Türkiye muftisi: "Xitay hökümiting Uyghurlargha zulum qiliwatqanliqi heqqidiki xewerler toghrimu?"

Ixtiyariy muxbirimiz arslan
2018-07-12
Élxet
Pikir
Share
Print
Xitay ömiki türkiye déngizli sheherlik dini ishlar idarisini ziyaret qilghan we mezkur idarining muftisi mehmet ashiq ependi bilen körüshken. 2018-Yili 10-iyul.
Xitay ömiki türkiye déngizli sheherlik dini ishlar idarisini ziyaret qilghan we mezkur idarining muftisi mehmet ashiq ependi bilen körüshken. 2018-Yili 10-iyul.
RFA/Arslan

Xitayning shangxey sheherlik milletler we din ishliri komitétining mudiri bey xu'a bashchiliqidiki xitay ömiki 10-iyul küni türkiye déngizli sheherlik dini ishlar idarisini ziyaret qilghan we mezkur idarining muftisi mehmet ashiq ependi bilen körüshken.

Déngizli sheherlik din ishliri idarisi muftiliq ishxanisida élip bérilghan bu söhbetke türkiye diniy ishlar bashqarmisi rehberlik we teptish komitétining bash mupettishi ibrahim xatip'oghli, 23-nöwetlik türkiye parlamént ezasi mehmet salih erdoghan we déngizli sheherlik diniy ishlar idarisining mu'awin muftisi hesen höseyin qatarliqlar qatnashqan.

Ziyaret jeryanida söz qilghan mufti mehmet ashiq ependi xitay xelqi bilen türkiye xelqi otturisidiki alaqilerning yiraq tarixqa tutushidighanliqini, xitay ömikining türkiye ziyaritini qarshi alidighanliqini bildürdi.

Shangxey sheherlik milletler we din ishliri komitétining mudiri bey xu'a mundaq dédi: "Türkiyening diniy ishlarni bashqurush we idare qilish jehettiki tejribilirini öginish we uningdin paydilinish üchün sizlerni ziyaret qilduq. Türkiyede her xil diniy étiqadtiki kishilerning hemde diniy sahedikilerning tinch-ittipaq we bixeter yashawatqanliqidek emeliy tejribiliridin paydilinishni xalaymiz. Türkiyede bizlerge körsetken méhmandostluqingizlar üchün rehmet éytimiz."

Mufti mehmet ashiq ependi türlük diniy étiqadtiki kishilerning bir yerde inaq-ittipaq yashighanliqigha da'ir muhemmed eleyhissalamning qilghan sözlirini neqil keltürgendin kéyin xitay ömikige so'al qoyup mundaq dédi: "Shinjang Uyghur aptonom rayoni dégen nam bilen bilin'gen, sherqiy türkistan dégen nam bilen tonulghan rayonda yashaydighan musulman türkiy xelqlerge xitay hökümitining qattiq zulum qiliwatqanliqi heqqide dunya metbu'atliri we ijtima'iy taratqularda köpligen xewerler bésiliwatidu. Biz bu xewerlerning rast bolmasliqini ümid qilimiz. Silerdin sorap baqsam, bu xewerler toghrimu?"

Mufti mehmet ashiqning so'aligha shangxey milletler we din ishliri komitétining mudiri bey xu'a gepni egitip yürüp jawab berdi, u mundaq dédi: "Xitay xelq jumhuriyiti xuddi türkiye jumhuriyitige oxshashla din bilen siyasiy ayrilghan bir dölet. Biz milletler we din ishlirini bashqurush idarisi bolush süpitimiz bilen asasiy qanun boyiche din'gha étiqad qilidighan kishilerning erkin ibadet qilishigha yardemchi boluwatimiz. Bu ziyaritimizde dölitingizning bu jehettiki mol tejribilirini öginip, bundin kéyinki xizmetlirimizni téximu yaxshi ishlesh üchün tirishchanliq körsitimiz."

Biz bu heqte yenimu chongqur melumatqa érishish üchün déngizli sheherlik diniy ishlar idarisidin ehwal igiliduq.

Axirida dunya Uyghur qurultiyi ichki ishlar komitétining mudiri hamidxan köktürk ependi ziyaritimizni qobul qilip, bu heqte öz qarashlirini bayan qilip ötti.

Toluq bet