Ay-yultuzluq kök bayraq kötürgen bir guruppa Uyghurlar istanbuldin enqerege qarap piyade yolgha chiqti

Ixtiyariy muxbirimiz arslan
2018-12-17
Élxet
Pikir
Share
Print
Uyghurlarning awazini türkiye xelqige we hökümitige anglitish üchün istanbuldin enqere qarap piyade yolgha chiqqan bir guruppa Uyghur izmit shehirige kelgen körünüsh. 2018-Yili dékabir, türkiye.
Uyghurlarning awazini türkiye xelqige we hökümitige anglitish üchün istanbuldin enqere qarap piyade yolgha chiqqan bir guruppa Uyghur izmit shehirige kelgen körünüsh. 2018-Yili dékabir, türkiye.
RFA/Arslan

Zulumgha uchrawatqan Uyghurlarning awazini türkiye xelqige we hökümitige anglitish üchün bir guruppa Uyghurlar 12-ayning 15-küni istanbuldin enqere qarap piyade yolgha chiqti.

Bu piyade yürüsh guruppisi er-ayal 12 Uyghurdin terkib tapqan iken. Ular hazir izmit shehirini bésip ötüp, sakariye shehirige qarap piyade yürüshni dawam qilmaqtiken.

Qollirida ay-yultuzluq kök bayraq bilen qizil renglik türk bayriqini teng kötürgen bu guruppidiki kishilerning axirqi nishani paytext enqere iken. Ular enqerege yétip barghandin kéyin, birinchi bolup türkiye parlaméntigha kiridiken. Andin jumhur re'is rejep tayyip erdoghan we herqaysi siyasiy partiyelerning rehberliri bilen uchriship Uyghurlarning ehwalini anglitidiken.

Bular eslide 9 kishi yolgha chiqqan bolup, kéyin üch kishi yolda qoshulup sani 12 ge yetken iken. Yürüshke qatnashqan muhemmed imin yigit'oghli özining bu yürüshke qatnishishtiki meqsiti toghrisida toxtilip mundaq dédi: "Sherqiy türkistanda boluwatqan zulumgha türkiye we islam dunyasi hazirghiche süküt qilip turmaqta. Biz bu sükütni buzush üchün buraderler bilen kéliship piyade yürüshke chiqtuq. Bu yürüshning sherqiy türkistandiki musulmanlargha paydisi bolidu dégen ümidte yürüwatimiz."

Muhemmed imin yigit'oghli izmittin ötüp sakariyege yétip kéliwatqanliqini, izmitqa yétip kelgende izmit sheher bashliqi ularni kütüwélip qarshi alghanliqini we méhmanxanigha orunlashturghanliqini shundaqla yolda saqchilarning ularni qoghdap birge yürüwatqanliqini bildürdi.

Peride isimlik Uyghur pa'aliyetchi ayal yürüsh jeryanidiki pikir-qarashlirini ipadilep mundaq dédi: "Bu nöwet yürüshke qatnishishtiki meqsitim wetendiki zulum chékiwatqan qowm-qérindashlirimiz, perzentlirimiz, ata-anilirimiz we uruq tughqanlirimizning derd-elemlirini pütkül dunyagha anglitish üchündur. Yolda nurghun muhim shexsler bilen uchrashtuq, türk xelqi bizni yaxshi qollawatidu, yétip barghan sheherlerde bizni qizghin kütüwaldi."

Muhemmed isimlik yene bir pa'aliyetchi yürüsh pa'aliyiti toghrisida ziyaritimizni qobul qilip mundaq dédi: "Biz héch bir teshkilatqa tewe bolmastin öz aldimizgha yolgha chiqtuq. Biraq herqaysi teshkilatlardiki kishilerni özimizning qérindashliri dep bilimiz, meyli sherqiy türkistan ma'arip we hemkarliq jem'iyiti bolsun, meyli dunya Uyghur qurultiyi bolsun, ular kötürüp méngiwatqan yükni bizmu kötürüshüp béreyli, qolimizdin kélishiche bir ish qilayli dégen chüshenche boyiche yolgha chiqtuq. Yollarda uchrighan türkler bizni qollap kéliwatidu, bizmu köp yerlerge bérip, Uyghurlarning ehwalini chüshendürüp sözlep anglitip yürduq. Bizning bu herikitimiz türk xelqige biz Uyghurlarni chüshendürüshke wasite boluwatidu, bizmu ümidimizning emelge ashidighanliqini tonup yettuq. Enqeregiche piyade yürüp barimiz. Özimizni teshwiq qilip, xelqimizge boluwatqan zulumni teshwiq qilip, musteqil dölitimiz bolushni arzu qilidighanliqimizni, xitaylar bilen birge yashashning hergizmu mumkin emeslikini bildürüsh üchün yürüwatimiz. Türk xelqi bizni bek qollidi, saqchilarmu bizni qoghdap birge yürüwatidu."

A'ishe isimlik yene bir ayal pa'aliyetchimu özining bu yürüshke qatnishishtiki meqsiti toghrisida pikir bayan qilip, zulumgha uchrawatqan Uyghurlarning awazini dunyagha anglitish üchün bu yürüshke qatniship, piyade yürüwatqanliqini bildürdi.

Ekber sabir isimlik bir pa'aliyetchi mundaq dédi: "Xelqimiz éghir zulumgha uchrap yoq bolup kétish girdabigha yéqinlap bériwatqanliqini hés qilip oyghanduq we bu seperge atlanduq. Éziliwatqan xelqimizge azraq bolsimu medet bolsun dégen ümid bilen yolgha chiqtuq. Bu sepirimizni nahayiti yaxshi dawam qiliwatimiz."

Bu guruppa izmit shehiridin yolgha chiqip qartepe dégen rayon'gha yéqinlap kelgende istanbuldin bir qisim Uyghurlar hal sorap kelgen. Qirghizistan "Ittipaq" jem'iyitining re'isi artiq hajining bashchiliqida 11 kishilik bir hey'et kelgen bolup, ular piyade yürüwatqanlar bilen yüz körüshüp, ulargha medet bergen. Ular ayropilan bilen istanbulgha kélip dem almastin udul piyade yürüwatqanlarning yénigha kélip hal-ehwal sorighan.

Artiq hajim mundaq dédi: "Biz 11 kishilik bir hey'et qirghizistandiki Uyghurlarning salimini élip kelduq. Biz hazir dunyada boluwatqan Uyghur dewasi we weten ichidiki Uyghurlarning ehwali toghrisida türkiyediki qérindashlar bilen uchrishish, meslihetlishish, bu yerde élip bériliwatqan pa'aliyetlerni körüsh we tejribe öginish üchün kelduq."

Qirghizistandin kelgen hey'ettin orun alghan abduqéyim rozi isimlik kishi bu piyade yürüsh pa'aliyiti toghrisidiki tesiratini bayan qilip mundaq dédi: "Biz bu muhim pa'aliyetni anglapla yolgha chiqtuq. Istanbulgha kélipmu dem almastin ularning yénigha kelduq. Bu bir zulumgha qarshi élip bériliwatqan heriket. Xitaylar bizning wetinimizni bésiwalghandin buyanqi eng esheddiy haletke yetti. Bizning emdi jim yatidighan waqtimiz tügidi. . ."

Toluq bet