Qeyseridiki Uyghurlar rejep tayyip erdoghanni qizghin kütüwaldi

27-Aprél küni etigen qeyseri shehiri Uyghur mehellisidiki Uyghurlar chong yolning boyigha chiqip türkiye bash ministiri rejep tayyip erdoghanni qizghin kütüwaldi.

Sherqiy türkistan medeniyet we hemkarliq jem'iyitining bashqurush hey'et ezaliri, Uyghur diyaridin yéngi kelgen Uyghurlar we qeyseri mehellisidiki bir qisim Uyghur jama'et wekilliri qollirida sherqiy türkistanning ay yultuzluq kök bayriqini, türkiyening ay yultuzluq qizil bayriqini we her xil mezmundiki lozunkilarni kötürgen halda ayrodromdin sheherge qarap kétiwatqan rejep tayyip erdoghanning aldigha chiqip qizghin kütüwaldi. Türkiye bash ministir rejep tayyip erdoghan bu Uyghurlar topini körüp mashinisini toxtitip ulardin hal soridi. Bu Uyghurlar yigha-zari qilghan halda xitayning Uyghurlargha élip bériwatqan zulumini, tayland, malayshiya we wiyétnam qatarliq döletlerde sersan bolup yürgen Uyghurlarni türkiyege élip kélishini iltimas qilghan doklatni uninggha berdi.

Bash ministir rejep tayyip erdoghan ulargha özining bu ishtin xewerdar ikenlikini éytip, sewrchanliq bilen kütüshini tekitlidi.

Biz neq meydan'gha téléfon qilip, d u q mu'awin re'isi séyit tümtürk ependi we yéngidin kelgen, malayshiyada qalghan Uyghurlar bilen söhbet élip barduq. Abduraxman isimlik Uyghur türkiye bash ministiri rejep tayyip erdoghanni körüp qattiq hayajanlan'ghanliqini, xitay rehberlirige xelqning yéqin kélelmeydighanliqini, chünki ular xelqqe zulum qilghan bolghachqa xelqning arisigha kirishtin qorqidighanliqini éytti. U yene bularning démokratiye tüzümining ewzellikidin boluwatqanliqini eskertti.