Türkiyening “23 - April balilar bayrimi”gha Uyghur perzenti mujahit qatnashti

23 - Aprél küni türkiyening eng chong bayramliridin biri bolghan milli musteqilliq we balilar bayrimi. Bu bayramgha yawropa döletliri, ottura asiya türkiy jumhuriyetliri, ottura sherq ereb döletliri, balqan, kafkazye döletliri, rusiye fédératsiyesi we xitay qatarliq 30 etrapida dölettin köp sanda balilar qatnashmaqta.

Uyghurlargha wakaliten 6 yashliq kichik mujahit qeshqerli türkiyening dölet téléwiziyesi bolghan t r t awaz qaniligha chiqip pütün balilarning bayrimini tebriklidi we shé'ir déklamatsiye qildi shundaqla istanbul qeyseri qatarliq sheherlerdiki Uyghur balilarmu balilar bayrimini tentenilik ötküzmekte.

Türkiye jumhuriyetining qurghuchisi mustafa kemal atatürk, azadliq urushi mezgilide yétim qalghan balilarni söyündürüsh meqsiti bilen 23 - aprél küni chong murasim ötküzgen bolup, bu künni 1923 - yili balilar bayrimi dep élan qilghan iken.

Türkiye hökümiti 1923 - yili, 23 - aprél küni türkiye parlaménti qurulghan bolghachqa bu bayramning namini milli musteqilliq we balilar bayrimi dep atighan iken. 1979 - Yili birleshken döletler teshkilati pen - medeniyet ma'arip komitétining testiqlishi bilen xelq'araliq balilar bayrimi dep élan qilin'ghan. 1979 - Yilidin béri türkiye jumhuriyeti nurghun dölettin balilarni türkiyege ekilip tentenilik halda bu bayramni ötküzmekte. Bu küni türkiyediki balilar bir qanche minut dölet re'isi, bash ministir, ministir we walilarning orunduqigha olturup ministir bolup muxbirlarning so'allirigha jawab béridu.

Türkiyediki Uyghur ösmürler bu bayramni qandaq ötküzdi?

1991 - Yili sabiq xitay xelq qurultiyi re'isi seypidin eziz bu bayramgha qatnashqanda türkiye hökümiti Uyghur balilarni ewetishni telep qilghan bolsimu hazirghiche Uyghur balilar qatnishalmidi. Bu boshluqni 6 yashliq mujahit qeshqerli toldurdi. Uyghur diyaridin yéngi kelgen fatima xanim bu bayram munasiwiti bilen élip barghan söhbitimizde xitay hökümitining Uyghur bowaqlarni anisining qosiqidila öltüriwatqanliqi, ularning bayram qilish hoquqinila emes, yashash hoquqinimu tartiwéliwatqanliqini éytti.

Uyghur ziyaliysi mirkamil qeshqerli bolsa Uyghur diyaridiki Uyghur balilar qatnishalmighan bu bayramgha balisining qatniship Uyghurlarni tonutqanliqi üchün özini bekla bexitlik hés qiliwatqanliqini bayan qildi.