Enqerede sherqiy türkistan mesilisi her jehettin otturigha qoyuldi

Ghazi uniwérsitétida chaqirilghan “Sherqiy türkistandiki asasiy mesililer we istratégiyilik tengpungluq” mawzuluq yighin'gha qatnashquchilar. 2013-Yili dékabir, enqere.

Türkiyining paytexti enqerediki ghazi uniwérsitétida “Sherqiy türkistandiki asasiy mesililer we istratégiyilik tengpungluq” mawzuluq yighin chaqirildi. Ghazi uniwérsitéti ottura asiya we ottura sherq tetqiqat merkizi uyushturghan bu yighinda, mezkur tetqiqat merkizining mudiri doktor mehmet akif oqur ependi, türkiye hajettepe uniwérsitéti oqutquchisi doktor erkin ekrem ependi, ghazi uniwérsitéti tarix fakultéti oqutquchisi proféssor doktor qonur'alp erjilasun ependiler söz qilip, sherqiy türkistan mesilisini her jehettin otturigha qoydi. Yighin'gha ghazi uniwérsitétining mudiri süleyman büyükberber ependi, mektep we herqaysi fakultétining rehberliri, oqutquchi we oqughuchilardin bolup 300 etrapida kishi qatnashti. Yighin'gha d u q mu'awin re'isi séyit tümtürk ependi, sherqiy türkistan medeniyet we hemkarliq jem'iyiti enqere shöbisining bashliqi xeyrullah efendigil ependimu qatnashti.

Ghazi uniwérsitétining mimar kemalettin yighin zalida ötküzülgen bu yighin, uniwérsitétning mudiri proféssor doktor süleyman büyükberber ependining échilish nutqi hemde dunya Uyghur qurultiyi re'isi rabiye qadir xanimning sin'alghugha élip ewetken échilish nutqi bilen bashlandi.

Proféssor doktor süleyman berberoghlu ependi sherqiy türkistan mesilisi ghazi uniwérsitéti qurulghan kündin béri köngül bölidighan muhim mesililerdin birige aylan'ghanliqini bayan qilip mundaq dédi:
Ghazi uniwérsitéti qurulghan kündin béri sherqiy türkistan mesilisige köngül bölüp kelmekte. Bu en'eniwileshti, buningdin pexirlinimiz. Biz bundin kéyinmu ilmiy halda türk dunyasining mesililirini kün tertipke élip kélishke dawam qilimiz. Ötken yili sherqiy türkistan toghrisidiki birinchi yighinimizni achqan iduq. Bu yil ikkinchi qétimliqini échip olturuptimiz. Xudayim buyrusa uniwérsitétimiz her yili bir chong yighin chaqirip sherqiy türkistan mesilisini her jehettin otturigha qoyimiz. Sherqiy türkistan mesilisini her jehettin bilish otturigha qoyush uni öginish, hel qilish yolliri üchün bash qaturush bizning heqqimiz. Bu yerde otturigha qoyidighan mesililer pütünley ilmiy tetqiqatning mehsulidur.

Arqidin rabiye xanimning sin'alghugha élip ewetken échilish nutqi yighin ehlige qoyup bérildi. Rabiye xanim aldi bilen ulargha salam yollidi. Rabiye xanim nutqida pütün türklerni sherqiy türkistanliqlargha köngül bölüshke chaqirdi.

Tepsilatini yuqiridiki awaz ulinishidin anglighaysiler.