Enqerediki türkler we Uyghurlar xitay elchixanisi aldida yeken weqesining bir yilliqi munasiwiti bilen namayish qildi

Muxbirimiz erkin tarim
2015.07.29
turkiye-yeken-weqesi-namayish-2015.jpg Enqerediki türkler we Uyghurlar xitay elchixanisi aldida yeken weqesining bir yilliqi munasiwiti bilen namayishta
RFA/Erkin Tarim


D u q ning chaqiriqi, sherqiy türkistan medeniyet we hemkarliq teshkilatining orunlashturushi bilen 28 - iyul küni türkiyening enqere shehiridiki xitay elchixanisi aldida yeken weqesining bir yilliqi munasiwiti bilen namayish élip bérildi. Bu namayishqa enqerediki melum bir toluq ottura mektepning oqutquchisi aytékin chetin we uning oqughuchiliri, dunya Uyghur qurultiyining mu'awin re'isi séyit tümtürk ependi, enqerediki bezi Uyghurlardin bolup köp sanda kishi qatnashti. Namayish sa'et 12:00 din 12:40 qiche dawamlashti. Qolida türkiye bayriqi, sherqiy türkistan bayriqini we lozunkilarni kötüriwalghan namayishchilar türlük sho'arlarni towlap yeken weqeside qetli qilin'ghan shéhitlarni eslidi, xitayning qanliq qirghinchiliqini eyiblidi.

Arqidin dunya Uyghur qurultiyi mu'awin re'isi séyit tümtürk ependi metbu'at bayanatini oqup ötti. U, bayanatida bundin bir yil burun 28 - iyul künide yekenning ilishqu we xangdi yézilirida yüz bergen weqede xitayning 96 Uyghurni öltürgenlikini ashkarilighanliqini, bu sanning toghra emeslikini, bu weqede köp sanda bigunah Uyghurni öltüriwetkenlikini xitayning öltürülgen Uyghurlarning heqiqi sanini dunyagha ashkarilishi kéreklikini, tutuqlan'ghan Uyghurlarni derhal qoyup bérishini, Uyghurlargha élip bériliwatqan bésim siyasitini toxtitishi kéreklikini éyitti.

Séyit tümtürk ependi bayanatida, özliri namayish qiliwatqan sa'etlerde türkiye dölet re'isi rejep tayop erdoghanning resmiy ziyaret üchün xitaygha mangghanliqini, bu qétimqi ziyarette Uyghurlar mesilisini kün tertipke élip kélishi, Uyghurlargha ige chiqishi kéreklikini tekitlidi. Töwende neq meydandin ewetken xewer programmimizni anglitimiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.