Ottura asiyaliqlar istanbulda térrorluqqa qarshi naraziliq namayishi ötküzdi

Ixtiyariy muxbirimiz arslan
2017.01.25
Share on WhatsApp
Share on WhatsApp
istanbulda-namayish-terror-qarshi-1.jpg Térrorluqqa qarshi naraziliq namayishi we muxbirlarni kütüwélish yighinidin körünüsh. 2017-Yili 22-yanwar, istanbul.
RFA/Arslan

1-Ayning 22-küni yekshenbe istanbulda yashawatqan özbék, Uyghur, qirghiz, tajik qatarliq milletlerdin bir guruppa kishiler istanbulning üsküdar rayonidiki méhrimah jamesi aldigha toplinip térrorluqqa qarshi naraziliq namayishi we muxbirlarni kütüwélish yighin ötküzüldi.

Bu pa'aliyet merkizi istanbulgha jaylashqan xelq'araliq türkistanliqlar hemkarliq jem'iyiti teripidin uyushturuldi.

Namayishchilar qollirida, “Özbék, Uyghur, qazaq, tajik, qirghiz ejnebiy emes bir milletbiz”, “Türk millitige irqchiliq qilish yarashmaydu”, “Da'ish islamning düshmini”, “Térrorluq insaniyetning jinayiti”, “Ottura asiyaliqlar térrorchi emes” dégen'ge oxshash chong xetler yézilghan wiwiska taxtilarni kötürüp sho'ar towlidi.

Namayishqa, anadoliye agéntliqi, doghan xewer agéntliqi qatarliq köp sanda metbu'atlarning muxbirliri qatniship pa'aliyet meydanidin xewer tarqatti.

Pa'aliyette aldi bilen xelq'araliq türkistanliqlar hemkarliq jem'iyitining re'isi borhan qawunji söz qildi.

Burhan qawunji ependi bu namayishning meqsitining türkiye xelqide ottura asiya xelqige qarita otturigha chiqqan xata chüshenchilerni tüzitishtin ibaret ikenlikini bildürdi.

Burhan qawunji mundaq dédi: beshiktash qetli'amini sadir chiqarghan kishi özbék chiqti dep köpligen xewerler tarqaldi. Özbék térrorchi déyildi. Bu bolsa türkiyede türkistanliqlarni yaman körüsh qarishi peyda qilidu. Térrorchi bularning arisidin chiqti dep türkistanliqlargha qarshi yaman köridighan ehwal peyda boldi. Emeliyette her milletning ichidin térrorchi chiqidu. Térrorluq xelq'araliq bir mesilidur. Türkistanliqlarning, özbéklerning köp sanliqi bu weqelerning sirtida bolup, tinchliq bir yol bilen küresh qiliwatidu. Wetinimizde zulumgha uchriduq, özbékistandin, sherqiy türkistandin, tajikistandin ayrilishqa mejbur bolduq. Biraq biz héch qachan qoralliq küresh qilish yoligha kirmiduq. Biz özimiz mezlumlar turup bashqilargha zulum qilishimiz, zalimliq qilishimiz mumkin emes. Biz tinchliqperwer ikenlikimizni tinchliq yolidin ayrilmaydighanliqimizni, yaxshiliq yolidin ayrilmaydighanliqimizni élan qilish üchün bu yerge toplanduq.

Yighinda yene xelq'ara türkistanliqlar jem'iyitining mu'awin re'isi namaz nurmumin qatarliq bir qanche kishi söz qildi.

Doktor namaz nurmumin mundaq dédi: bu jinayetke ottura asiyaliq bezi kishilerning ariliship qalghanliqidin qattiq qayghuliniwatimiz. Emma her xelqtin jinayetchi chiqish mumkin. Yéngi yil kéchisi beshiktashta qetli'am sadir qilghan kishi we teshkilatqa biz türkistanliqlar bolush süpitimiz bilen lenet oquymiz. Da'ish we bashqa pütün qoralliq teshkilatlarni ret qilimiz. Ulardin uzaq ikenlikimizni yene bir qétim ochuq ashkara élan qilimiz.

Namayish axirlashqandin kéyin namayishchilar üsküdar meydanidiki qizil'ay jem'iyitige kélip, türkiye bilen qérindashliq hés-tuyghulirini ipadilesh meqsette qan i'ane qildi.

Biz bu namayish toghrisida pikir-qarashlirini élish üchün xelq'ara türkistanliqlar hemkarliq jem'iyitining mu'awin re'isi doktor namaz nur mumin ependi bilen söhbet élip barduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.