Türk ammiwiy teshkilatliri musapir Uyghurlardin hal sorap pul yardem qildi

Muxbirimiz erkin tarim
2016.02.09
Share on WhatsApp
Share on WhatsApp
turkiye-uyghur-meschit-musapir-ziyaret.jpg Uyghur olturaqlashqan qorojaydiki meschitke ziyaret
RFA/Erkin Tarim

7 - Féwral küni türkiyening chong wilayetliridin bolghan konyada pa'aliyet élip bériwatqan“Irfan ma'arip we hemkarliq dostluq jem'iyiti” bilen qeyseride pa'aliyet élip bériwatqan “Chedut jem'iyiti” bashqurush hey'iti ezaliri qeyseridiki Uyghur musapirlardin hal soridi we ulargha atighan iqtisadiy yardimini tapshurup berdi. 40 Kishidin terkip tapqan hey'et, malayshiya we tayland arqiliq türkiyening qeyseri shehirige kélip olturaqliship qalghan Uyghur musapirlar turiwatqan qorojaygha kélip zémistan qishta musapir Uyghurlargha maddiy yardemlerni bérip ularni qattiq söyündürdi. Ular musapir Uyghurlar bilen bir dasqanda bille tamaq yep, birlikte namaz qilip, ulardin néme qéyinchiliqlargha duchar boluwatqanliqini soridi.

40 Kishilik hey'et teshkillep kélip Uyghur musapirlardin hal sorap, ulargha maddi yardemlerni bergen irfan ma'arip hemkarliq we dostluq jem'iyiti re'isi memet kaklik ependi bu heqte melumat bérip mundaq dédi: “Biz Uyghur musapirlarning weziyitini bilettuq, ularning qéyinchiliqi néme, ularni neq meydanda köreyli, ulargha ziyapet béreyli dep yekshenbe küni sa'et 11 etrapida bérip, meschitte bir yighin achtuq. Uyghur qérindashlirimiz bilen tonushtuq. Tamaqtin kéyin yene yighin échip ular duchar boluwatqan qéyinchiliqlarni xatirilep chiqtuq.”

Uyghur musapirlirining perzentliri
Uyghur musapirlirining perzentliri

Memet kaklik ependi malayshiya we tayland arqiliq qeyserige kélip olturaqliship qalghan Uyghur musapirlar üchün konyada yighqan pulni ulargha teqdim qilghanliqini bayan qilip munularni dédi: “Biz aparghan iqtisadiy yardemni séyit ependige berduq. Nahayiti yaxshi bir ziyaret boldi. Biz bu ziyaret arqiliq Uyghur qérindashlirimizni téximu yéqindin tonughan bolduq. Shunche qéyinchiliq astida yashap turughluq qur'an kursigha zor ehmiyet bergenlikliri bizni bekla söyündürdi. Konyadin 15 kishi barghan iduq, qeyseridiki shöbimizning mes'ulliri bolup 40 etrapida kishi yérim kün musapir Uyghur qérindashlirimiz bilen menilik yérim kün ötküzduq.”

Memet kaklik ependi musapir Uyghurlarning qéyinchiliqlirini jayida körüp yéziwalghanliqini, bu jüme küni yighin chaqirip Uyghurlarning qéyinchiliqini hel qilishning yollirini izdeydighanliqini bayan bilip mundaq dédi: “Biz Uyghurlar üchün némilerni qilalaymiz, bu heqte jüme küni yighin achimiz. Bu Uyghurlarning rastinla yardemge éhtiyaji bar iken. Ularning turidighan jayi bar iken, emma ambarda yeydighan nersiliri tügeptu. Ularmu buni dédi. Biz konyada yardem yighip aptomobil bilen ewetishni oylawatimiz. Uyghur qérindashlirimizning eng zor qéyinchiliqi salametlik sughurtisining yoqluqi bilen türkiyede ishlesh ruxsitining yoqluqidin ibaret. Bizning bash ministirimiz konyaliq bolghachqa, uninggha bu mesilini qandaq yetküzimiz. Biz bu heqte bash qaturimiz. Chünki bizche Uyghur musapirlar duchar boluwatqan eng zor qéyinchiliq türkiyede ishlesh ruxsitining yoqluqi iken. Özliri ishlep turmushini qamdiyalaydighan bolalishi üchün aldi bilen buni hel qilishimiz kérek.”

Qeyseride pa'aliyet élip bériwatqan sherqiy türkistan medeniyet we hemkarliq teshkilati re'isi séyit tümtürk ependi konya irfan jem'iyiti bashliqi memet ependi bashchiliqidiki 40 kishilik hey'etning Uyghur musapirlarni yoqlap kélip ularning qéyinchiliqlirini anglap yézip ketkenlikini, türkiye hökümitige yetküzidighanliqini bayan qilghanliqini éytti. Séyit tümtürk ependi bu hey'etning Uyghurlargha iqtisadiy yardem élip kélip tapshurup bergenlikini dédi.

Ming Uyghur olturaqlashqan qorojaydiki meschitning imami emin qari konyadin kelgen ammiwiy teshkilatlar mes'ulliridin terkip tapqan hey'etning özlirige iqtisadiy yardem bergenlikini, buni namrat Uyghurlargha tarqitip béridighanliqini bayan qildi.

Sherqiy jenubi asya döletliri arqiliq türkiyege kelgen Uyghurlardin ming kishi qeyseridiki döletning qorojayigha orunlashturulghan bolup, bular hazirghiche türk ammiwiy teshkilatlirining maddiy yardemi bilen turmushini qamdap kelmekte idi. Kéyinki 7 - 8 aydin béri yardem toxtap qalghan bolup, 7 - féwral künidiki yardem 7 aydin buyanqi tunji yardem iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.