“унтулған әл - шәрқий түркистан” намлиқ доклат бериш паалийити шветсийәдики әл - әзһәр мәктипидә күчлүк инкас қозғиди

“пәләстин мәсилиси билән чеченийә тоқунушини һәммә адәм билиду, лекин уйғурларниң вәтини болған шәрқий түркистан мәсилиси һәққидә көп кишиләрниң чүшәнчиси йоқ. Шветсийәдики мусулманлар пәрзәнтлири оқуйдиған бизниң көп милләтлик әл - әзһәр мәктипимиздә уйғурлар һәққидики доклат бериш паалийити бизгә бу һәқтики көплигән мәлуматларни тәқдим қилди.”

Стоккһолмдики әл - әзһәр мәктипиниң муавин мудири даниел стридсман зияритимизни қобул қилғанда алди билән йоқириқи сөзләрни тәкитлиди.

Әл - әзһәр мәктипи буниңдин 15 йил бурун шветсийә маарип министирлиқиниң тәстиқи билән стокһолмда қурулған оттура - башланғуч мәктәп болуп, униңда мусулманлар пәрзәнтлирини асас қилған көп милләт оқуғучилири оқумақта икән. Игилишимизчә, һазир бу мәктәптә стокһолмда яшаватқан уйғур пәрзәнтлиридин 20 гә йеқин оқуғучи оқуйдикән. Өткән һәптиниң ахиридин башлап бу мәктәп шветсийә уйғур маарип уюшмисини тәклип қилип, оқутқучи - оқуғучиларға уйғурлар һәққидә икки мәйдан мәлумат бериш паалийити уюштурди. Паалийәт мәзкур мәктәпниң муавин мудири даниел әпәндиниң сөзи билән башланди.

Даниел әпәнди сөзидә әл - әзһәр мәктипидә күндин - күнгә көпийиватқан уйғур оқуғучиларға илһам бериш, мәктәптики оқутқучи - оқуғучиларда уйғурлар вә уларниң мәдәнийити һәққидә чүчәнчә бериш мәқситидә бу паалийәтни уюштурғанлиқини тәкитләп өтти.

Мәзкур паалийәттә шветсийә уйғур маарип уюшмисиниң рәиси ниҗат турғун “унтулған әл - шәрқий түркистан” дегән темида шивет тилида икки мәйдан доклат бәрди. Паалийәттин кейин ниҗат турғун зияритимизни қобул қилип бу һәқтә мунуларни билдүрди:

Йеқинқи йиллардин буян, шветсийәдә олтурақлашқан көчмәнләр саниниң көпийишигә әгишип, көп милләт вә көп хил мәдәнийәтләрни асас қилған мәктәпләр қурулушқа башлиған. Әл - әзһәр мәктипи дәл мушу хилдики мәктәпләрниң бири һесаблиниду. Ниҗат турғун бу мәктәп һәққидә йәнә мундақ мәлуматларни бәрди.

У йәнә әл - әзһәр мәктипидә оқуватқан уйғур оқуғучилар үчүн һәптидә 4 қетимдин уйғур тили дәрси тәсис қилинғанлиқини, шветсийә уйғур маарип уюшмиси бу мәктәптә оқуватқан уйғур оқуғучиларниң ана тил дәрси үчүн мәхсус оқутқучи чиқарғанлиқини тилға алди.

Әл - әзһәр мәктипиниң муавин мудири даниел әпәнди зияритимиз ахирида йәнә мунуларни тәкитлиди: “бизниң мәктипимиздики оқуғучилар дуняниң һәрқайси җайлиридин шветсийәгә келип олтурақлашқан түрлүк тилларда сөзлишидиған вә охшашмиған мәдәнийәт арқа көрүнүшигә игә кишиләрниң пәрзәнтлиридин тәшкил тапқан. Һазир мәктипимиздә тәхминән 20 дәк уйғур оқуғучи оқуйду, һазирқи әһвалдин ейтқанда уйғур оқуғучилар саниниң давамлиқ көпийидиғанлиқи мәлум болмақта.”

У йәнә әл - әзһәр мәктипидә немә сәвәбтин уйғурлар һәққидә мәлумат бериш паалийити уюштурғанлиқи һәққидә мунуларни билдүрди: “биз уйғур маарип уюшмисини тәклип қилип уйғурлар һәққидә билимгә игә болуш һәмдә шәрқий түркистан тоғрилиқ чүшәнчә һасил қилишни ойлаштуқ. Бу бизниң мәктипимиздики уйғур оқуғучиларниң арқа көрүнүшини чүшинишимиз үчүнла пайдилиқ болуп қалмастин, бәлки йәнә башқа оқуғучиларға уйғурлар һәққидә чүшәнчә беришкиму зөрүрдур.”