Түркийә әскишәһәрдә ечилған түрк дуняси мәдәнийәт мираслири йиғинда уйғур мәдәнийәт мираслири тонуштурулди

Ихтиярий мухбиримиз арслан
2013-11-01
Share
turkiye-eskisheher-turk-uyghur-mediniyet-305.png Түркийә әскишәһәрдә ечилған түрк дуняси мәдәнийәт мираслири йиғини
RFA/Arslan

2013 - Йили түркийиниң әскишәһәр түрк дуняси мәдәнийәт мәркизи дәп елан қилинған болуп, әскишәһәрдә түрк дунясиға алақидар тил, дин, мәдәнийәт, өрп - адәт вә тарихлири тоғрисида һәр хил йиғин, мурасим вә паалийәтләр өткүзүлүп кәлмәктә.

Бу мунасивәт билән 2013 - йили 10 - айниң 24 - күнидин 27 - күнигичә 8 - нөвәтлик хәлқаралиқ түрк дуняси мәдәнийәт мираслири дегән темида йиғин өткүзүлди.

Бу йиғин түркийә баш министирлиқи ататүрк тил - тарих вә мәдәнийәт идариси тәрипидин һәр төт йилда бир қетим өткүзүлидиған болуп бу йил 8 қетимлиқи әскишәһәрдә өткүзүлди.

Йиғинда адаләт вә тәрәққият партийисиниң муавин рәиси шундақла парламент әзаси һөсәйин челик әпәнди ечилиш нутиқи сөзлиди.

Йиғинда түркийә җумһурийити баш катипи мустафа исән, ататүрк мәдәнийәт, тил вә тарих юқири қатлам идариси рәиси профессур дәря өрс, ататүрк мәдәнийәт мәркизиниң рәиси профессур туран қараташ, әски шәһәр валийиси гүнгүр азәм туна қатарлиқ рәһбәрләр түрк дунясиниң мәдәнийәт мираслири тоғрисида муһим сөз қилди.

Йиғинда түркийә җумһурийити баш катипи мустафа исән сөздә
Йиғинда түркийә җумһурийити баш катипи мустафа исән сөздә

Түркийә адаләт вә тәрәққият партийиси муавин рәиси һөсәйин челик, кишилик охшашмаслиқлар бир - бириниң буғизини сиқишқа сәвәб болмиғанға охшаш, иҗтимаий мәдәнийәт охшашмаслиқиму уруш қилишқа йол ачмайду. Охшашмаслиқлар һаятқа рәң қошиду, һаятқа мәнивий байлиқ болиду, талаш - тартиш қилмастин дуня билән келишип яшаш керәк. Пән - техника билән өзгириватқан дуняға маслашмиған тәқдирдә дәврниң арқисида қалимиз, деди.

Түркийә җумһурийити баш секритари мустафа исән мәдәнийәт мираслирини инсанийәтниң ортақ мираси дәп қараш керәкликини ипадиләп мундақ деди: мәдәнийәт мирасини җанландуруш, кәлгүси әвладларға йәткүзүш инсанийәтниң кәлгүсидики тинчлиқ вә мәдәнийәтләр үстигә қурулидиған сағлам диалог үчүн керәк дәп қараш лазим. Техиму хушаллиқ вә тинчлиқ ичидә бир дуня бәрпа қилиш үчүн мәдәнийәт мираслирини қоғдаш, кәлгүси әвладларға һазирқи имкан вә пурсәтләрни ишқа селип уларға мирас қалдуруш керәк.

Әскишәһәр валийиси гүнгүр азим туна бу қурултайниң пүтүн түрк дунясини вә инсанийәтни, яхшилиққа, гүзәлликкә, тинчлиққа чақириқ қилған мәнивий алимлар йетишип чиққан әскишәһәрдә ечилишидин хушал вә мәмнун болғанлиқини ипадилиди.

Бу йиғинға түрк дунясииниң охшимиған җайлиридин 110 дин артуқ язғучи, тәтқиқатчи алимлар қатнишип мәдәнийәт мираслири тоғрисида сөз қилди. Бу йиғинға уйғурларға вакалитән австралийидә яшаватқан уйғур язғучи сәлимә камал ханим қатнашти вә уйғурларниң йоқилип кетиш хәвпигә дүч кәлгән мәдәнийәтлиридин уйғур миң өйлири, чинә усули вә самавар усули дегәнгә охшаш уйғур сәнәт мәдәнийәтлири тоғрисида сөз қилди.

Биз бу һәқтә толуқ мәлуматқа еришиш үчүн йиғинда сөз қилған сәлимә камал ханим билән сөһбәт елип бардуқ.
Сәлимә камал ханим сөз үстидә
Сәлимә камал ханим сөз үстидә

Сәлимә ханим бу йиғинда уйғур қәдимий мәдәнийәтлиридин бир қисим мәдәнийәтләрниң йоқилип кетиш хәвпигә дүч кәлгәнликини әмәлий мисал билән сөзләп өткәнликини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт