Türkiyede yilqichida yüz bergen weqe munasiwiti bilen axbarat élan qilish yighini ötküzüldi

D u q mu'awin re'isi séyit tumtürk muxbirlargha söz qiliwatqan körünüsh. 2013-Yili 28-awghust, türkiye.

28-Awghust charshenbe küni, merkizi qeysirige jaylashqan sherqiy türkistan medeniyet we hemkarliq jem'iyitining uyushturushi bilen qaghiliqning yilqichi yézisida yüz bergen we 22 Uyghurning ölümi bilen axirlashqan qanliq weqege qarshi axbarat élan qilish yighini ötküzüldi. Yighin'gha türkiyening köp sanda téléwiziye qanalliri we gézit muxbirliri qatnashti.

Yighinda dunya Uyghur qurultiyining mu'awin re'isi séyit tumtürk ependi söz qildi we yilqichi yézida yüz bergen weqeni qanliq basturghan xitay kommunist hakimiyitini eyiblidi hemde buninggha süküt qilip turuwatqan b d t, yawropa ittipaqi, islam hemkarliq teshkilati qatarliq teshkilatlarni tenqid qildi.

Séyit tumtürk ependi, aldi bilen weqe toghrisida toxtilip, xitayning diniy pa'aliyet qilish üchün yighilghan bir guruppa Uyghur yashlarni, héchqandaq tekshürmestinla térrorchi dégen nam bilen sewebsiz oqqa tutqanliqini, netijide 26 Uyghurning shéhit bolghanliqini bildürdi.

Erkin asiya radi'osi qaghiliqning yilqichi yézisida 22 Uyghurning xitay eskerliri teripidin étip öltürgenliki toghrisida xewer tarqatqandin kéyin, bu xewer pütün dunyadiki axbaratlarda neqil qilinip tarqitildi. Shu jümlidin, qaghiliqning yilqichi yézisida yüz bergen we 22 Uyghurning ölümi bilen axirlashqan qanliq weqe toghrisida bügün türkiyening chong gézitliride xewer tarqitildi. Türkiyening yéngi shafaq géziti bu weqe toghrisida, “Qur'an kursigha barghanliqi üchün qetli qilindi” dégen témida xewer tarqatti we 28 neper Uyghur teklimakan chölining wadilirida qur'an dersi oqughanliqi üchün, xitay ishghalchi küchliri teripidin oqqa tutulup öltürüldi, déyildi.

Doghan xewer agéntliqi, sherqiy türkistanda 15 kishi öltürüldi, dégen témida uchur tarqatti. Dunya bulteni, sherqiy türkistan xewer qatarliq tor géziti, xeber7 tor gézitliri “Sherqiy türkistanda yéngi qetli'am yüz berdi, 22 Uyghur shéhit boldi” dégen témida uchur tarqatti.

Qeysiride ötküzülgen axbarat élan qilish yighini toghrisida shundaqla qaghiliqning yilqichi yézisida yüz bergen qanliq weqe toghrisida, dunya Uyghur qurultiyining mu'awin re'isi séyit tumtürk ependi bilen söhbet élip barduq.

Séyit tumtürk ependi, süriye we misirda yüz bériwatqan zulum we qetli'am oxshashla xitay hakimiyiti teripidin sherqiy türkistanda ishliniwatqanliqini, shuning üchün xitay süriye we misir diktator hakimiyitini qollawatqanliqini bildürdi we b d t, yawropa ittipaqi, islam hemkarliq teshkilati qatarliq xelq'araliq teshkilatlarni yilqichida yüz bergen qetli'am üstidin tekshürüsh élip bérishqa chaqiriq qildi.