Dolqun eysa: "Jaza lagérlirini taqash heqqide yawropa parlaméntidin pat arida xushxewer tarqilishi mumkin"

Ixtiyariy muxbirimiz ekrem
2018-09-05
Élxet
Pikir
Share
Print
D u q ning re'isi dolqun eysa ependi yillardin buyan Uyghurlar mesilisining yawropa parlaméntida küntertipke kélishi üchün küch chiqiriwatqan yawropa parlaméntining muhim ezaliridin lasto tökech ependi bilen. 2018-Yili 5-séntebir, biryussél.
D u q ning re'isi dolqun eysa ependi yillardin buyan Uyghurlar mesilisining yawropa parlaméntida küntertipke kélishi üchün küch chiqiriwatqan yawropa parlaméntining muhim ezaliridin lasto tökech ependi bilen. 2018-Yili 5-séntebir, biryussél.
RFA/Ekrem

Dunya Uyghur qurultiyining re'isi dolqun eysaning Uyghur diyaridiki yighiwélish lagérlirini bikar qilish heqqide yawropa parlaméntida élip bériwatqan pa'aliyetliri jiddiy dawamlashmaqta.

D u q ning re'isi dolqun eysa ependining bélgiye paytexti biryusséldiki yawropa parlaméntida élip bériwatqan ziyariti bügün 3-künige qedem qoydi. U bügün biryusséldin téléfon ziyaritimizni qobul qilghanda 5-séntebir élip barghan pa'aliyitining yawropa parlaméntining ezaliri bilen körüshüsh bolghanliqini tekitlidi. Uning ilgiri sürüshiche, u bügün yawropa parlaméntida qurulghan "Uyghur dostluq guruppisi" ning barawer hoquqluq re'isi bolghan 3 neper muhim shexs bilen Uyghur diyaridiki jaza lagérlirini taqash heqqide jiddiy söhbet élip barghan iken.

Dolqun eysa ependi tilgha alghan lasto tökech, ilhan küchük we tirimosa ependiler yillardin buyan Uyghurlar mesilisining yawropa parlaméntida küntertipke kélishi üchün küch chiqiriwatqan yawropa parlaméntining muhim ezaliridur. Ular d u q bilen hemkarliship bu yil 5- we 6-ayda yawropa parlaméntida Uyghurlar weziyitidin melumat bérish hemde Uyghur diyaridiki jaza lagérliri toghrisida guwahliq bérish yighinlirini uyushturushqa teyyarliq qilmaqtiken. Dolqun eysa ependi bügün bu kishiler bilen jaza lagérliri mesilisi heqqide sözlishipla qalmay, belki yene aldimizdiki aylarda yawropa ittipaqida birlikte élip baridighan pa'aliyetlerning pilan-programmilirini tüzüsh ishinimu sözleshken.

Dolqun eysa ependi sözide "Uyghur dostluq guruppisi" ning yardimi we pa'al tirishchanliqi bilen pat arida yawropa parlaméntidin Uyghur diyaridiki jaza lagérlirini taqashqa munasiwetlik xushxewer tarqilishi mumkinlikidin bésharetler berdi.

D u q ning mu'awin re'isi perhat muhemmidi ependi bu heqte toxtalghanda b d t we amérika qatarliq döletler Uyghur diyaridiki jaza lagérliri mesilisige jiddiy mu'amile qiliwatqan hazirqi weziyette yawropa ittipaqi we yawropa parlaméntining passip halette qalghanliqini, d u q re'isining bu qétimqi biryussél ziyaritining bu weziyetni özgertishni meqset qilghanliqini tilgha aldi.

D u q ning re'isi dolqun eysa ependi bu yil 11-ayning 6-küni b d t kishilik hoquq kéngishi teripidin ötküzülidighan "Xitayning kishilik hoquq weziyitini omumyüzlük közdin köchürüsh" yighinida Uyghur diyaridiki jaza lagérliri mesilisining asasiy küntertipni igilishi üchün Uyghurlargha hésdashliq qilidighan küchlerni qolgha keltürüsh xizmitini yawropa ittipaqidila bashliwetken. Bu munasiwet bilen bügün u yene bélgiye tashqi ishlar ministirliqi hemde kishilik hoquq komitétining rehberliri bilen uchrishishlar ötküzgen.

D u q ning mu'awin re'isi perhat muhemmidi ependi sözide nawada yawropa parlaménti Uyghur diyaridiki jaza lagérlirini taqash heqqide qarar qobul qilghan teqdirde buning yawropa ittipaqigha eza 28 döletke qeder tesir körsitidighanliqini eskertti.

Tünügün kech terepte d u q ning re'isi dolqun eysa ependi bélgiyediki bir qisim Uyghur jama'et wekilliri bilen uchrashqan we ularni 11-ayning 6-küni jenwede élip bérilidighan "Üch milyon Uyghurgha erkinlik" namayishigha seperwer qilghan.

Toluq bet