Türkiyening gazi'antep shehiride yüz bergen térrorluq hujumida 54 kishi hayatidin ayrildi

Ghazi'antepte toy murasimigha qaritilghan térrorluq hujumdin kéyinki körünüsh. 2016-Yili 20-awghust, türkiye.

17-Awghust küni wanda, 18-awghust küni etigen elazigh wilayitide, chüshte bitlis wilayitining hizan nahiyiside yüz bergen térrorluq hujumidin kéyinla 20-awghust küni türkiyening sherqiy jenubigha jaylashqan muhim sana'et sheherliridin biri bolghan ghazi'antepte toy murasimigha élip bérilghan térrorluq hujumda 54 kishi qaza tapti, 94 kishi yaridar boldi. Bularning ichidin 17 kishining ehwalining éghir ikenliki bildürüldi.

Bu heqte muxbirlargha bayanat bergen türkiye dölet re'isi rejep tayyip erdoghan mundaq dédi: “Hörmetlik muxbirlar hemminglargha melum bolghinidek, ghazi'antepning shahinbey rayonida bir toy murasimi jeryanida 12, 14 yashlardiki bir balining bedinige téngilghan bombining partlishi yaki partlitilishi netijiside deslepte 94 yaridar bar idi, hazir doxturxanida yétiwatqan yaridar 69, bularning ichidin 17 sining ehwali bekla éghir. 53 Kishi qaza tapti. Weqe türkiyening wan we sirt wilayitidin köchüp kelgen kishiler olturaqlashqan bir jayda meydan'gha keldi.”

Türkiye dölet re'isi rejep tayyip erdoghan muxbirlargha bergen bayanatida türkiye j x idarilirining tekshürüshi netijiside mezkur térrorluq hujumni demeshq iraq islam döliti térror teshkilatining élip barghanliqi toghrisidiki gumanning yuqiri ikenlikini tekitlep mundaq dédi: “Hazirghiche waliyliq we jama'et xewpsizlik xadimlirining tekshürüshi netijide deslepki gumanimiz, bu da'ish élip barghan térrorluq hujumi ikenliki heqqide boldi. Kéyinki künlerde bu térror teshkilati gazi'antep wilayitimizde teshkillinishke tirishiwatatti. Biz dawamliq bulargha qarita axturup tutush herikiti élip barduq we bundin kéyinmu élip barimiz. Men bu térrorluq hujumda hayatidin ayrilip qalghan yurtdashlirimning a'ilisige sewr tileymen.”

Türkiyening sherqiy jenubi rayonigha jaylashqan gazi'antep shehiri shahinbey rayonida toygha qatnashqan 250 etrapida kishining arisigha bedinige bomba téngilghan balini élip kirip qoyup, uzaqqa kétip turup, uzaqtin tézginek bilen partlatqanliqi ilgiri sürülmekte. Bu térrorluq hujumning élip bérilish sheklige qarap turup mutexessisler da'ish térror teshkilatining qilghan bolush éhtimalining yuqiri ikenlikini ilgiri sürüshmekte.

Türkiyede burun körülüp baqmighan shekilde arqa-arqidin bundaq térrorluq hujumning köpiyip kétishidiki seweb néme? türkiye j x idariliri ilgiri sürgendek, bu da'ish térror teshkilati élip barghan hujummu? köpi 18 yashtin töwen balilardin terkib tapqan 54 kishi qaza tapqan qetli'amni toyda élip bérishidiki seweb néme? dégen so'allargha jawab tépish üchün mutexessislerge mikrofonimizni uzattuq.

Türkiye j x idarisining tor bétide élan qilin'ghan bayanatqa asaslan'ghanda, 20-awghust küni aqsham gazi'antepte bir toy murasimida élip bérilghan özini partlitish hujumi 2015-yili 10-ayning 15-küni enqere poyiz istansisida yüz bergen, 109 kishi qaza tapqan, 500 kishi yaridar bolghan térrorluq hujum bilen 2015-yili 7-ayning 20-küni shanli'urfa wilayitining suruch nahiyeside meydan'gha kelgen 34 kishi qaza tapqan, 104 kishi yaridar bolghan térrorluq hujumigha oxshaydiken. Yuqirida dep ötken enqere we suruchta yüz bergen ikki térrorluq hujumini demeshq iraq islam döliti térrorluq teshkilatining élip barghanliqi jezmleshken idi.