“300уйғур түрки түркийигә кәлтүрүлсун!” намидики имза топлаш паалийити давамлашмақта

Ихтиярий мухбиримиз арслан
2014.12.26
qeyseri-shehride-imza-toplash-paaliyiti.jpg Үлкү оҗақлири тәшкилати тәрипидин тайландтики уйғурларни түркийигә кәлтүрүш үчүн башлитилған имза топлаш паалийити
RFA/Arslan


Түркийиниң әң чоң тәшкилатлиридин бири болған үлкү оҗақлири тәшкилати тәрипидин тайландта тутуп турулуватқан 300 уйғурни түркийигә кәлтүрүш үчүн башлитилған имза топлаш паалийити түркийиниң һәр қайси шәһәр вә районлирида давам қиливатиду.

Түркийиниң әң чоң аммивий тәшкилатлиридин бири болған үлкү оҗақлири тәшкилати түркийиниң 81 шәһири вә һәр қайси районлирида йеқиндин буян хитай зулумиға болған наразилиқини ипадиләп уйғур мәсилиси тоғрисида һәр хил йиғин, мурасим вә ахбарат елан қилиш қатарлиқ бир йүрүш паалийәтләрни елип бериватиду.

Бу айниң башлирида үлкү оҗақлири тәшкилатиниң рәиси олҗай килавуз әпәнди, түркийиниң һәр қайси җайлиридики шөбилирини 300 уйғур түрк түркийигә кәлсун дегән шуар астида имза топлашқа чақирған болуп вә бу һәқтә үлку оҗақлири тәшкилатиниң рәсмий тор сәһиписидә бир баянат елан қилған иди. Баянатта улкү оҗақлири тәшкилатиниң, дуняниң қәйиридә бир түрк болса униң дәрди дәрдимиз, қайғулири қайғулиримиз дегән асасий принсипи бойичә башлитилған, 300 уйғур түрки түркийигә кәлсун! дегән намда башлитилған имза топлаш паалийити түркийиниң һәр қайси шәһәрлиридә давам қиливатқанлиқи билдүрүлди.

Инәгүл шәһридики имза топлаш паалийити
Инәгүл шәһридики имза топлаш паалийити

Баянатта олкү оҗақлири тәшкилатиниң рәси олҗай килавуз әпәндиниң мундақ дегәнлики билдүрүлди: “уйғур түрклиригә болған қоллашни ипадиләш мәқситидә тәшкилатимиз тәрипидин бир имза топлаш паалийити башлитилди. Бу имза топлаш мунасивити билән үлкү оҗақлири тәшкилатиниң һәр қайси вилайәт, наһийә, йеза - базар вә районлардики пүтүн шөбилири вә университетлардики тәшкилатлар вәзипиләндүрүлди. 300 Уйғур түрки түркийәгә кәлсун дегән намда тәшкилатимиз тәрипидин топланған пүтүн имзалар мунасивәтлик рәһбәрләргә вә дөләт органлириға әвәтилиду. Зулум вә бесим сәвәбидин юртлирини ташлап тайландқа кәлгән қериндашлиримизниң хитайға қайтурулуп кетишини тосуш үчүн түркийәгә кәлтүрүлүши керәкликини тоғра дәп қарайдиған пүтүн виҗдан игилирини бу имза топлаш паалийитини қоллап - қуввәтләшкә чақириқ қилимиз. Үлкү оҗақлири тәшкилати болуш сүпитимиз билән биз һәр замандикигә охшаш пүтүн мәзлумларниң вә пүтүн дуня түрклириниң йенида болидиғанлиқимизни йәнә бир қетим тәкрарлаймиз”.

Түрк оҗақлири тәшкилати чорум шөбиси яшлар бөлүминиң рәиси явуз үнлү әпәнди, шәрқий түркистан мәсилиси аддий бир сиясий мәсилә әмәс бәлки пүтүн инсанийәтниң игә чиқиши керәк болған бир мәсилидур, деди.

Үлкү оҗақлири тәшкилати тәрипидин түркийиниң 81 шәһәр вә районлирида, 00 3уйғур қериндишимиз түркийигә кәлтүрүлсун дегән шуар астида башлитилиған имза топлаш паалийити сиясий партийиләр, аммивий тәшкилатлар вә хәлқ аммисиниң қизғин қоллишиға еришмәктә.

Үлкү оҗақлири тәшкилати амасия шөбиси тәрипидин, тайландтики 300 муһаҗирни түркийигә кәлтүрүш үчүн имза топлаш паалийити башланди. Имза топлаш паалийитини амасия хәлқи қоллап - дәстәк бәргәнлики билдүрүлди.

