutuldurduq”

Türkiye bash ministiri rejep tayyip erdoghan hazirghiche minglighan Uyghurni türkiye puqraliqigha élish arqiliq ölümdin qutuldurghanliqini éytti.

Türkiye adalet we tereqqiyat partiyesi re'isi rejep tayyip erdoghan partiyesining 18 - aprél küni ötküzülgen kéngeytilgen yighinida, partiyesining her derijilik rehberlirige qilghan nutqida, öktichi partiye we bashqa bezi guruhlarning ötkenki saylamda partiyesige hujum qilghanliqini, ularning meqsitining xelq rayini 30% astigha chüshürüsh ikenlikini éytti.

Türkiye bash ministiri rejep tayyip erdoghan, bashqilarning, hökümet Uyghur türklirige ige chiqmidi dégen so'aligha jawab bérip, hazirghiche minglighan Uyghurgha puqraliq bérish arqiliq ölümdin qutuldurghanliqini bayan qilip mundaq dédi:

- Dölitimizge kélip panahliq tiligen Uyghur türklirige ige chiqtuq. Ötkende ayrodromda 18 kün saqlap qalghan Uyghurlargha ige chiqmidinglar dep bizni eyiblidi. Axirida qandaq boldi? kim bularni türkiyege qobul qildi? biz qobul qilduq. Sen m h p lidiri bolush süpiting bilen néme qilalaysen? bular bizning ishimiz, Uyghurlarni yene biz puqraliqqa alduq.

Türkiye bash ministiri rejep tayyip erdoghanning 18 - aprél küni partiyesining kéngeytilgen yighinida qilghan bu nutqi türkiyediki pütün téléwiziye qanalliri teripidin neq meydandin tarqitildi.

Türkiye bash ministiri rejep tayyip erdoghanning bu sözi Uyghurlarni bekla xursen qildi. Erdoghan dégendek adalet we tereqqiyat partiyesi hökümiti rastinla minglighan Uyghurni ölümdin qutuldurdimu? Uyghurlar türkiye hökümitidin yene némilerni kütidu? dégen'ge oxshash so'allargha jawab tépish üchün türkiyediki sherqiy türkistan ammiwiy teshkilatlirining mes'ulliri bilen söhbet élip barduq.

Ularning hemmisi birdek, sherqiy türkistan mesilisining türkiyening ichki siyasitidimu orun alghanliqini, buning Uyghurlar üchün paydiliq ikenlikini dédi.