Ming jyenjuning türkiyediki ziyariti Uyghur dewasigha qandaq tesir körsiter?

Xitay kommunist partiyesi merkiziy komitéti ezasi ming jyenju bashchiliqidiki xitay ömikini türkiye re'is jumhuri rejep tayyip erdoghan, türkiye bash ministiri exmet dawut'oghlu qobul qilghandin sirt, türkiye ichki ishlar ministiri efghan ela, türkiye xewpsizlik komitéti bashliqi seypullah hajimüftü'oghlu qatarliqlarmu ular bilen uchrashqan. Bu uchrishishlargha türkiye istixbarat idarisi bashliqi xaqan fidan bilen xitay tashqi istixbarat ministiri, xitay jama'et xewpsizlik idarisi bashliqi we atalmish Uyghur aptonom rayoni jama'et xewpsizlik idarisi bashliqimu qatnashqan.

Anatoliye xewer agéntliqida élan qilin'ghan xewerlerge asaslan'ghanda, burun xitay rehberliri bilen türk rehberliri otturisidiki uchrishishlargha bundaq köp jasusluq idarisi aliy rehberliri bilen xewpsizlik idarisining aliy rehberliri qatniship baqqan emes iken. Bu uchrishishlardin burun muxbirlarning resim tartishigha ruxset qilinmidi, melumatmu bérilmidi. Undaqta bu uchrishishlarda néme mesililer muzakire qilindi. Bu ziyaretning Uyghur dewasigha qandaq tesiri bolar? bu heqte köz qarishini élish üchün türkiye-xitay munasiwetliri mutexessisi bilen söhbet élip barduq.

Doktor erkin ekrem ming jyenju bashchiliqidiki bu ömek ichidiki kishilerning köpining jama'et xewpsizlik idarisi we istixbarat idarisining rehberliridin terkib tapqan bolushi, nuqtiliq halda sherqiy türkistan mesilisining küntertipke kelgenlikini körsitip béridighanliqini éytti.