Үлкү оҗақлири тәшкилатиниң баликисир - бандирма шөбә рәиси баһадир гәнч әпәнди, йерим әсирдин көпрәк бир вақиттин буян хитай ишғал астида қалған шәрқий түркистанда уйғур түрклиригә қарита зулум сестимилиқ бир шәкилдә давам қиливатиду. Райондики қериндашлиримиз қирғинчилиққа учримақта. Түрк миллитиниң излирини, ядикарлиқлирини шәрқий түркистан земинидин йоқ қилишқа урунмақта. Ишғалчи хитай һакимийити мәтбуат вә интернитқа чәклимә қоюп шәрқий түркистанда йүз бериватқан паҗиәләрни дуня җамаитидин йошуруп кәлмәктә, деди.

Баһадир гәнч әпәнди сөзидә йәнә тайландтики 300 муһаҗирни түркийигә кәлтүрүш үчүн башлатқан имза топлаш паалийити тоғрисида тохтилип, 300 уйғур түрки түркийигә кәлсун, дегән нам астида топланған имзаларни мунасивәтлик тәшклат, орган вә рәһбәрләргә әвәтидиғанлиқини ипадилиди.

Баһадир гәнч әпәнди түркийә хәлқини бу имза топлаш паалийитини қоллашқа чақриқ қилип мундақ деди: түрк миллитиниң у қериндашларға игә чиқидиғанлиқини уларни қоллайдиғанлиқини, түрк миллитиниң бу мәсилидики чиң туруш мәйданини йәнә бир қетим көрситиду. Зулум вә қийин - қистақ сәвәбидин юртлирини тәрк етип тайландта панаһланған қериндашлиримизниң хитайға тапшурулуп өлтүрүлушигә тосқунлуқ қилиш үчүн түркийигә кәлтүрүлүши керәкликини тоғра дәп қарайдиған пүтүн виҗдан игилириниң бу имза топлаш паалийитимизни қоллашқа чақириқ қилимиз.
Ушак шәһридики имза топлаш паалийити
Ушак шәһридики имза топлаш паалийити

Үлкү оҗақлири тәшкилати тәрипидин, хитай зулумидин қечип тайландта тутулуп қалған 300 уйғур түрклиригә панаһлиниш һоқуқи бериш мәқситидә башлитилған имза топлаш паалийитини чорум шәһири түрк оҗақлири тәшкилати яшлар бөлүми қоллап - қуввәтлиди.

2014 - Йили 23 - дикабер сәйшәнбә күни чорум шәһири һөрийәт мәйданида, 300 уйғур түркий түркийигә кәлсун! дегән шуар астида ечилған имза топлаш паалийитигә хәлқ аммиси қизғин ишитирак қилди. Бу паалийәтни милләтчи һәрикәт партийиси вә түрк оҗақлири яшлар тәшкилатиму қоллап қуввәтлиди.

Имза топлаш паалийитини қоллап мәйданиға кәлгән түрк оҗақлири тәшкилати яшлар бөлүми рәиси явуз үнлү әпәнди хитай зулумидин қечип тайландта тутулған 300 уйғур муһаҗирниң хитайға қайтурулмаслиқи керәкликини билдүрди.

Уйғурларниң һәқлиқ давасида ялғуз әмәсликини ипадилигән явуз үнлү әпәнди мундақ деди: “шәрқий түркистан мәсилиси аддий бир сиясий мәсилә әмәс, бү дөләттә һәтта пүтүн дуняда яшиған вә өзини мусулман дәп билидиған, түрк миллити дәп тонулған пүтүн кишилик һоқуқ қоғдуғучилириниң, вә һәтта әркинлик шуарчилириниң милләт айримастин һәр кимниң игә чиқиши керәк болған мәсилидур. Әмма хусусән мән мусулман, мән түрк, мән османлий дегән рәһбәрләрниң игә чиқиши керәк болған бир мәсилидур.”

Истиқлал маршини язған шаир мәһмәт акиф әрсойниң бир шеири билән сөзини башлиған явуз үнлү әпәнди сөзидә үлкү оҗақлири тәшкилатиниң уйғурларға игә чиқип бу муһим имза топлаш паалийити башлатқанлиқи үчүн тәшәккүр ейтидиғанлиқини ипадилиди.

Явуз үнлү сөзидә бу имза топлаш паалийитини қоллайдиғанлиқини ипадиләп мундақ деди: “у тизимликкә түрк оҗақлири тәшкилатиниң имзасини қоюш билән пәхирлинимиз, ким зулум вә залимға қарши мәзлумниң йенида болса, биз түрк оҗақлири тәшкилати болуш сүпитимиз билән улар билән биргә болимиз. Зулум вә қийин - қистақтин қутулуш үчүн өз ана вәтинини тәрк етишкә мәҗбур болған 300 нәпәр шәрқий түркистанлиқ уйғур түрклиригә түркийә қойнини ечиш керәк. Ислам дини итиқадий билән әркин яшашни арзу қилған бу қериндашлиримиз пәқәт түркийидә хатирҗәм яшайду. Бу тоғрида һөкүмәтни вәзипигә чақириқ қилимиз. Арақан, сүрийә, ирақ вәпәләстин үчүн аққан көз яшлар шәрқий түркистанлиқ қериндашлиримиз үчүнму еқиши лазим.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.