Оттура асиялиқлар истанбулда террорлуққа қарши наразилиқ намайиши өткүзди

Ихтиярий мухбиримиз арслан
2017.01.25
Share on WhatsApp
Share on WhatsApp
istanbulda-namayish-terror-qarshi-1.jpg Террорлуққа қарши наразилиқ намайиши вә мухбирларни күтүвелиш йиғинидин көрүнүш. 2017-Йили 22-январ, истанбул.
RFA/Arslan

1-Айниң 22-күни йәкшәнбә истанбулда яшаватқан өзбек, уйғур, қирғиз, таҗик қатарлиқ милләтләрдин бир гуруппа кишиләр истанбулниң үскүдар районидики меһримаһ җамәси алдиға топлинип террорлуққа қарши наразилиқ намайиши вә мухбирларни күтүвелиш йиғин өткүзүлди.

Бу паалийәт мәркизи истанбулға җайлашқан хәлқаралиқ түркистанлиқлар һәмкарлиқ җәмийити тәрипидин уюштурулди.

Намайишчилар қоллирида, “өзбек, уйғур, қазақ, таҗик, қирғиз әҗнәбий әмәс бир милләтбиз”, “түрк миллитигә ирқчилиқ қилиш ярашмайду”, “даиш исламниң дүшмини”, “террорлуқ инсанийәтниң җинайити”, “оттура асиялиқлар террорчи әмәс” дегәнгә охшаш чоң хәтләр йезилған вивиска тахтиларни көтүрүп шоар товлиди.

Намайишқа, анадолийә агентлиқи, доған хәвәр агентлиқи қатарлиқ көп санда мәтбуатларниң мухбирлири қатнишип паалийәт мәйданидин хәвәр тарқатти.

Паалийәттә алди билән хәлқаралиқ түркистанлиқлар һәмкарлиқ җәмийитиниң рәиси борһан қавунҗи сөз қилди.

Бурһан қавунҗи әпәнди бу намайишниң мәқситиниң түркийә хәлқидә оттура асия хәлқигә қарита оттуриға чиққан хата чүшәнчиләрни түзитиштин ибарәт икәнликини билдүрди.

Бурһан қавунҗи мундақ деди: бәшикташ қәтлиамини садир чиқарған киши өзбек чиқти дәп көплигән хәвәрләр тарқалди. Өзбек террорчи дейилди. Бу болса түркийәдә түркистанлиқларни яман көрүш қариши пәйда қилиду. Террорчи буларниң арисидин чиқти дәп түркистанлиқларға қарши яман көридиған әһвал пәйда болди. Әмәлийәттә һәр милләтниң ичидин террорчи чиқиду. Террорлуқ хәлқаралиқ бир мәсилидур. Түркистанлиқларниң, өзбекләрниң көп санлиқи бу вәқәләрниң сиртида болуп, тинчлиқ бир йол билән күрәш қиливатиду. Вәтинимиздә зулумға учридуқ, өзбекистандин, шәрқий түркистандин, таҗикистандин айрилишқа мәҗбур болдуқ. Бирақ биз һеч қачан қораллиқ күрәш қилиш йолиға кирмидуқ. Биз өзимиз мәзлумлар туруп башқиларға зулум қилишимиз, залимлиқ қилишимиз мумкин әмәс. Биз тинчлиқпәрвәр икәнликимизни тинчлиқ йолидин айрилмайдиғанлиқимизни, яхшилиқ йолидин айрилмайдиғанлиқимизни елан қилиш үчүн бу йәргә топландуқ.

Йиғинда йәнә хәлқара түркистанлиқлар җәмийитиниң муавин рәиси намаз нурмумин қатарлиқ бир қанчә киши сөз қилди.

Доктор намаз нурмумин мундақ деди: бу җинайәткә оттура асиялиқ бәзи кишиләрниң арилишип қалғанлиқидин қаттиқ қайғулиниватимиз. Әмма һәр хәлқтин җинайәтчи чиқиш мумкин. Йеңи йил кечиси бәшикташта қәтлиам садир қилған киши вә тәшкилатқа биз түркистанлиқлар болуш сүпитимиз билән ләнәт оқуймиз. Даиш вә башқа пүтүн қораллиқ тәшкилатларни рәт қилимиз. Улардин узақ икәнликимизни йәнә бир қетим очуқ ашкара елан қилимиз.

Намайиш ахирлашқандин кейин намайишчилар үскүдар мәйданидики қизилай җәмийитигә келип, түркийә билән қериндашлиқ һес-туйғулирини ипадиләш мәқсәттә қан ианә қилди.

Биз бу намайиш тоғрисида пикир-қарашлирини елиш үчүн хәлқара түркистанлиқлар һәмкарлиқ җәмийитиниң муавин рәиси доктор намаз нур мумин әпәнди билән сөһбәт елип бардуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.