Америка дөләт мәҗилисидә ечилған кишилик һоқуқ мукапати йиғинида рабийә қадир ханим йәнә қизғин алқишланди

Бүгүн америка дөләт мәҗилисидә ечилған 2013 - йиллиқ лантос кишилик һоқуқ мукапати йиғинида уйғур миллий һәрикити рәһбири рабийә қадир ханим йәнә қизғин алқишқа еришти. Америка дөләт әрбаблири, һәрқайси дөләтләрниң әлчилири вә дунявий кишилик һоқуқ паалийәтчилири болуп 500дин артуқ киши қатнашқан бу мурасимда, рабийә ханим алдинқи рәттә орун алғандин башқа, йиғин риясәтчисиниң алаһидә тонуштурушиға вә йиғин қатнашчилириниң қизғин алқишиға еришти.

Йиғинда мәзкур мукапатқа еришкән һилларий килинтон ханим, сәһнидики сөзини тамамлиғандин кейин рабийә ханимниң алдиға берип көрүшүп, униң уйғур хәлқи үчүн қиливатқан хизмәтлирини көрүп туруватқанлиқини һәм қизғин қоллайдиғанлиқини билдүрди.

Төвәндә мухбиримиз шөһрәт һошурниң бу һәқтә тәйярлиған программисини аңлайсиләр:

Һөрмәтлик радио аңлиғучилар, бүгүн америка дөләт мәҗилисидә ечилған 2013 - йиллиқ лантос кишилик һоқуқ мукапат муарасимиға дуня уйғур қурултийи рәиси рабийә қадир ханим билән бирликтә муавин рәис өмәр қанатму қатнашқан. Шуңа биз бу йиғиндики алақидар учурларни өмәр қанат әпәндидин игилидуқ:

Соал: аңлисақ, бүгүнки йиғинда уйғур миллий һәрикити рәһбири рабийә қадир ханим йәнә қизғин алқишлинипту, алди билән мушу һәқтә бир мәлумат бәргән болсиңиз?

Җаваб: шундақ. Йиғинда рабийә ханимға әң алдинқи рәттин орун берилди; йиғин риясәтчиси - америка әркинлик өйиниң башлиқи катрина ханим, мукапат саһиби һилларий клинтонни тонуштуруп өткәндин кейин, “уйғур мусулманлириниң кишилик һоқуқ җәңчиси, дунявий көләмдә паалийәт елип бериватқан рабийә қадир ханимму аримизда” дәп тонуштурди вә рабийә ханимни орнидин турушқа дәвәт қилди. Рабийә ханим орнидин турғинида, пүтүн залда гүлдүрас алқиш яңриди.

Соал: йиғинда кимләр барти, қанчилик киши қатнашқан?

Җаваб: йиғинда америка дөләт мәҗлиси әзалири, һәрқайси дөләтләрниң америкидики әлчилири, һәрқайси хәлқаралиқ аммивий тәшкилатларниң америкидики вәкиллири болуп 500 гә йеқин киши қатнашқан. Йиғинда мукапат саһиби һилларий килинтон ханим, мурасим сөзини қилип болғандин кейин сәһнидин чүшүп, рабийә қадир ханим билән алаһидә көрүшти вә униң уйғур хәлқи учун елип бериватқан паалийәтлирини көзитип туруватқанлиқини һәм йеқиндин қоллайдиғанлиқини билдүрди. Шуниң билән биллә рабийә ханимни иккинчи қетим көрүватқанлиқини, тунҗи қетим бейҗиң дуня аяллири йиғинидики учришишиниң есидә барлиқини баян қилди.

Соал: президент обама нобил тинчлиқ мукапатини тапшурувалған чеғида, дуняда бу мукапатқа мәндинму бәкрәк мунасип адәмләр бар дегән иди; сизниңчә һилларий ханимниң рабийә ханимға алаһидә билдүрүватқан бу һөрмити шуниңға охшаш “бу мукапатқа сиз әң мунасип” дегән мәнадиму яки уйғурларни қоллайдиғанлиқини билдүрүш мәнисидиму?

Җаваб : мәнчә һәр иккиси. Дегиниңиздәк, һилларий ханим мурасим сөзидә дуняда кишилик һоқуқ үчүн өзидин көп бәдәл төлигән, хизмәт қилған, қиливатқан кишиләрниң барлиқини баян қилди вә уларға һөрмәт билдүрди.

Соал: хәвириңиздә бар, бу, рабийә ханимниң чоң хәлқаравий сорунларда бундақ қизғин алқишлиниши тунҗи қетим әмәс. Бундин аввалқи мушу хил сәһниләрдин бир - иккини аңлиғучилиримизға әслитип өтсәк?

Җаваб: шундақ, бу қетим рабийә ханим билән көрүшкән һилларий ханим америкиниң сабиқ ташқи ишлар министири һәм 2016 - йили президент намзати болуши еһтимали тәхмин қилиниватқан бир шәхс; бурун җорҗи буш рабийә ханим билән прагда ечилған бир хәлқаралиқ йиғинда көрүшкән вә йиғин әһлигә тонуштурған. Җорҗи бушниң аяли лавра буш ханимму рабийә ханимни қобул қилған. Канада баш министириму шу. Униңдин башқа көплигән дөләтләрниң ташқи ишлар министири рабийә ханимни қобул қилди. У қатнашқан йиғинлирида давамлиқ йиғин әһлиниң диққәт нуқтиси болуп кәлди.

Соал: ахирида бүгүнки йиғинда мурасим өткүзүлгән лантос кишилик һоқуқ мукапати һәққидә қисқичә бир мәлумат бәргән болсиңиз?

Җаваб: бу мукапат мәшһур америка дөләт әрбаби, уйғурларниң кишилик һоқуқ паалийитиниң актип қоллиғучиси том лантос әпәнди вапат болуп кәткәндин кейин, униң намида қурулған кишилик һоқуқ тәшкилати тәрипидин тарқитилидиған мукапат, һазирғичә бу мукапатқа далай лама, чең гуаңчең қатарлиқ кишиләр наил болди.